Warren Buffett: ఫాస్ట్‌ఫుడ్, కోక్, ఐస్‌క్రీమ్.. దీర్ఘాయువుకు వారెన్ బఫెట్ ఆరోగ్య సూత్రం ఇదే..

Warren Buffet Fitness Secret

బఫెట్ దీర్ఘాయువు రహస్యం ఖరీదైన చికిత్సలు, డైట్‌లలో లేదు. అది చాలా సులభమైన, అందరినీ ఆకర్షించే ఒక సూత్రంలో ఉంది. ప్రపంచ కుబేరులలో ఒకరైన వారెన్ బఫెట్ 95 ఏళ్ల వయసులోనూ చురుగ్గా ఉన్నారు. ఆరోగ్యంగా ఉండేందుకు కఠినమైన నియమాలు పాటించడం, డైట్, వ్యాయామం వంటివాటిపై ఆయన దృష్టి పెట్టరు. ఆయన ఆరోగ్య రహస్యం చాలా సులభం, ప్రత్యేకంగా ఉంటుంది. బఫెట్ తన జీవితంలో సంతోషానికి, మానసిక ప్రశాంతతకు ఎక్కువ ప్రాధాన్యత ఇస్తారు.

బఫెట్ జీవనశైలిని పరిశీలిస్తే, ఆయన ఆరేళ్ల పిల్లవాడిలా ఆహారం తీసుకుంటారు. దీనిపై ఆయన మాట్లాడుతూ, “ఆరేళ్ల పిల్లలకు మరణాల రేటు తక్కువ. అందుకే నేను వారిలా తింటాను” అని చెప్పారు. ఆయన ఆహారంలో కోక్, ఐస్‌క్రీమ్, ఫాస్ట్‌ఫుడ్ ఎక్కువగా ఉంటాయి. ఈ అలవాటు ఆహార నియమాల వల్ల వచ్చే ఒత్తిడిని తగ్గిస్తుంది.

నిద్ర, మానసిక ఉల్లాసం ముఖ్యం

బఫెట్ నిత్యం ఎనిమిది గంటల నిద్ర పోతారు. మంచి నిద్ర గుండెకు, మెదడుకు చాలా అవసరం అని ఆయన నమ్ముతారు. నిద్ర జ్ఞాపకశక్తి, ఏకాగ్రతను పెంచుతుంది. అలాగే, ఆయన మానసిక ఆరోగ్యంపై చాలా శ్రద్ధ తీసుకుంటారు. గంటల తరబడి బ్రిడ్జ్ ఆడటం, పుస్తకాలు చదవడం ఆయనకు అలవాటు. ఇవి మెదడుకు పదును పెడతాయి. దీంతోపాటు, ఏ ప్లాన్ లేని ఖాళీ రోజులను గడుపుతారు. విశ్రాంతి, ఆలోచనల కోసం ఆ సమయాన్ని కేటాయిస్తారు.

దీర్ఘాయువుకు సంతోషమే రహస్యం

బఫెట్ తన దీర్ఘాయువుకు, శక్తికి సంతోషమే కారణం అని చెబుతారు. “హాట్ ఫడ్జ్ సండేస్ తిన్నప్పుడు, కోక్ తాగినప్పుడు నేను చాలా సంతోషంగా ఉంటాను” అని ఆయన అన్నారు. సంతోషంగా ఉండటం ఒత్తిడిని తగ్గిస్తుంది. జీవితంలో సంతృప్తి, ఆనందం ఉంటే మనిషి దీర్ఘకాలం జీవించవచ్చని బఫెట్ తన జీవనశైలి ద్వారా నిరూపించారు.