జీతం రాగానే అయిపోతోందా? ద్రవ్యోల్బణంలో డబ్బు ఆదా చేయడానికి స్మార్ట్ టిప్స్!
మీ జీతం రాగానే మాయమైపోతోందా..? ద్రవ్యోల్బణం వల్ల మీ ఖర్చులు పెరిగాయా? మీ డబ్బు ఎక్కడ ఖర్చవుతుందో, అత్యవసర నిధిని ఎలా ఏర్పాటు చేసుకోవాలో, మీ అదనపు ఆదాయాన్ని పెంచుకోవడానికి ఉన్న సులభమైన మార్గాలు ఏమిటో తప్పక తెలుసుకోవాలి. పెరుగుతున్న ద్రవ్యోల్బణంలో డబ్బు ఆదా చేయడం, ఆదాయాన్ని పెంచుకోవడం ఎలాగో ఇక్కడ చూద్దాం..
నేటి కాలంలో నిత్యావసర వస్తువుల ధరలు, పెట్రోల్, డీజిల్ రేట్లు, స్కూల్ ఫీజులు నిరంతరం పెరుగుతున్నాయి. కానీ, ఆదాయం మాత్రం అంతే ఉంటోంది. దీనివల్ల నెల ఆఖరు వచ్చేసరికి చేతిలో రూపాయి కూడా మిగలని పరిస్థితి ఏర్పడుతోంది. ఈ ద్రవ్యోల్బణ సమయంలో ఆర్థికంగా నిలదొక్కుకోవడానికి కేవలం సంపాదించడం మాత్రమే సరిపోదు, తెలివిగా డబ్బును నిర్వహించడం కూడా నేర్చుకోవాలి.
1. ఖర్చులను ట్రాక్ చేయండి: మనలో చాలామందికి డబ్బు ఎక్కడ ఖర్చవుతుందో తెలియదు. ఆన్లైన్ షాపింగ్, వారాంతాల్లో బయట తినడం, ఓటీటీ సబ్స్క్రిప్షన్లు వంటి చిన్న చిన్న ఖర్చులు బడ్జెట్ను దెబ్బతీస్తాయి. అందుకే కనీసం ఒకటి రెండు నెలల పాటు ప్రతి రూపాయి ఖర్చును యూపీఐ (UPI) లేదా డైరీ ద్వారా నోట్ చేయండి. దీనివల్ల అనవసర ఖర్చులను తగ్గించుకోవచ్చు.
2. 20శాతం పొదుపు సూత్రం: ఆర్థిక నిపుణుల అభిప్రాయం ప్రకారం, మీ నెలవారీ ఆదాయంలో కనీసం 20 శాతం భాగాన్ని పొదుపు లేదా పెట్టుబడి కోసం కేటాయించాలి. కేవలం బ్యాంకు ఖాతాలో డబ్బు ఉంచడం వల్ల పెద్దగా ప్రయోజనం ఉండదు. కాబట్టి, ఎస్ఐపీ (SIP), పీపీఎఫ్ (PPF), లేదా ఆర్డీ (RD) వంటి పథకాలలో పెట్టుబడి పెట్టడం అలవాటు చేసుకోండి.
3. ఎమర్జెన్సీ ఫండ్, హెల్త్ ఇన్సూరెన్స్: ఉద్యోగం కోల్పోవడం, అనారోగ్యం లేదా అనుకోని ప్రమాదాలు జరిగినప్పుడు ఆర్థికంగా ఇబ్బంది పడకుండా ఉండటానికి కనీసం 3 నుండి 6 నెలల ఖర్చులకు సరిపడా ఎమర్జెన్సీ ఫండ్ సిద్ధంగా ఉంచుకోవాలి. అలాగే కుటుంబానికి హెల్త్ ఇన్సూరెన్స్ తీసుకోవడం నేడు తప్పనిసరి.
4. అదనపు ఆదాయ వనరులు: ప్రస్తుత కాలంలో కేవలం ఒకే ఆదాయ వనరుపై ఆధారపడటం సురక్షితం కాదు. మీ నైపుణ్యాలను బట్టి ఆన్లైన్ ట్యూషన్లు, ఫ్రీలాన్సింగ్, యూట్యూబ్, బ్లాగింగ్ లేదా చిన్న ఆన్లైన్ బిజినెస్ ద్వారా అదనపు ఆదాయాన్ని (Side Income) సంపాదించడానికి ప్రయత్నించండి.
ధరల పెరుగుదలను మనం నియంత్రించలేము. కానీ, మన ఖర్చులను నియంత్రించుకోవడం, తెలివిగా పెట్టుబడి పెట్టడం ద్వారా భవిష్యత్తును సురక్షితం చేసుకోవచ్చు. ఖర్చులను తగ్గించుకుంటూ, ఆదాయాన్ని పెంచుకోవడమే నిజమైన స్మార్ట్ ఫైనాన్షియల్ లైఫ్.
మరిన్ని లైఫ్ స్టైల్ న్యూస్ కోసం క్లిక్ చేయండి..