ప్రభుత్వ వైద్యుల నిర్లక్ష్యానికి పరాకాష్ట.. తలలో ఇనుప నట్టు ఉంచి కుట్లు.. ఎంతకూ రక్తస్రావం ఆగకపోవడంతో చివరికి..

Iron Bolt Inside Patient's Head

తమిళనాడు: తలకు గాయమై ఓ వ్యక్తి ప్రభుత్వ ఆసుపత్రికి వచ్చాడు. డాక్టర్లు వైద్యం చేసి కట్టుకట్టి ఇంటికి పంపారు. ఐతే గాయం నుంచి ఎంతకూ రక్తస్రావం ఆగకపోవడంతో అనుమానం వచ్చిన కుటుంబ సభ్యులు అతన్ని ఓ ప్రైవేట్‌ ఆసుపత్రికి తరలించారు. అక్కడ వైద్యులు స్కాన్‌ చేయగా అసలు విషయం బయటపడింది. తలపై కుట్లు వేసిన ప్రదేశంలో ఇనుప నట్టు ఉండటం చూసి వైద్యులు షాక్‌కు గురయ్యారు. ఈ ఘటన తమిళనాడులో జరిగింది. అసలేం జరిగిందంటే..

తమిళనాడులోని తిరుపత్తూరు జిల్లా వానియాంబాడీ ప్రాంతంలోని ఉదయేంద్రం గ్రామానికి చెందిన కార్తికేయన్ లారీ డ్రైవర్‌గా పనిచేస్తున్నాడు. సోమవారం ఉదయం 5 గంటల సమయంలో కార్తికేయన్ నడుపుతున్న​లారీని, వెనుక నుంచి ఓ ప్రైవేట్ బస్సు ఢీ కొట్టింది. దీంతో లారీ అదుపు తప్పి రోడ్డు పక్కన ఉన్న గుంతలో బోల్తా పడింది. ఈ ప్రమాదంలో కార్తికేయన్ తలకు బలమైన గాయమైంది. స్థానికులు అతన్ని రక్షించి, వేలూరులోని ప్రభుత్వ వైద్య కళాశాల ఆస్పత్రికి తరలించారు. అక్కడ వైద్యులు బాధితుడికి చికిత్స చేసి, తలకు కుట్లు వేశారు. అయినా రక్తస్రావం ఆగకపోవడంతో అతని కుటుంబ సభ్యులు కార్తికేయన్‌ను ఓ ప్రైవేటు ఆస్పత్రికి తరలించారు.

అక్కడ వైద్యులు బాధితుడి తలకు కుట్లు వేసిన ప్రదేశంలో ఇనుప నట్టు ఉన్నట్లు గుర్తించారు. అనంతరం ఆపరేషన్‌ నిర్వహించి నట్టును తొలగించారు. గాయమైన ప్రదేశంలో ఇన్‌ఫెక్షన్​కావడంతో.. రెండు రోజుల తర్వాత మళ్లీ కుట్లు వేస్తామని వైద్యులు తెలిపారు. ప్రభుత్వ వైద్యుల నిర్లక్ష్యంపై బాధితుడి బంధువులు ఆగ్రహం వ్యక్తం చేశారు. ఈ ఘటనపై వేలూరు ప్రభుత్వ వైద్య కళాశాల ఆస్పత్రి డీన్​ డాక్టర్​పాపాపతిని వివరణ కోరగా, ఇప్పటివరకు తనకు ఎలాంటి ఫిర్యాదు అందలేదని మీడియాకు తెలిపారు.

మరిన్ని జాతీయ వార్తల కోసం క్లిక్‌ చేయండి.