జిగురు అస్సలు ఉండదు.. పెరుగుతో బెండకాయ కూర ఇలా చేస్తే రుచి అదిరిపోతుంది!
ఈ ప్రత్యేకమైన బెండకాయ కూరను ఇంట్లో సులభంగా తయారుచేసుకోండి. బెండకాయలను పెరుగుతో మ్యారినేట్ చేయడం వల్ల జిగురు లేకుండా అద్భుతమైన రుచి వస్తుంది. అన్నం, చపాతీ, రోటీలలోకి సరైన ఎంపిక. ఈ స్పెషల్ బెండకాయ వంటకాన్ని ఈ కింది విధంగా చేస్తే రుచి అదిరిపోతుంది..
Updated on: Sep 28, 2026 | 7:04 PM
బెండకాయ కూర అంటే జిగురు సమస్య, రొటీన్ రుచి అనే భావన చాలామందిలో ఉంటుంది. అయితే, ఈ ప్రత్యేకమైన వంటకం ఆ అభిప్రాయాన్ని మార్చేస్తుంది. పెరుగును ఉపయోగించి, వినూత్న పద్ధతిలో తయారుచేసే ఈ బెండకాయ కూర చికెన్, మటన్ కూరలను సైతం పక్కనపెట్టేంత రుచిగా ఉంటుంది. అన్నం, చపాతీ, రోటీలలోకి అద్భుతంగా సరిపోయే ఈ జిగురు లేని రుచికరమైన బెండకాయ వంటకాన్ని ఎలా తయారుచేయాలో ఇప్పుడు తెలుసుకుందాం.
కావలసిన పదార్థాలు.. బెండకాయలు: 250 గ్రాములు (కొంచెం పెద్ద ముక్కలుగా కట్ చేసుకోవాలి), సాల్ట్: రుచికి సరిపడినంత, పసుపు: 1/4 టీ స్పూన్, కారం: 1 టేబుల్ స్పూన్ (లేదా రుచికి తగినంత), జీలకర్ర పొడి: 1/4 టీ స్పూన్, గరం మసాలా పొడి: 1/2 టీ స్పూన్, వెల్లుల్లి రెబ్బలు: 5-6 (పొట్టు తీసి), అల్లం వెల్లుల్లి పేస్ట్: 1 టేబుల్ స్పూన్, పెరుగు: 1 పెద్ద చెంచాడు, కరివేపాకు: 2 రెమ్మలు, పచ్చిమిర్చి: 3 (మధ్యలో గాటు పెట్టుకోవాలి), నూనె: 2 టేబుల్ స్పూన్లు, ఆవాలు: 1/4 టీ స్పూన్, జీలకర్ర: 1/4 టీ స్పూన్, ఉల్లిపాయ: 1 పెద్దది (సన్నగా, పొడవుగా కట్ చేసుకోవాలి), టమాటా: 1 పెద్దది (సన్నగా, పొడవుగా కట్ చేసుకోవాలి), కొత్తిమీర: కొద్దిగా (సన్నగా తరిగినది)
ముందుగా పావు కేజీ బెండకాయలను శుభ్రంగా కడిగి, తొడిమెలు తీసేసి, పులుసుకి కట్ చేసినంత పెద్ద ముక్కలుగా కట్ చేసుకోవాలి. చిన్న ముక్కలుగా కట్ చేయకూడదు. ఒక ప్లేట్లోకి తీసుకున్న బెండకాయ ముక్కలకు రుచికి సరిపడినంత సాల్ట్, పావు టీ స్పూన్ పసుపు, ఒక టేబుల్ స్పూన్ కారం, పావు టీ స్పూన్ జీలకర్ర పొడి, అర టీ స్పూన్ గరం మసాలా పొడి, పొట్టు తీసిన ఐదు నుండి ఆరు వెల్లుల్లి రెబ్బలు, ఒక టేబుల్ స్పూన్ అల్లం వెల్లుల్లి పేస్ట్, ఒక పెద్ద చెంచాడు పెరుగు, రెండు రెమ్మల కరివేపాకు, గాటు పెట్టుకున్న మూడు పచ్చిమిర్చి, రెండు టేబుల్ స్పూన్ల నూనె వేసి బాగా కలపాలి. బెండకాయ ముక్కలకు మసాలాలన్నీ బాగా పట్టేలా కలిపి, మూత పెట్టి పది నిమిషాలు పక్కన పెట్టాలి. పెరుగు వేయడం వల్ల బెండకాయలోని జిగురు తగ్గుతుంది, రుచి పెరుగుతుంది.
ఈ లోపల స్టవ్ మీద ఒక పాన్ పెట్టి నూనె వేడి చేయాలి. నూనె వేడయ్యాక పావు టీ స్పూన్ ఆవాలు, పావు టీ స్పూన్ జీలకర్ర వేసి చిటపటమన్న తర్వాత, సన్నగా, పొడవుగా కట్ చేసుకున్న ఒక పెద్ద ఉల్లిపాయ ముక్కలు, కొద్దిగా కరివేపాకు వేసి బాగా కలిపి వేయించాలి. ఉల్లిపాయ ముక్కలు మంచి బ్రౌన్ కలర్ వచ్చే వరకు వేయించుకోవాలి. ఉల్లిపాయలు బాగా వేగిన తర్వాత, ముందుగా మ్యారినేట్ చేసి పెట్టుకున్న బెండకాయ ముక్కల మిశ్రమాన్ని తాలింపులో వేసి బాగా కలపాలి. మూత పెట్టి, మధ్యమధ్యలో కలుపుకుంటూ బెండకాయ ముక్కలు మెత్తగా అయ్యే వరకు మగ్గించుకోవాలి. పెరుగు వేసినందువల్ల బెండకాయ జిగురు లేకుండా మెత్తగా మగ్గుతుంది.
బెండకాయ ముక్కలు పూర్తిగా మెత్తబడిన తర్వాత, సన్నగా పొడవుగా కట్ చేసుకున్న ఒక పెద్ద టమాటా ముక్కలను వేయాలి. మ్యారినేట్ చేసిన ప్లేట్లో మిగిలిన మసాలాకు కొద్దిగా నీళ్లు పోసి ఆ నీటిని కూడా కూరలో కలపాలి. ఎక్కువ నీళ్లు వేయకూడదు, కూర రుచి మారిపోతుంది. సన్నగా తరిగిన కొత్తిమీర వేసి, అంతా బాగా కలిపి, చిన్న మంటపై మూత పెట్టి రెండు నుండి మూడు నిమిషాల పాటు ఉడికించాలి. నూనె పైకి తేలి, కూర దగ్గరపడిన తర్వాత స్టవ్ ఆఫ్ చేయాలి. అంతే, ఎంతో రుచికరమైన, జిగురు లేని పెరుగుతో చేసిన బెండకాయ కూర సిద్ధంగా ఉంది. దీనిని వేడి వేడి అన్నంలోకి, చపాతీలోకి లేదా రోటీలలోకి సర్వ్ చేసుకోవచ్చు. సన్నగా తరిగిన కొత్తిమీరతో గార్నిష్ చేస్తే మరింత ఆకర్షణీయంగా ఉంటుంది. ఈ వినూత్నమైన బెండకాయ వంటకం మీ భోజనానికి కొత్త రుచిని అందిస్తుంది. తప్పకుండా ప్రయత్నించి..
