Natural Soap: ఖరీదైన సబ్బులకు గుడ్బై.. ఇంట్లోనే సహజంగా సబ్బు తయారీ ఇలా!
Homemade Soap: ఖరీదైన రసాయన సబ్బులకు గుడ్బై చెప్పి.. ఎటువంటి దుష్ప్రభావాలు లేకుండా ఇంట్లోనే సహజ పదార్థాలతో సబ్బు తయారు చేసుకోవచ్చు. మారుతున్న రుతువులు, వాతావరణ ప్రభావాల నుంచి చర్మాన్ని రక్షించుకోవడానికి ఈ హోమ్మేడ్ సబ్బు ఎంతో ఉపయుక్తంగా ఉంటుంది. రసాయనాలు లేని ఈ హోమ్మేడ్ సబ్బు సహజంగా మెరిసే, ఆరోగ్యకరమైన చర్మాన్ని పొందేందుకు మంచి ప్రత్యామ్నాయంగా చెప్పుకోవచ్చు.
Natural soap at home: మార్కెట్లో చర్మ సంరక్షణ కోసం అనేక రకాల సబ్బులు, ఫేస్వాష్లు అందుబాటులో ఉన్నాయి. అయితే ఖరీదైన బ్రాండెడ్ ఉత్పత్తులు ఉపయోగించిన తర్వాత కూడా కొందరికి చర్మం పొడిబారడం, దురద, అలెర్జీలు వంటి సమస్యలు ఎదురవుతున్నాయని ఫిర్యాదులు ఉన్నాయి. ముఖ్యంగా చర్మాన్ని తెల్లగా చేస్తామని ప్రచారం చేసే కొన్ని సబ్బుల్లో ఉండే రసాయనాలు చర్మానికి హాని కలిగించే అవకాశం ఉందని నిపుణులు హెచ్చరిస్తున్నారు. ఇలాంటి పరిస్థితుల్లో, ఎటువంటి దుష్ప్రభావాలు లేకుండా ఇంట్లోనే సహజ పదార్థాలతో సబ్బు తయారు చేసుకోవచ్చు. మారుతున్న రుతువులు, వాతావరణ ప్రభావాల నుంచి చర్మాన్ని రక్షించుకోవడానికి ఈ హోమ్మేడ్ సబ్బు ఎంతో ఉపయుక్తంగా ఉంటుంది.
ఇంట్లో సబ్బు తయారీకి కావాల్సిన పదార్థాలు ఇవే
బాదం లేదా కొబ్బరి నూనె – 2 నుంచి 3 టేబుల్ స్పూన్లు
గ్లిజరిన్ – 1 టేబుల్ స్పూన్
కలబంద జెల్ – 2 టేబుల్ స్పూన్లు
పసుపు – ½ టీస్పూన్
వేప ఆకులు – 8 నుంచి 10
గులాబీ రేకులు – ఒక గుప్పెడు
ముఖ్యమైన నూనెలు (టీ ట్రీ ఆయిల్ / లావెండర్ ఆయిల్) – సువాసన కోసం
సబ్బు బేస్ – సుమారు 250 గ్రాములు
తయారీ విధానం ఇలా ఉంటుంది
ముందుగా వేప ఆకులను మెత్తగా రుబ్బి పేస్ట్లా చేసి, ఒక కాటన్ గుడ్డలో వేసి రసం పిండాలి. అవసరమైతే వేప ఆకుల పొడిని కూడా ఉపయోగించవచ్చు. అలాగే గులాబీ రేకులను మెత్తగా రుబ్బి వాటి రసాన్ని తీసుకోవాలి లేదా రేకుల పొడిని ఉపయోగించవచ్చు.
ఇప్పుడు ఒక పాత్రలో నీటిని మరిగించి, డబుల్ బాయిలర్ పద్ధతిలో సబ్బు బేస్ను చిన్న ముక్కలుగా చేసి కరిగించాలి. కరిగిన సబ్బు బేస్లో ముందుగా గులాబీ రేకుల రసం లేదా పొడి, వేప ఆకుల రసం లేదా పొడి వేసి బాగా కలపాలి.ఆ తర్వాత కలబంద జెల్, బాదం లేదా కొబ్బరి నూనె, గ్లిజరిన్, పసుపు వేసి మిశ్రమం ముద్దలు కాకుండా బాగా కలపాలి. చివరగా మీకు నచ్చిన ముఖ్యమైన నూనెలను జోడించాలి. ఇది సబ్బుకు సహజమైన సువాసనను అందించడమే కాకుండా చర్మానికి కూడా మేలు చేస్తుంది.
తయారైన మిశ్రమాన్ని సిలికాన్ సబ్బు అచ్చుల్లో పోసి, కొన్ని గంటలు గట్టిపడేలా ఉంచాలి. సబ్బు పూర్తిగా సెట్ అయిన తర్వాత అచ్చు నుంచి తీస్తే ఉపయోగించడానికి సిద్ధంగా ఉంటుంది.
ఈ సహజ సబ్బు వల్ల లాభాలివే..
ఈ సబ్బులో ఉపయోగించే బాదం, కొబ్బరి నూనెలు చర్మానికి పోషణను అందిస్తాయి. కలబంద చర్మాన్ని హైడ్రేట్ చేస్తుంది, గ్లిజరిన్ చర్మాన్ని మృదువుగా ఉంచుతుంది. పసుపు చర్మ కాంతిని పెంచడంలో సహాయపడుతుండగా, వేప ఫంగల్ ఇన్ఫెక్షన్లను నివారించడంలో దోహదపడుతుంది. గులాబీ రేకులు చర్మాన్ని తాజాగా ఉంచుతాయి. అందుకే రసాయనాలు లేని ఈ హోమ్మేడ్ సబ్బు సహజంగా మెరిసే, ఆరోగ్యకరమైన చర్మాన్ని పొందేందుకు మంచి ప్రత్యామ్నాయంగా చెప్పుకోవచ్చు.
(Declaimer: ఈ వార్తలోని సమాచారం అందుబాటులోని వనరుల నుంచి సేకరించి పాఠకుల ఆసక్తి మేరకు అందించడం జరిగింది. దీనిపై సందేహాలుంటే సంబంధిత నిపుణులను సంప్రదించండి.)