చెడు కొలెస్ట్రాల్ తగ్గించి, గుండెను కాపాడే ‘బార్లీ రొట్టెలు’.. పెద్దల నుంచి పిల్లల వరకు అమృతం!
మానవ పరిణామ క్రమంలో ఆదిమానవులు వేట మానేసి వ్యవసాయం ప్రారంభించినప్పుడు మొట్టమొదటగా పండించిన ధాన్యం బార్లీ. మన హిందూ సనాతన ధర్మ గ్రంథాలు, ఆయుర్వేదంలో దీనిని 'యవలు'అని పిలుస్తారు. హోమాలలో, పూజలలో యవలకు ఎంతో ప్రాధాన్యత ఉంది. అంతేకాకుండా అనేక గ్రంథాలలోనూ ఈ ధాన్యం యొక్క గొప్పదనం ప్రస్తావించబడింది.
సాధారణంగా మన ఇళ్లలో ఎవరికైనా జ్వరం వచ్చినా, ఒంట్లో నీరసంగా ఉన్నా బార్లీ గింజలతో జావ కాసి ఇస్తుంటారు. అయితే బార్లీని కేవలం జావ రూపంలోనే కాకుండా రోజూ రొట్టెల రూపంలో తీసుకుంటే శరీరానికి అపారమైన ప్రయోజనాలు చేకూరుతాయి. ఆధునిక వైద్యులు సైతం రక్తంలోని చెడు కొలెస్ట్రాల్ను (LDL) తగ్గించడానికి, గుండె జబ్బులను నివారించడానికి, మధుమేహాన్ని అదుపులో ఉంచడానికి బార్లీ పిండిని ఉత్తమమైన ఆహారంగా సిఫార్సు చేస్తున్నారు. ఈ ప్రాచీన బార్లీ రొట్టెల తయారీ విధానాన్ని ఇప్పుడు వివరంగా చూద్దాం.
కావలసిన పదార్థాలు: 2 కప్పుల బార్లీ పిండి, పిండి కలపడానికి సరిపడా గోరువెచ్చని కంటే కాస్త ఎక్కువ వేడి ఉన్న నీళ్లు, రొట్టెలు ఒత్తుకోవడానికి పొడి పిండి తయారీ విధానం: ఒక వెడల్పాటి గిన్నెలో రెండు కప్పుల బార్లీ పిండి, తగినంత ఉప్పు వేసి కలపాలి. ఈ పిండి సాధారణ గోధుమపిండి కంటే చాలా ఎక్కువ నీటిని పీల్చుకుంటుంది.
కాబట్టి ఒకేసారి నీళ్లు పోయకుండా.. బాగా వేడిగా ఉన్న నీళ్లను కొద్దికొద్దిగా చల్లుకుంటూ పిండిని తడుపుతూ కలపాలి. పిండి ముద్దను ఫ్లాట్గా చేసి అవసరమైతే మరో రెండు మూడు స్పూన్ల వేడి నీళ్లు చల్లుకుంటూ కనీసం 10 నిమిషాల పాటు చేత్తో బాగా మర్దన చేయాలి. పిండి ఎంత బాగా నాదిరితే రొట్టెలు అంత సాఫ్ట్గా వస్తాయి. అనంతరం మూతపెట్టి 10 నుండి 15 నిమిషాల పాటు నాననివ్వాలి.
నానిన పిండిని సమాన పరిమాణంలో ఉండలుగా చేసుకోవాలి. పిండి ఆరిపోకుండా మూతపెట్టి ఉంచాలి. చపాతీ పీటపై కొద్దిగా పొడి బార్లీ పిండిని చల్లుకుని, పిండి ముద్దను మరీ పలుచగా కాకుండా, మరీ మందంగా కాకుండా మీడియం సైజు చపాతీలా ఒత్తుకోవాలి ఈ పిండిలో గోధుమల్లోలా సహజ తీపి ఉండదు, కొద్దిగా చప్పగా ఉంటుంది.
స్టవ్ వెలిగించి ఐరన్ లేదా నాన్స్టిక్ పెనాన్ని బాగా వేడెక్కనివ్వాలి. పెనం బాగా కాలిన తర్వాత మాత్రమే రొట్టెను వేయాలి. సాధారణ గోధుమ చపాతీతో పోలిస్తే బార్లీ రొట్టె కాలడానికి ఒకటి రెండు నిమిషాల సమయం పడుతుంది. ఒకవైపు కాలిన తర్వాత రెండో వైపుకు తిప్పి, రెండు వైపులా చక్కగా వేగిన తర్వాత తీసి ప్లేట్లో ఉంచాలి.
ఈ రొట్టెలను పప్పు, ఆకుకూరలు లేదా ఏదైనా ఘాటైన కూరలతో తింటే అద్భుతంగా ఉంటాయి. అంతేకాకుండా పళ్లు లేని వృద్ధులకు, చిన్నపిల్లలకు ఈ రొట్టెను చిన్న ముక్కలుగా తుంచి వేడి పాలలో నానబెట్టి ఇస్తే తేలికగా జీర్ణమై శరీరానికి సంపూర్ణ బలాన్ని ఇస్తుంది. గుండెను దృఢంగా ఉంచే ఈ పురాతన రొట్టెలను తప్పకుండా ఆహారంలో భాగం చేసుకోండి!