మీ జేబులో జిమ్ కోచ్: ఫిట్‌నెస్ కోసం స్మార్ట్‌ఫోన్‌ ఎలా ఉపయోగించాలో తెలుసా?

జిమ్ కోచ్, డైటీషియన్ కోసం వెతుకుతున్నారా? మీ జేబులో ఉండే స్మార్ట్‌ఫోనే మీకు సరైన మార్గదర్శి! మీ స్మార్ట్‌ఫోన్ కేవలం చాటింగ్, బ్రౌజింగ్ కోసం మాత్రమే కాదు, అది మీ వ్యక్తిగత హెల్త్ కోచ్ అని మీకు తెలుసా? ఫిట్‌నెస్ ప్రయాణాన్ని సులభతరం చేస్తూ, ఆహారం, వ్యాయామం, నిద్రను ట్రాక్ చేసే స్మార్ట్‌ఫోన్ అద్భుతమైన ఫీచర్ల గురించి వివరంగా తెలుసుకుందాం!

స్మార్ట్‌ఫోన్​తో ఫిట్‌నెస్ ప్రయాణం ..

• యాక్టివిటీ ట్రాకింగ్- స్మార్ట్‌ఫోన్‌లోని యాక్సిలరోమీటర్ సెన్సార్‌ ద్వారా మనం నడవడం, మెట్లు ఎక్కడం, పరిగెత్తడం వంటి పనులను ఫోన్ గుర్తిస్తుంది. ఇది మనం ప్రయాణించిన దూరం, అడుగుల సంఖ్య, క్యాలరీల ఖర్చు, యాక్టివ్ టైమ్ వంటి డేటాను మనకు అర్థమయ్యేలా వివరిస్తుంది.
• పర్సనల్ వర్కవుట్- మీ శరీర తత్వం, బరువు, ఎత్తు, ఆరోగ్య లక్ష్యాలను బట్టి, మీకు సరిపోయే వ్యాయామాలను రూపొందించే డిజిటల్ వ్యవస్థగా ఫోన్ పనిచేస్తుంది. ఇది మీ సామర్థ్యాన్ని బట్టి వ్యాయామాలను సూచిస్తూ, ఒక కోచ్‌లా మిమ్మల్ని గైడ్ చేస్తుంది.
• డైట్ ట్రాకింగ్- మనం రోజువారీ తీసుకునే అల్పాహారం, లంచ్, స్నాక్స్, డిన్నర్‌లో ఉండే క్యాలరీలు, మాక్రో న్యూట్రియెంట్స్‌ను ఇది విశ్లేషిస్తుంది. దీనివల్ల మనం ‘మైండ్‌ఫుల్ ఈటింగ్’ అలవాటు చేసుకుంటాం.
• స్లీప్ అనాలసిస్- ఆరోగ్యకరమైన జీవితానికి నాణ్యమైన నిద్ర చాలా ముఖ్యం. రాత్రి పడుకున్నప్పటి నుంచి ఉదయం లేచే వరకు మీ శరీరం ఏ స్థితిలో ఉంది, ఎంతసేపు గాఢ నిద్రలో ఉన్నారో, ఎన్నిసార్లు మెలకువ వచ్చిందో విశ్లేషించి ఫోన్ డేటాను అందిస్తుంది.

పర్యవేక్షించడం

ఏ పనిలోనైనా విజయం సాధించాలంటే మనం ఎంతవరకు సాధించామో తెలుసుకోవడం ముఖ్యం. ఫిట్‌నెస్ ప్రయాణంలో తొలి రోజు నుంచి నేటి వరకు శరీరంలో, సామర్థ్యంలో వచ్చిన మార్పులను గమనించడం అవసరం. ఫోన్‌లోని యాప్‌లు బీఎంఐ (BMI), వీక్లీ మరియు మంత్లీ సమ్మరీల ద్వారా మీ ఫిట్‌నెస్ ప్రగతిని అంచనా వేస్తాయి.

మన ఆరోగ్య లక్ష్యాలను చేరుకోవడానికి స్మార్ట్‌ఫోన్ ఒక గొప్ప సాధనం. మీరు ఏం తినాలో, ఎంతసేపు వ్యాయామం చేయాలో, ఎప్పుడు నిద్రపోవాలో కూడా స్మార్ట్‌ఫోన్ డిసైడ్ చేస్తుంది. క్రమశిక్షణతో కూడిన ఈ డిజిటల్ పద్ధతులను అనుసరిస్తూ, మీ ఆరోగ్య ప్రయాణాన్ని ఈరోజే మొదలుపెట్టండి. ఆరోగ్యకరమైన, చురుకైన జీవనశైలిని సొంతం చేసుకోండి!