పెళ్లిళ్ల భోజనాల్లో వడ్డించే కమ్మని క్యాబేజీ క్యారెట్ కొబ్బరి వేపుడు
శుభకార్యాలు, పెళ్లిళ్ల విందు భోజనాల్లో వడ్డించే శాకాహార వంటకాల్లో 'క్యాబేజీ క్యారెట్ వేపుడు' చాలా ప్రత్యేకమైనది. ఇంట్లో సాధారణంగా క్యాబేజీ కూర వండితే ఆ సహజ వాసన నచ్చక పిల్లలు, పెద్దలు తినడానికి అంతగా మక్కువ చూపించరు. కానీ ఫంక్షన్లలో చేసే క్యాబేజీ వేపుడులో ఎలాంటి పచ్చి వాసన ఉండకపోగా.. పచ్చికొబ్బరి కమ్మదనం, అల్లం పచ్చిమిర్చి ఘాటుతో ఎంతో రుచిగా ఉంటుంది. క్యాబేజీలోని ఫైబర్, క్యారెట్లోని విటమిన్-ఎ శరీరానికి ఎంతో మేలు చేస్తాయి.
కావలసిన పదార్థాలు: పావు కిలో సన్నగా పొడవుగా తరిగిన క్యాబేజీ, పావు కిలో చిన్న చిన్న ముక్కలుగా కట్ చేసిన క్యారెట్లు, అర చిప్ప పచ్చికొబ్బరి తురుము, అంగుళం సైజు అల్లం ముక్క, కారానికి తగినన్ని పచ్చిమిరపకాయలు, సన్నగా తరిగిన ఉల్లిపాయ 1 , రెండు రెమ్మల కరివేపాకు, 2 టేబుల్ స్పూన్ల వంట నూనె, అర టీస్పూన్ ఆవాలు, అర టీస్పూన్ జీలకర్ర, 1 టీస్పూన్ మినప్పప్పు, 1 టీస్పూన్ పచ్చిశనగపప్పు, 2 ఎండుమిర్చి, 1 టీస్పూన్ పసుపు, రుచికి సరిపడా ఉప్పు
తయారీ విధానం: చిన్న మిక్సీ జార్లో అంగుళం అల్లం ముక్క, కారానికి తగినట్లుగా పచ్చిమిర్చి ముక్కలు వేసి బరకగా గ్రైండ్ చేసి పక్కన పెట్టుకోవాలి. అదేవిధంగా పచ్చికొబ్బరి ముక్కలను కూడా మిక్సీలో వేసి పలుకులుగా లేదా తురుములా గ్రైండ్ చేసి పెట్టుకోవాలి.
స్టవ్ వెలిగించి పాన్లో రెండు టేబుల్ స్పూన్ల నూనె వేడిచేయాలి. నూనె కాగిన తర్వాత ఆవాలు, జీలకర్ర, మినప్పప్పు, పచ్చిశనగపప్పు వేసి లో ఫ్లేమ్పై దోరగా వేయించాలి. పప్పులు లేత బంగారు రంగులోకి రాగానే ఎండుమిర్చి ముక్కలు, సన్నగా తరిగిన ఉల్లిపాయ ముక్కలు, కరివేపాకు వేసి ఉల్లిపాయలు మెత్తబడే వరకు వేపాలి. ఆ తర్వాత మనం బరకగా రుబ్బుకున్న అల్లం-పచ్చిమిర్చి ముద్దను వేసి పచ్చివాసన పూర్తిగా పోయేంత వరకు నూనెలో దోరగా వేయించాలి.
అల్లం పేస్ట్ వేగిన తర్వాత సన్నగా తరిగిన పావు కిలో క్యాబేజీ తరుగు, చిన్నగా కట్ చేసిన పావు కిలో క్యారెట్ ముక్కలను బాండీలో వేయాలి. ఇందులోనే ఒక టీస్పూన్ పసుపు, సరిపడా ఉప్పు వేసి ముక్కలన్నింటికీ పట్టేలా గరిటెతో బాగా కలపాలి. ఇప్పుడు మూతపెట్టి మంటను లో ఫ్లేమ్లో ఉంచి 5 నిమిషాల పాటు మగ్గించాలి. 5 నిమిషాల తర్వాత మూత తీసి కలపాలి; క్యాబేజీలోని సహజ నీటితోనే ముక్కలు దాదాపు ఉడికిపోతాయి. క్యారెట్ ముక్క ఇంకాస్త మెత్తబడటానికి మళ్లీ మూతపెట్టి మరో 2 నిమిషాలు చిన్న మంటపై మగ్గనివ్వాలి.
కూరగాయ ముక్కలు మెత్తగా ఉడికిన తర్వాత.. మనం మిక్సీ పట్టుకున్న తాజా పచ్చికొబ్బరి తురుమును వేసి కలపాలి. ఈ సమయంలో ఉప్పు సరిచూసుకుని అవసరమైతే కలుపుకోవచ్చు. కొబ్బరి ఫ్లేవర్ కూరగాయలకు పట్టేలా మూతపెట్టి లో ఫ్లేమ్పై కేవలం 1 నుండి 2 నిమిషాలు మాత్రమే ఉంచి స్టవ్ ఆఫ్ చేయాలి. అంతే, నోరూరించే వెడ్డింగ్ స్టైల్ క్యాబేజీ క్యారెట్ కొబ్బరి వేపుడు సిద్ధం! వేడివేడి అన్నంలోకి గానీ, పుల్కా, చపాతీల్లోకి గానీ నంజుకుని తింటే ఎంతో కమ్మగా ఉండి ఇంట్లో వాళ్లంతా ఎంతో ఇష్టపడతారు