మ్యాప్ వివాదం పక్కన పెట్టి, మోదీకి నేపాల్ ప్రధాని ఫోన్

భారత స్వాతంత్య్ర దినోత్సవం సందర్భంగా నేపాల్ ప్రధాని కెపి శర్మ ఓలి శనివారం ప్రధాని మోదీకి  ఫోన్ ద్వారా శుభాకాంక్షలు తెలిపారు. ఇటీవల ఐక్యరాజ్యసమితి భద్రతా మండలిలో ఇండియా నాన్-పర్మనెంట్ సభ్యత్వ దేశంగా ఎన్నికైనందుకు అభినందించారు. ఫోన్ సంభాషణ సందర్భంగా ఇద్దరు నేతలూ కోవిడ్-19 పై పోరులో కలిసికట్టుగా కృషి చేయాలన్న అభిప్రాయాన్ని వ్యక్తం చేశారని విదేశాంగ శాఖ ఓ ప్రకటనలో తెలిపింది. భారత-నేపాల్ దేశాల మధ్య సాంస్కృతిక సంబంధాలు పరిఢవిల్లాలని మోదీ కోరారని, దీనితో  శర్మ ఓలి కూడా ఏకీభవించారని ఈ  శాఖ వెల్లడించింది. నేపాల్ ఈ మధ్య రూపొందించిన పొలిటికల్ మ్యాప్ గురించి గానీ, సరిహద్దు సమస్యల ప్రస్తావనగానీ వీరి చర్చల్లో రాలేదని తెలిసింది.

లిపు లేఖ్ సహా భారత భూభాగంలోని మరో రెండు ప్రాంతాలను తమవిగా చెప్పుకుంటూ నేపాల్ గత నెలలో ఓ రాజకీయ మ్యాప్ ను రూపొందించింది. దానిపై ఆ దేశంలో ప్రతిపక్షాలు వివాదం లేవనెత్తడంతో.. ఓలి కాస్త వెనక్కి తగ్గారు. తన పదవికే గండం వచ్ఛేలా కనబడడంతో ఆయన చల్లబడి మళ్ళీ దానిపై ఎలాంటి ప్రకటన చేయలేదు. కాగా-2019-20 ఆర్ధిక సంవత్సరంలో ‘ఎయిడ్’ టు నేపాల్’ పేరిట భారత ప్రభుత్వం బడ్జెట్లో రూ. 1200 కోట్లు కేటాయించింది.