ఆ ఒక్కటే అందరినీ భయపెడుతోందా? తాజా స్టడీలో షాకింగ్ విషయాలు
ఆర్టిఫిషియల్ ఇంటెలిజెన్స్ (AI) సాంకేతికత ప్రపంచవ్యాప్తంగా వేగంగా విస్తరిస్తోంది. అయితే, ఈ వేగం ఎంతలా ఉందో, అంతకు మించి ఉద్యోగుల్లో భయాందోళనలు వ్యక్తమవుతున్నాయి. రాయిటర్స్/ఇప్సోస్ నిర్వహించిన తాజా సర్వే ప్రకారం, 53 శాతం మంది అమెరికన్లు ఏఐ వల్ల తమ ఉద్యోగాలకు గండం ఉందని, తమ కుటుంబ సభ్యుల ఉపాధికి ముప్పు వాటిల్లుతుందని తీవ్ర ఆందోళన చెందుతున్నారు. వయస్సు, విద్యార్హతలతో సంబంధం లేకుండా ఈ అభద్రతా భావం సర్వత్రా కనిపిస్తోంది.
పెద్ద పెద్ద టెక్ కంపెనీలు తమ కార్యకలాపాలను ఏఐ ప్రాజెక్టులకు అనుగుణంగా మార్చుకుంటూ, భారీ స్థాయిలో ఉద్యోగాల కోత విధిస్తున్నాయి. ‘ఇంటూయిట్’ వంటి దిగ్గజ సంస్థలు తమ వర్క్ఫోర్స్ను గణనీయంగా తగ్గించుకోవడం ఈ భయాలకు ఆజ్యం పోస్తోంది. గూగుల్ మాజీ సీఈఓ ఎరిక్ స్మిత్ వంటి మేధావులు ఏఐ భవిష్యత్తు గురించి మాట్లాడుతుంటే, విద్యార్థులు కూడా తమ ఉపాధిని దృష్టిలో ఉంచుకుని నిరసనలు తెలుపుతున్నారు. వినోదం, రాజకీయ ప్రచారం, చివరికి యుద్ధ రంగంలోనూ ఏఐ దుర్వినియోగం కావడంపై ఆధ్యాత్మిక గురువులు సైతం ఆందోళన వ్యక్తం చేస్తున్నారు.
రాజకీయ దృక్పథాలు
ఏఐ ప్రభావంపై రాజకీయంగానూ భిన్నమైన అభిప్రాయాలు వ్యక్తమవుతున్నాయి. డెమొక్రాట్ మద్దతుదారుల్లో 61 శాతం మంది తమ హోమ్ బడ్జెట్ను ఏఐ దెబ్బతీస్తుందని భయపడుతుండగా, రిపబ్లికన్లలో ఈ ఆందోళన కొంత తక్కువ (47%)గా ఉంది. అయితే, జెన్నిఫర్ షాల్హౌబ్ వంటి ఫ్రీలాన్స్ రైటర్ల అనుభవాలు మనిషిని కలవరపెడుతున్నాయి. “నాణ్యత కంటే తక్కువ ఖర్చుకే కంపెనీలు ప్రాధాన్యత ఇస్తున్నాయి, అందుకే మనుషుల స్థానాన్ని ఏఐ సులభంగా ఆక్రమిస్తోంది” అని ఆమె ఆవేదన వ్యక్తం చేయడం నేటి కార్మిక వర్గపు వాస్తవ పరిస్థితిని ప్రతిబింబిస్తోంది.
టెక్నాలజీ వెనుక ఉన్న సవాళ్లు
2022లో ‘చాట్జీపీటీ’ రాకతో మొదలైన ఈ ఏఐ విప్లవం, నేడు కోడింగ్ అసిస్టెన్స్ నుంచి బిజినెస్ ప్లానింగ్ వరకు అన్ని రంగాలను శాసిస్తోంది. అయితే, ప్రస్తుతం ఈ టూల్స్ను ఎక్కువగా విద్యావంతులే వాడుతున్నారు. కాలేజీ గ్రాడ్యుయేట్లలో 50 శాతం మంది ఏఐని క్రమం తప్పకుండా వాడుతుంటే, సామాన్య జనాభాలో కేవలం 40 శాతం మంది మాత్రమే దీనిని వినియోగిస్తున్నారు.
వ్యాపారాలు సులభతరం అవుతున్నాయన్నది నిజమే అయినా, సగటు కార్మికుడికి మాత్రం ఏఐ ఒక ‘ఉద్యోగ హంతకి’లా కనిపిస్తోంది. సాంకేతికత అభివృద్ధితో పాటు, మనుషుల నైపుణ్యాలకు తగ్గట్టుగా ఉపాధి అవకాశాలు కూడా పెరగాల్సిన అవసరం ఉంది. లేనిపక్షంలో, ఈ ఏఐ ప్రయాణం సామాన్యుడికి గుండెల్లో రైళ్లు పరిగెత్తించేలాగే ఉంటుంది. ఈ మార్పులను మనం ఎంతవరకు సమర్థవంతంగా ఎదుర్కోగలమనేదే ఇప్పుడు కోట్లాది మంది ముందున్న అతిపెద్ద ప్రశ్న!