గురకకు ఇలా గుడ్ బై చెప్పండి.. ఈ సింపుల్ చిట్కాలతో హాయిగా నిద్రపోండి..
మీ గురక వల్ల పక్కన ఉన్నవారి నిద్ర పాడు కావడమే కాదు.. మీ ప్రాణాలకే ముప్పు పొంచి ఉందని మీకు తెలుసా? చాలా మంది గురకను ఒక సాధారణ విషయంగానో లేదా గాఢ నిద్రకు సంకేతంగానో భావిస్తారు. కానీ వైద్య నిపుణుల ప్రకారం.. గురక అనేది మీ శరీరం ఇస్తున్న ఒక ప్రమాద హెచ్చరిక. అసలు గురక ఎందుకు వస్తుంది? అనేది తెలుసుకుందాం..
గురక.. చాలా ఇళ్లలో ఇది ఒక సాధారణ విషయంగా కనిపిస్తుంది. కానీ పక్కన పడుకున్న వారి నిద్ర పాడుచేయడమే కాకుండా గురక పెట్టే వ్యక్తి ఆరోగ్యానికి కూడా ఇది ఒక పెద్ద ముప్పు అని మీకు తెలుసా? నిరంతరాయంగా గురక రావడం అనేది మీ నిద్ర నాణ్యతను దెబ్బతీసి, పగటిపూట అలసట, ఏకాగ్రత లోపానికి దారితీస్తుందని వైద్య నిపుణులు హెచ్చరిస్తున్నారు. మనం నిద్రపోతున్నప్పుడు ముక్కు లేదా నోటిలోని వాయు మార్గాలు పాక్షికంగా మూసుకుపోయినప్పుడు గాలి ప్రవాహానికి అడ్డంకి ఏర్పడుతుంది. ఆ సమయంలో గొంతులోని మెత్తని కణజాలాలు కంపించడం వల్ల గురక శబ్దం వస్తుంది. ఊబకాయం, ముక్కు దిబ్బడ, టాన్సిల్స్ వాపు, తీవ్రమైన అలసట, ఒత్తిడి కారణం కావచ్చు. నిద్రపోయే ముందు మద్యం సేవించడం, క్రమరహిత నిద్ర వేళలు కూడా దీనికి కారణమవుతాయి.
స్లీప్ అప్నియా – ఒక ప్రమాదకర సంకేతం..
అధికంగా గురక పెట్టడం అనేది ఒక్కోసారి అబ్స్ట్రక్టివ్ స్లీప్ అప్నియా అనే తీవ్రమైన నిద్ర రుగ్మతకు సంకేతం కావచ్చు. ఈ స్థితిలో నిద్రలో శ్వాస తాత్కాలికంగా ఆగిపోతుంది. ఉదయాన్నే నోరు పొడిబారడం, పగటిపూట విపరీతమైన నిద్ర రావడం, నిద్రలో ఆయాసం వంటి లక్షణాలు ఉంటే వెంటనే వైద్యుడిని సంప్రదించడం తప్పనిసరి.
గురకను తగ్గించుకోవడానికి 5 సులభమైన మార్గాలు
మీ జీవనశైలిలో చిన్న చిన్న మార్పులు చేసుకోవడం ద్వారా ఈ సమస్య నుండి ఉపశమనం పొందవచ్చు:
నిద్ర భంగిమ మార్చండి: వెల్లకిలా పడుకోవడం వల్ల శ్వాసనాళాలు మూసుకుపోయే అవకాశం ఎక్కువ. కాబట్టి ఎప్పుడూ పక్కకు తిరిగి పడుకోవడం అలవాటు చేసుకోండి.
తల కింద దిండు: నిద్రపోయేటప్పుడు తలను కొద్దిగా పైకి ఎత్తి ఉంచేలా దిండును అమర్చుకోవడం వల్ల శ్వాస మార్గం సాఫీగా ఉంటుంది.
హైడ్రేషన్: రోజంతా తగినంత నీరు తాగడం వల్ల గొంతు, ముక్కులోని కణజాలాలు పొడిబారకుండా ఉండి గురక తగ్గుతుంది.
శ్వాస వ్యాయామాలు: క్రమం తప్పకుండా ప్రాణాయామం లేదా గొంతు కండరాలను బలపరిచే వ్యాయామాలు చేయడం వల్ల మంచి ఫలితం ఉంటుంది.
సరైన సమయపాలన: ప్రతిరోజూ ఒకే సమయానికి నిద్రపోవడం వల్ల శరీరానికి సరైన విశ్రాంతి లభిస్తుంది.
నిద్రపోయే ముందు వీటిని మానుకోండి..
మద్యం – కెఫీన్: పడుకునే ముందు కాఫీ, టీ లేదా మద్యం సేవించడం వల్ల గొంతు కండరాలు అతిగా రిలాక్స్ అయ్యి గురక పెరుగుతుంది.
ఆలస్యంగా భోజనం: రాత్రిపూట ఆలస్యంగా భారీ భోజనం చేయడం శ్వాస ప్రక్రియపై ఒత్తిడి పెంచుతుంది. పడుకోవడానికి కనీసం 2-3 గంటల ముందే భోజనం ముగించాలి.
గురకను కేవలం ఒక అలవాటుగా కాకుండా, శరీర ఇచ్చే హెచ్చరికగా గుర్తించండి. పైన పేర్కొన్న జాగ్రత్తలు పాటించినా సమస్య తగ్గకపోతే, స్లీప్ స్టడీ (Sleep Study) చేయించుకోవడం ఉత్తమం.