ఇక ‘ మహా ‘ రైతుల రుణ మాఫీ.. సీఎంపీ హామీ

మహారాష్ట్రలో శివసేన, కాంగ్రెస్, ఎన్సీపీల నేతృత్వంలో ఏర్పడిన ‘ మహా వికాస్ అఘాడీ ‘ గురువారం తన కనీస ఉమ్మడి కార్యక్రమాన్ని (సిఎంపీ) ని విడుదల చేసింది. రైతులకు రుణమాఫీ చేస్తామని, 10 రూపాయలకే అందరికీ ఆహారం, స్థానికులకు 80 శాతం ఉద్యోగాలు కల్పిస్తామని హామీ ఇచ్చింది. రైతులందరికీ తక్షణమే రుణ మాఫీ చేస్తాం.. ఎస్ ఆర్ ఏ పథకం కింద పేదలకు 500 చదరపు అడుగుల్లో ఇళ్ళు, అందరికీ ఆరోగ్య బీమా వంటి హామీలు కూడా ఇందులో ఉన్నాయి. పంటలు కోల్పోయిన రైతులకు వెంటనే సవరించిన పరిహారం లభించేలా చూస్తామని, నీటి కొరతను ఎదుర్కొంటున్న కరువు ప్రాంతాలకు ప్రత్యేక ‘ వాటర్ సిస్టం ‘ ఏర్పాటు చేస్తామని ఈ కూటమి పేర్కొంది. కాగా- హిందుత్వ, సావర్కార్, రామాలయ నిర్మాణం వంటి సమస్యలపై శివసేన ఇతర రెండు పార్టీలతో పూర్తిగా రాజీ పడిపోయింది. కనీస ఉమ్మడి కార్యక్రమంలో ఈ అంశాల ప్రస్తావనే లేదు. రాజ్యాంగంలో పొందు పరచిన సెక్యులర్ విలువలకు కట్టుబడి ఉంటామని మూడు పార్టీలూ హామీనిచ్చాయి. ఈ కనీస ఉమ్మడి కార్యక్రమ హామీల పత్రాన్ని శివసేననేత ఏక్ నాథ్ షిండే, ఎన్సీపీ నేత జయంత్ పాటిల్ విడుదల చేశారు. శివసేన అధినేత ఉధ్ధవ్ థాక్రే సీఎంగా ప్రమాణ స్వీకారం చేయడానికి ముందు ఈ ‘ మేనిఫెస్టో ‘ వంటి దానిని రిలీజ్ చేశారు.