ఇన్నాళ్లూ మనం చేసిన అతిపెద్ద పొరపాటు ఇదే.. నాన్స్టిక్ గిన్నెలపై ఇలా చేస్తే ఏమవుతుందో తెలుసా?
వంటగదిలో ఎంత జాగ్రత్తగా ఉన్నా ఎప్పుడో ఒకసారి నాన్స్టిక్ పాన్ మాడిపోవడం, దానిపై నల్లటి మొండి మచ్చలు పడటం సాధారణమే. అయితే ఆ మచ్చలను వదిలించడానికి గంటల తరబడి తోమి తోమి చేతులు నొప్పులు తెచ్చుకుంటున్నారా? ఇంట్లోని బేకింగ్ సోడా, వెనిగర్ కలిపి వాడితే పాన్ మెరిసిపోతుందని ఇంటర్నెట్లో వచ్చే చిట్కాలను నమ్మి మోసపోతున్నారా? అయితే అసలు విషయాలు తెలుసుకోండి..
ఇప్పుడు ప్రతి ఇంట్లో నాన్ స్టిక్ పాత్రల వాడకం పెరిగిపోయింది. తక్కువ నూనెతో ఆరోగ్యకరమైన వంటకాలు చేసుకోవడానికి ఇది ఎంతో ఉపయోగపడుతుంది. అయితే వంట చేసేటప్పుడు కాస్త అజాగ్రత్తగా ఉన్నా లేదా మంట ఎక్కువైనా పాన్ మాడిపోయి, దానిపై మొండి నల్లటి మచ్చలు ఏర్పడటం సర్వసాధారణం. ఇలా మాడిపోయిన పాన్పై పట్టిన నల్లటి పొరలను శుభ్రం చేయడం వంటగదిలోని అత్యంత కష్టమైన పనులలో ఒకటి. చాలామంది దీనికి పరిష్కారంగా బేకింగ్ సోడా, వెనిగర్ వాడాలని చెప్తుంటారు. కానీ ఆచరణలో అవి సరిగ్గా పనిచేయవు. అసలు ఆ చిట్కా ఎందుకు ఫెయిల్ అవుతుంది? నాన్స్టిక్ కోటింగ్ దెబ్బతినకుండా పాత్రలను తిరిగి కొత్తదానిలా ఎలా మెరిపించాలి? అనేది తెలుసుకుందాం..
బేకింగ్ సోడా – వెనిగర్ చిట్కా ఎందుకు పనిచేయదు?
సోషల్ మీడియాలో ఎక్కడ చూసినా మొండి మచ్చలకు బేకింగ్ సోడా, వెనిగర్ మిశ్రమాన్ని వాడమని సలహాలు కనిపిస్తుంటాయి. అయితే శాస్త్రీయంగా చూస్తే ఇవి రెండూ కలిసినప్పుడు ఒకదానికొకటి తటస్థం చేసుకుంటాయి. బేకింగ్ సోడా అనేది క్షారం, వెనిగర్ అనేది ఆమ్లం. ఇవి రెండూ కలవగానే నురుగు వచ్చి నీరు, ఉప్పుగా మారిపోతాయి. ఈ చర్య వల్ల నురుగు రావడం చూసి మచ్చలు వదులుతున్నాయని భావిస్తారు కానీ, నిజానికి అక్కడ మాడిపోయిన నూనె, జిడ్డు పొరలను తొలగించే శక్తివంతమైన ఏజెంట్ ఏదీ మిగలదు. అందుకే కాలిన గాయాల గుర్తులను తొలగించడానికి ఇది సరైన పద్ధతి కాదు.
వేడి నీరు – డిష్వాషింగ్ లిక్విడ్
మాడిపోయిన నాన్స్టిక్ పాత్రలను శుభ్రం చేయడానికి వేడి నీరు, డిష్వాషింగ్ లిక్విడ్ మిశ్రమమే అత్యంత ప్రభావవంతమైన సాల్వెంట్ అని సైన్స్ చెబుతోంది. నాన్స్టిక్ కోటింగ్కు ఎలాంటి హాని కలగకుండా మచ్చలను తొలగించే నాలుగు సులువైన దశలు ఇవిగో..
గోరువెచ్చని నీటిలో నానబెట్టడం
మాడిపోయిన గిన్నెలో ముందుగా గోరువెచ్చని నీటిని పోసి కొంతసేపు అలానే వదిలేయండి. వేడి నీరు మాడిపోయిన ఆహార వ్యర్థాలలోకి ఇంకి, పాత్ర ఉపరితలం నుంచి వాటిని కాస్త సడలించేలా చేస్తుంది.
డిష్వాషింగ్ లిక్విడ్ జోడించడం
నానబెట్టిన నీటిలో మీరు రోజూ వాడే లిక్విడ్ కొన్ని చుక్కలు కలపండి. గిన్నెను కలపకుండా మరికొంత సేపు అలానే ఉంచండి. డిష్ సోప్లోని రసాయనాలు మాడిపోయిన జిడ్డును విచ్ఛిన్నం చేయడం ప్రారంభిస్తాయి.
మెల్లగా మరిగించడం
ఇప్పుడు ఆ పాత్రను నీటితో సహా పొయ్యి మీద ఉంచి, మెల్లగా మరిగించండి. వేడి నీటి ఉష్ణోగ్రత మరియు డిష్వాషింగ్ లిక్విడ్లోని సర్ఫ్యాక్టెంట్లు కలిసి పనిచేసి, పాన్కు మొండిగా పట్టుకున్న నల్లటి కాలిన పొరను చాలా వేగంగా మెత్తబరుస్తాయి.
చల్లారాక స్పాంజితో సులువుగా రుద్దడం
మరిగిన తర్వాత పాత్రను వేడి మీద నుండి దించి, నీరు చల్లారే వరకు నిరీక్షించండి. నీరు సాధారణ ఉష్ణోగ్రతకు వచ్చాక, సాధారణ మెత్తని స్పాంజ్తో మెల్లగా తుడిస్తే, ఆ నల్లటి మచ్చలు ఎటువంటి కష్టం లేకుండా సులువుగా ఊడిపోతాయి.
నాన్స్టిక్ పాత్రలు వాడేటప్పుడు చేయకూడని పొరపాట్లు
నాన్స్టిక్ వస్తువులను సరిగ్గా నిర్వహించకపోతే అవి త్వరగా పాడవుతాయి. మీ పాన్ ఆయుష్షు పెరగడానికి ఈ జాగ్రత్తలు తప్పనిసరి.
- స్టీల్ స్క్రబ్బర్లు వాడొద్దు: నల్లటి మచ్చలు ఉన్నాయని గట్టి స్టీల్ వైర్ స్క్రబ్బర్లతో తోమితే, పాన్ పై ఉండే టెఫ్లాన్ కోటింగ్ ఊడిపోయి.. ఆ రసాయనాలు ఆహారంలో కలిసే ప్రమాదం ఉంది.
- వేడి పాన్ను చల్లటి నీటిలో పెట్టొద్దు: వంట పూర్తయిన వెంటనే వేడిగా ఉన్న పాన్ను చల్లటి నీటి కింద ఉంచకూడదు. ఉష్ణోగ్రత మార్పు వల్ల పాన్ వంకర్లు తిరిగే అవకాశం ఉంది.
- మెటల్ గరిటెలు నిషిద్ధం: స్టీల్, ఇనుప గరిటెల కంటే చెక్క లేదా సిలికాన్ (గరిటెలు వాడటం వల్ల నాన్స్టిక్ పొరపై గీతలు పడకుండా ఉంటాయి.
- అధిక మంటపై ఖాళీగా వేడి చేయవద్దు: పాన్లో ఏమీ లేకుండా ఎక్కువ మంటపై వేడి చేస్తే నాన్స్టిక్ కోటింగ్ దెబ్బతిని విషపూరితమైన పొగలు విడుదలవుతాయి.