లైఫ్స్టైల్లో మార్పులతో మూడేళ్లలో 72Kgల బరువు తగ్గిన డైటీషియన్.. ఆ ‘7 సీక్రెట్స్’!
బరువు తగ్గడం అనేది ఒక యజ్ఞం లాంటిది. చాలామంది ఉత్సాహంగా మొదలుపెట్టి, కఠినమైన నియమాలు పాటించలేక మధ్యలోనే వదిలేస్తుంటారు. కానీ, ఎటువంటి ఖరీదైన డైట్లు, జిమ్ వర్కౌట్లు లేకుండా కేవలం జీవనశైలిలో మార్పులు చేసుకుని ఏకంగా 72 కిలోల బరువు తగ్గింది ఓ మహిళ.
Emma Hooker Lost 72 Kg In 3 Years.jpg
మూడు సంవత్సరాల సుదీర్ఘ ప్రయాణంలో ప్రముఖ ఫిట్నెస్, పోషకాహార కోచ్ ఎమ్మా హుకర్ సాధించిన ఈ విజయం ఇప్పుడు లక్షలాది మందికి స్ఫూర్తినిస్తోంది. ఎమ్మా హుకర్ బరువు తగ్గడానికి ఎటువంటి అడ్డదారులు తొక్కలేదు. త్వరగా ఫలితాలు రావాలని శరీరాన్ని హింసించుకోలేదు. కేవలం సహజమైన, శాశ్వతమైన మార్పుల ద్వారా ఈ అద్భుతాన్ని సాధించింది. బరువు తగ్గాలనుకునే వారు తప్పనిసరిగా అనుసరించాల్సిన ఆ 7 సూత్రాలు ఏంటో తెలుసుకుందాం..
- చాలామంది ఒకేసారి గంటల తరబడి జిమ్ చేయడం, కేవలం సలాడ్లు తినడం వంటి పెద్ద మార్పులు చేస్తారు. కానీ ఎమ్మా అభిప్రాయం ప్రకారం, ప్రతిరోజూ తగినంత నీరు తాగడం, 15 నిమిషాల నడక, పంచదార తగ్గించడం వంటి చిన్న మార్పులతో మొదలుపెట్టాలి. ఇవి అలవాటుగా మారి దీర్ఘకాలిక ఫలితాలను ఇస్తాయి.
- తక్కువ తినడం వల్ల బరువు తగ్గుతామనేది అపోహ మాత్రమే. అలా చేయడం వల్ల మెటబాలిజం మందగిస్తుంది. ప్రతి భోజనంలో ప్రోటీన్ (గుడ్లు, పప్పులు, చికెన్) ఉండేలా చూసుకోవాలి. పండ్లు, కూరగాయలు, నట్స్ వంటి సమతుల్య ఆహారం మాత్రమే బరువును శాశ్వతంగా అదుపులో ఉంచుతుంది.
- బరువు తగ్గే జర్నీలో ఒంటరిగా కంటే ఒక పార్టనర్తో కలిసి పని చేయడం మంచిది. మీ ఫ్రెండ్ లేదా లైఫ్ పార్టనర్తో కలిసి వ్యాయామం చేయడం వల్ల ఒకరికొకరు స్ఫూర్తినిచ్చుకోవచ్చు.
- శరీరం కోలుకోవడానికి నిద్ర చాలా ముఖ్యం. వారానికి ఒక రోజు వ్యాయామానికి సెలవు ఇచ్చి శరీరానికి విశ్రాంతినివ్వాలి. రోజుకు 7-8 గంటల నిద్ర బరువు తగ్గడానికి పరోక్షంగా సహాయపడుతుంది.
- మీకు రన్నింగ్ ఇష్టం లేకపోతే బలవంతంగా చేయకండి. డ్యాన్స్, ఈత, సైక్లింగ్ లేదా యోగా.. మీకు ఏది ఇష్టమో దాన్నే ఎంచుకోండి. నచ్చిన పని చేస్తున్నప్పుడు ఒత్తిడి కలగదు, పైగా ఎక్కువ కాలం కొనసాగించగలరు.
- బరువు తగ్గడం అనేది నెమ్మదిగా జరిగే ప్రక్రియ. తూకం యంత్రంపై అంకెలు మారడం లేదని నిరాశ చెందకండి. క్రమం తప్పకుండా నియమాలు పాటించడం వల్ల శరీరంలో అంతర్గతంగా సానుకూల మార్పులు వస్తాయి.
- రోజుకు రెండు గంటలు జిమ్లో గడపనవసరం లేదు. కేవలం 20-30 నిమిషాలు ఏదో ఒక శారీరక శ్రమ చేసినా చాలు. సమయం లేనప్పుడు కనీసం 10 నిమిషాలైనా కేటాయించడం అలవాటు చేసుకోవాలి.
బరువు తగ్గడం అనేది కేవలం సౌందర్యం కోసం కాదు, అది మన ఆరోగ్యం కోసం. ఎమ్మా హుకర్ చెప్పిన ఈ సులభమైన చిట్కాలను నిపుణుల సలహాతో మీరు కూడా పాటిస్తే, ఆరోగ్యకరమైన రీతిలో బరువు తగ్గడం ఖాయం.
Follow Us