అనువాదిని ఏఐ నుంచి సిమ్ ఆధారిత సురక్షిత మెసేజింగ్ యాప్
డేటా భద్రతపై ఆందోళనల నేపథ్యంలో స్వదేశీ డిజిటల్ పరిష్కారాలపై దృష్టి పెరిగింది. ఈ క్రమంలో హైప్డ్ సంవాదిని మెసెంజర్, దేశీ ఏఐ జెన్జడ్ కీబోర్డ్ వంటి యాప్లు వినియోగదారులకు భద్రత, ప్రైవసీకి ప్రాధాన్యత ఇస్తూ అందుబాటులోకి వచ్చాయి. ఫోన్ నంబర్ వెల్లడించకుండా చాటింగ్, స్థానిక భాషల్లో టైపింగ్ వంటి సౌకర్యాలు వీటి ప్రత్యేకత.
భారత్లో డిజిటల్ ప్రపంచం వేగంగా మారుతోంది. డేటా భద్రత, విదేశీ సర్వర్లపై ఆధారపడటం వంటి అంశాలు తీవ్ర చర్చకు దారితీస్తున్నాయి. దేశంలో 80 కోట్లకు పైగా ప్రజలు ఉపయోగిస్తున్న కమ్యూనికేషన్ యాప్లు ఎక్కువగా విదేశీ సంస్థల చేతుల్లో ఉండటంతో, స్వదేశీ పరిష్కారాల అవసరం మరింతగా పెరిగింది. ఇదే సమయంలో డిజిటల్ మోసాలు, కొత్త తరహా సైబర్ నేరాలు ప్రజలను ఆందోళనకు గురిచేస్తున్నాయి.
ఈ నేపథ్యంలో అనువాదిని ఏఐ సంస్థ స్వదేశీ వినియోగదారుల కోసం కొత్త డిజిటల్ సాధనాలను తీసుకొచ్చింది. ఇందులో హైప్డ్ సంవాదిని మెసెంజర్, దేశీ ఏఐ జెన్జడ్ కీబోర్డ్ ప్రధానంగా ఉన్నాయి. భారతీయుల భాషా అవసరాలు, భద్రతా ప్రమాణాలను దృష్టిలో ఉంచుకుని వీటిని రూపొందించినట్లు అభివృద్ధి దారులు చెబుతున్నారు. విదేశీ యాప్లకు ప్రత్యామ్నాయంగా “విదేశీ నుంచి దేశీకి” అనే భావనతో ఈ ప్రయత్నం చేపట్టారు.
భద్రతే ప్రధాన లక్ష్యం
హైప్డ్ సంవాదిని యాప్ను సాధారణ మెసేజింగ్ యాప్లకు సురక్షిత ప్రత్యామ్నాయంగా అభివర్ణిస్తున్నారు. ఇందులో డైనమిక్ చాట్ ఐడీ వ్యవస్థ ద్వారా ఫోన్ నంబర్ వెల్లడించకుండా చాటింగ్, వీడియో కాలింగ్ చేసుకునే అవకాశం ఉంది. అనుమతి లేకుండా ఎవరూ మెసేజ్ చేయలేని విధంగా ‘రిక్వెస్ట్ మాడ్యూల్’ కూడా ఉంది. పాత చాట్స్ కోల్పోకుండా వాట్సాప్ నుంచి డేటాను మార్చుకునే సదుపాయం కూడా కల్పించారు.
అకౌంట్ రక్షణకు ప్రత్యేక వ్యవస్థ
సిమ్, డివైస్ బైండింగ్ విధానంతో అకౌంట్ను యజమాని మాత్రమే ఉపయోగించేలా భద్రత కల్పించారు. సిమ్ మార్పులు, అనుమానాస్పద చర్యలు జరిగినప్పుడు వెంటనే అలర్ట్ వస్తుంది. అత్యవసర పరిస్థితుల్లో ఒక ట్యాప్తో సహాయం పొందే ఎస్ఓఎస్ ఫీచర్ను కూడా అందుబాటులోకి తీసుకువచ్చారు. రైతులకు మార్కెట్ ధరలు, వృద్ధులకు అవసరమైన సమాచారం వంటి ప్రత్యేక విభాగాలు కూడా ఇందులో ఉన్నాయి.
తల్లి భాషలో టైపింగ్ సులభం
దేశీ ఏఐ జెన్జడ్ కీబోర్డ్ ద్వారా 22 భారతీయ భాషలతో పాటు 70కిపైగా భాషల్లో టైపింగ్ సౌకర్యం కల్పించారు. క్లౌడ్కు డేటా పంపకుండా ఫోన్లోనే ప్రాసెసింగ్ జరిగేలా ఏర్పాటు చేశారు. యువత కోసం ట్రెండింగ్ పదాలకు ప్రత్యేక ‘జెన్జడ్ కీ’ను కూడా అందించారు. కీబోర్డ్లోనే కాలిక్యులేటర్, కరెన్సీ మార్పిడి వంటి సౌకర్యాలు ఉండటం విశేషం.
ఈ రెండు యాప్లు ఇప్పటికే ప్రధాన యాప్ స్టోర్లలో అందుబాటులోకి వచ్చాయి. భద్రత, స్వదేశీ పరిష్కారాల వైపు భారతీయుల అడుగులు వేస్తున్న వేళ, ఈ కొత్త ప్రయత్నం ఎంతవరకు విజయవంతమవుతుందో చూడాలి.