చపాతీలను ఇలా కాలిస్తే.. ఎంత డేంజరో తెలుసా? నిపుణులు ఏం చెబుతున్నారంటే..
రొట్టెలు లేదంటే, ఇతర ఆహార పదార్థాలు ఏవైనా నేరుగా మంటపై అధిక ఉష్ణోగ్రతల వద్ద కాల్చడం వల్ల క్యాన్సర్ వచ్చే అవకాశాలు ఎక్కువగా ఉన్నాయని ఓ అధ్యయనం తేల్చింది. అధిక ఉష్ణోగ్రతపై వండడం వల్ల క్యాన్సర్కు కారణమయ్యే అకిలామైడ్, హెటెరోసైక్లిక్ అమైన్‌లు, పాలీసైక్లిక్ ఆరోమాటిక్ హైడ్రోకార్బన్‌లు కూడా ఉత్పత్తి అవుతాయని వైద్యులు చెబుతున్నారు.
మాంసాన్ని కూడా నేరుగా మంటపై ఫ్రై చేయడం వల్ల క్యాన్సర్ కారకాలు పెరిగిపోతాయని ఆరోగ్య నిపుణులు హెచ్చరిస్తున్నారు. అయితే, ఈ క్యాన్సర్ బారిన పడకుండా ఉండేందుకు కొన్ని చిట్కాలు సూచిస్తున్నారు వైద్యులు. క్యాన్సర్ ప్రమాదాన్ని ఎలా తగ్గించాలంటే..
రొట్టెలు, పుల్కా వంటివి చాలా మంది ఎక్కువ మంటపై కాలుస్తుంటారు. కానీ, ఇలా కాలుస్తున్నప్పుడు నల్లగా మాడిపోకుండా చూడాలని నిపుణులు చెబుతున్నారు. మంటను తగ్గించి.. రొట్టెలను తరచూ తిప్పడం వల్ల అవి ఎక్కువ కాలకుండా, మాడకుండా ఉంటాయని అంటున్నారు. ఒకవేళ మాడితే తినేముందు నల్లగా మారిన ప్రాంతాలను తొలగించాలని సూచిస్తున్నారు.
ఒకవేళ మీకు నేరుగా మంటపై కాల్చిన రొట్టెలు నచ్చితే.. వాటిని వీలైనంత తక్కువ తినాలని వైద్యులు సూచిస్తున్నారు. ఇందుకు బదులుగా సమతుల్యమైన ఆహారాన్ని మీ డైట్లో చేర్చుకోవాలని చెబుతున్నారు.
రొట్టెలను నేరుగా మంటపై కాల్చకుండా పెనంపై వేయాలని సూచిస్తున్నారు. ఇలా చేయడం వల్ల పెనం అధిక ఉష్ణోగ్రతను గ్రహించి.. తక్కువ వేడిపై రొట్టేలను కాల్చేలా సాయం చేస్తుందని తెలిపారు. ఫలితంగా PAHలు, అక్రిలమైడ్ ఉత్పత్తిని నిరోధిస్తుందని చెప్పారు.
రొట్టెలు ఎక్కువగా తీసుకునే వారు వీటితో పాటు యాంటీఆక్సిడెంట్లు అధికంగా ఉండే పండ్లు, కూరగాయలను డైట్లో చేర్చుకోవాలని చెబుతున్నారు. ఇవి ఫ్రీ రాడికల్స్, ఆక్సీకరణ ఒత్తిడిని తగ్గించి క్యాన్సర్ రాకుండా సహాయ పడుతుందని వివరించారు.