తెలియక చేస్తున్న పొరపాటు.. ఫ్రిజ్లో పెడితే విషంగా మారే ఆహారాలు ఇవే!
ప్రతి ఆహార పదార్థాన్ని ఫ్రిజ్లో ఉంచడం ఆరోగ్యానికి మంచిది కాదని నిపుణులు హెచ్చరిస్తున్నారు. కొన్ని ముఖ్యమైన ఆహారాలను ఫ్రిజ్లో నిల్వ చేస్తే వాటి పోషక విలువలు తగ్గడమే కాకుండా ఆరోగ్యానికి హానికరంగా మారే ప్రమాదం ఉందని చెబుతున్నారు. అవేంటో ఇక్కడ తెలుసుకుందాం..
Updated on: May 29, 2026 | 1:22 PM
ప్రస్తుతం చాలా ఇళ్లలో ఆహార పదార్థాలను తాజాగా ఉంచేందుకు ఫ్రిజ్ వినియోగం సాధారణమైంది. మార్కెట్ నుంచి తెచ్చిన కూరగాయలు, తేనె, బంగాళాదుంపలు వంటి వాటిని చాలామంది ఆలోచించకుండా నేరుగా ఫ్రిజ్లో పెట్టేస్తుంటారు. అయితే కొన్ని ఆహార పదార్థాలను ఫ్రిజ్లో ఉంచడం వల్ల మేలు కంటే నష్టమే ఎక్కువగా జరుగుతుందని నిపుణులు హెచ్చరిస్తున్నారు. అవి తమ సహజ రుచి, పోషక విలువలను కోల్పోవడమే కాకుండా ఆరోగ్యానికి హానికరంగా మారే ప్రమాదం కూడా ఉందని చెబుతున్నారు.
బంగాళాదుంపలు
బంగాళాదుంపలను ఫ్రిజ్లో ఉంచితే వాటిలోని పిండిపదార్థం వేగంగా చక్కెరగా మారుతుంది. తర్వాత వాటిని వేయించినప్పుడు లేదా వండినప్పుడు అక్రిలమైడ్ అనే హానికర రసాయనం ఏర్పడే అవకాశం ఉంటుంది. ఇది ఆరోగ్యానికి ప్రమాదకరమని నిపుణులు చెబుతున్నారు. కాబట్టి బంగాళాదుంపలను చల్లని, పొడి ప్రదేశంలో నిల్వ చేయడం మంచిది.
ఉల్లిపాయలు
ఫ్రిజ్లో ఉండే తేమ కారణంగా ఉల్లిపాయలు త్వరగా మెత్తబడిపోయి బూజు పట్టే ప్రమాదం ఉంటుంది. దీంతో వాటి సహజ రుచి, పోషక విలువలు దెబ్బతింటాయి. అందుకే ఉల్లిపాయలను గాలి ప్రసరణ బాగా ఉండే పొడి ప్రదేశంలో ఉంచాలని సూచిస్తున్నారు.
వెల్లుల్లి
వెల్లుల్లిని ఫ్రిజ్లో ఉంచితే త్వరగా మొలకలు రావచ్చు. అంతేకాదు, వెల్లుల్లి లోపలి భాగం రబ్బరులా మారి శిలీంధ్రాలు పెరిగే అవకాశం ఉంటుంది. అదనంగా, వెల్లుల్లి ఘాటైన వాసన ఇతర ఆహారాలకు వ్యాపించే ప్రమాదం కూడా ఉంది.
తేనె
తేనెను ఫ్రిజ్లో ఉంచడం పూర్తిగా తప్పు అని నిపుణులు చెబుతున్నారు. చల్లని ఉష్ణోగ్రతల కారణంగా తేనె గడ్డకట్టి దాని సహజ గుణాలు తగ్గిపోతాయి. స్వచ్ఛమైన తేనెను సాధారణ గది ఉష్ణోగ్రతలోనే నిల్వ ఉంచితే అది చాలా కాలం వరకు పాడవకుండా ఉంటుంది.
టమోటాలు
టమోటాలను ఫ్రిజ్లో ఉంచితే వాటి కణ నిర్మాణం దెబ్బతిని త్వరగా మెత్తబడిపోతాయి. దీంతో వాటి అసలైన రుచి, సువాసన తగ్గిపోవడమే కాకుండా పోషకాలు కూడా తగ్గే అవకాశం ఉంది. కాబట్టి టమోటాలను బయట ఉంచడమే మంచిదని నిపుణులు సూచిస్తున్నారు.
ఆరోగ్యంపై ప్రభావం
రిఫ్రిజిరేటర్లోని అధిక చల్లదనం కొన్ని ఆహార పదార్థాల సహజ నిర్మాణాన్ని పూర్తిగా మార్చేస్తుంది. ఫలితంగా వాటిలోని ప్రయోజనకర ఎంజైమ్లు నాశనమై ఆరోగ్యానికి హానికర పదార్థాలుగా మారే అవకాశం ఉంది.
అందుకే ప్రతి ఆహార పదార్థాన్ని ఫ్రిజ్లో నిల్వ చేయడం సరైన పద్ధతి కాదని గుర్తుంచుకోవాలి. మీ వంటగదిలో ఉన్న ఈ ఐదు ఆహార పదార్థాలను ఈరోజే ఫ్రిజ్ నుంచి బయటకు తీసి సరైన ప్రదేశాల్లో నిల్వ చేస్తే కుటుంబ ఆరోగ్యాన్ని కాపాడుకోవచ్చు.
