Kitchen Hacks: కంపెనీ స్టిక్కర్లు తీసేయడానికి సింపుల్ ట్రిక్స్ మీకోసం..!
కొత్తగా కొన్న పాత్రలపై కంపెనీలు వేసే స్టిక్కర్లు, ట్యాగ్ లు తొలగించడం చాలా కష్టంగా అనిపిస్తుంది. అవి మిగిల్చే జిగురు, మరకలు మనం ఎంత రుద్దినా పోకుండా ఇబ్బంది పెడతాయి. కానీ కొన్ని ఇంటి చిట్కాలను పాటిస్తే.. అవి సులభంగా పోతాయి.
కొత్తగా కొన్న పాత్రలపై కంపెనీలు లేదా షాపులు వేసే ధర ట్యాగ్ లు, స్టిక్కర్లు మనకు చిరాకు తెప్పిస్తుంటాయి. వాటిని తీసేయాలంటే కొన్నిసార్లు చాలా కష్టపడాల్సి వస్తుంది. ముఖ్యంగా ఆ స్టిక్కర్ అంటుకుపోయిన జిగురు పాత్రపై మురికిలా ఉండిపోతుంది. కానీ కొన్ని సులభమైన పద్ధతులు పాటిస్తే ఈ సమస్యకు పరిష్కారం దొరుకుతుంది.
ఆయిల్ తో ఈజీగా తొలగించండి..
స్టిక్కర్లను కాస్త తడిపి.. వదులుగా చేయడానికి నూనె చాలా ఉపయోగపడుతుంది. కొబ్బరి నూనె, ఆవ నూనె, బేబీ ఆయిల్లో చిన్న దూదిని ముంచి స్టిక్కర్పై రాయండి. దాన్ని 15 నిమిషాలు అలాగే ఉంచండి. తర్వాత తడిగా ఉన్న బట్టతో మెల్లగా తుడవండి. గాజు, ప్లాస్టిక్, స్టీల్ లాంటి వాటిపై ఈ పద్ధతి బాగా పని చేస్తుంది.
బేకింగ్ సోడా, ఆయిల్ మిశ్రమం
ఒక టీస్పూన్ బేకింగ్ సోడాలో రెండు చుక్కల కొబ్బరి నూనె కలిపి ఒక పేస్ట్ తయారు చేయండి. ఈ మిశ్రమాన్ని స్టిక్కర్ ఉన్న చోట అప్లై చేసి 10 నిమిషాలు ఉంచండి. తర్వాత ఒక మెత్తని బట్ట లేదా స్పాంజ్ తో శుభ్రంగా తుడవండి. ఈ పద్ధతిలో స్టిక్కర్ మాత్రమే కాదు.. దానికి అంటుకున్న మరకలు కూడా పోతాయి.
నిమ్మరసం, ఉప్పు
నిమ్మకాయ రసంలో కొద్దిగా ఉప్పు కలిపి స్టిక్కర్ ఉన్న చోట రాసి మెల్లగా తుడవండి. ఈ చిట్కా ముఖ్యంగా గాజు, స్టీల్ పాత్రలపై బాగా పని చేస్తుంది. నిమ్మలో ఉండే ఆమ్లం, ఉప్పులో ఉండే చిన్న రేణువులు స్టిక్కర్ జిగురును కరిగించడంలో సహాయపడతాయి.
మెటీరియల్ తో జాగ్రత్త
ఈ చిట్కాలు ఎంచుకున్న వస్తువుకు అనుగుణంగా వాడాలి. పాత్ర ఏ మెటీరియల్ తో చేసిందో చూసి మెత్తగా తుడవాలి లేదా మరింత జాగ్రత్త అవసరమవచ్చు. నూనె లేదా ఇతర పదార్థాలను వాడిన తర్వాత.. పాత్రను సబ్బుతో శుభ్రం చేయడం మర్చిపోవద్దు. ఇలా చేయడం వల్ల పాత్రలపై మిగిలే వాసన లేదా జిగురు పదార్థాలు తొలగిపోతాయి.