Mutton Sukka Recipe: మధురై స్పెషల్ మటన్ సుక్కా రెసిపీ.. అన్నం, చపాతీల్లోకి సూపర్ కాంబినేషన్
మాంసాహార ప్రియులకు మటన్ అంటేనే ఒక ప్రత్యేకమైన ఇష్టం. అందులోనూ వేడివేడి అన్నం లేదా పరోటాలోకి ఘాటుగా ఉండే మటన్ సుక్కా ఉంటే ఆ మజానే వేరు. సాధారణంగా మటన్ వండాలంటే ఎక్కువ సమయం, భారీగా మసాలాలు కావాలని చాలామంది భావిస్తారు. కానీ, పెద్దగా హడావిడి లేకుండా, ఇంట్లో ఉండే సాధారణ పదార్థాలతోనే అత్యంత రుచికరమైన మటన్ సుక్కాను కేవలం కొన్ని నిమిషాల్లో సిద్ధం చేసుకోవచ్చు.
Updated on: Feb 22, 2026 | 9:00 AM
మటన్ సుక్కా అనేది పొడిగా వండిన మసాలా వంటకం. ఇది చపాతీ, పరోటా దోసెలకు ఒక అద్భుతమైన కాంబినేషన్. దీని తయారీలో మసాలాలు మితంగా ఉన్నా రుచి మాత్రం అదిరిపోతుంది. ముక్క మెత్తగా ఉడుకుతూ, మసాలాలు పట్టి నోట్లో వేసుకుంటే కరిగిపోయేలా ఉండే ఈ సుక్కా రెసిపీ గురించి ఇప్పుడు సవివరంగా తెలుసుకుందాం.
కావలసిన పదార్థాలు:
మటన్: 1/2 కేజీ (చిన్న ముక్కలు)
ఉల్లిపాయలు: 2 (సన్నగా తరిగినవి)
టమోటాలు: 2 (చిన్నవి)
అల్లం వెల్లుల్లి పేస్ట్: 1 టేబుల్ స్పూన్
పచ్చిమిర్చి: 2
మటన్ మసాలా పొడి: 1 టేబుల్ స్పూన్
కారం పొడి: రుచికి సరిపడా
పసుపు: చిటికెడు
కొత్తిమీర: కొద్దిగా
నూనె: తగినంత
ఉప్పు: రుచికి సరిపడా
తయారీ విధానం:
ముందుగా మటన్ను చిన్న ముక్కలుగా కోసి, వేడి నీటిలో రెండు మూడు సార్లు శుభ్రంగా కడగాలి. ఆ తర్వాత ఒక కుక్కర్లో మటన్ ముక్కలు, కొద్దిగా పసుపు, తగినన్ని నీళ్లు పోసి నాలుగు లేదా ఐదు విజిల్స్ వచ్చే వరకు ఉడికించాలి. ముక్క ఎంత మెత్తగా ఉడికితే సుక్కా అంత రుచిగా ఉంటుంది.
తర్వాత స్టవ్ మీద పాన్ పెట్టి నూనె వేయాలి. నూనె వేడెక్కాక సన్నగా తరిగిన ఉల్లిపాయ ముక్కలు వేసి దోరగా వేయించాలి. ఉల్లిపాయలు వేగిన తర్వాత ఉడికించి పెట్టుకున్న మటన్ ముక్కలను వేసి బాగా కలపాలి. ఇందులోనే టమోటా ముక్కలు, పచ్చిమిర్చి వేసి కొద్దిసేపు మగ్గనివ్వాలి.
మసాలాల కలయిక:
ముక్కలు వేగుతున్నప్పుడు అల్లం వెల్లుల్లి పేస్ట్ వేసి పచ్చి వాసన పోయే వరకు రెండు నిమిషాలు ఉడికించాలి. ఇప్పుడు కారం పొడి, మటన్ మసాలా పొడి మరియు తగినంత ఉప్పు వేసి బాగా కలపాలి. మసాలాలన్నీ మటన్ ముక్కలకు బాగా పట్టి, మిశ్రమం దగ్గరపడి పొడిగా మారాక, చివరగా సన్నగా తరిగిన కొత్తిమీర చల్లుకోవాలి. అంతే! నోరూరించే మటన్ సుక్కా సిద్ధం.
