Green Chilli Chicken Recipe: పచ్చిమిర్చి చికెన్.. చూస్తేనే నోరూరుతుంది! ఒక్కసారి చేస్తే మళ్లీ ఇదే కావాలంటారు
చికెన్ వంటల్లో కాస్త ఘాటైన రుచి కోరుకునేవారికి గ్రీన్ చిల్లీ చికెన్ మంచి ఎంపిక. పచ్చిమిర్చి, వెల్లుల్లి, మసాలాల రుచితో చికెన్కు ప్రత్యేకమైన ఫ్లేవర్ వస్తుంది. రెస్టారెంట్లో దొరికే రుచిని ఇంట్లోనే సులభంగా ఆస్వాదించాలంటే ఈ రెసిపీని ప్రయత్నించొచ్చు. ముఖ్యంగా సాయంత్రం వేళ స్నాక్గా లేదా అన్నం, రోటీతో కలిపి సర్వ్ చేస్తే రుచికరంగా ఉంటుంది.
సాయంత్రం వేళ ఏదైనా స్పైసీగా, రుచిగా తినాలనిపిస్తోందా? ఎప్పుడూ ఒకే రకమైన చికెన్ కర్రీ కాకుండా కాస్త కొత్తగా ప్రయత్నించాలనుకునేవారికి గ్రీన్ చిల్లీ చికెన్ మంచి ఆప్షన్. పచ్చిమిర్చి ఘాటు, వెల్లుల్లి సువాసన, మసాలాల రుచి చికెన్కు మంచి ఫ్లేవర్ను ఇస్తాయి. రెస్టారెంట్లో దొరికే రుచిని ఇంట్లోనే సులభంగా ఆస్వాదించాలనుకుంటే ఈ రెసిపీని ప్రయత్నించవచ్చు.
గ్రీన్ చిల్లీ చికెన్కు కావలసిన పదార్థాలు
చికెన్ మ్యారినేషన్ కోసం:
చికెన్ – 500 గ్రాములు
పచ్చిమిరపకాయలు – 8
వెల్లుల్లి పేస్ట్ – 1 టేబుల్ స్పూన్
ధనియాల పొడి – 1 టీస్పూన్
పసుపు – అర టీస్పూన్
ఉప్పు – రుచికి తగినంత
నిమ్మరసం – 1 టేబుల్ స్పూన్
నూనె – 1 టేబుల్ స్పూన్
చికెన్ మసాలా కోసం:
నూనె – 3 నుంచి 4 టేబుల్ స్పూన్లు
ఉల్లిపాయలు – 2
పచ్చిమిరపకాయలు – 6
వెల్లుల్లి పేస్ట్ – 1 టేబుల్ స్పూన్
టమోటా – 1
కారం పొడి – 1 టీస్పూన్
గరం మసాలా – అర టీస్పూన్
కొత్తిమీర – కొద్దిగా
నీరు – అవసరమైనంత
తయారీ విధానం
1. ముందుగా చికెన్ను మ్యారినేట్ చేయాలి
ఒక గిన్నెలో చికెన్, పచ్చిమిరపకాయలు, వెల్లుల్లి పేస్ట్, ధనియాల పొడి, పసుపు, ఉప్పు, నిమ్మరసం, ఒక టేబుల్ స్పూన్ నూనె వేసి బాగా కలపాలి. ఈ మిశ్రమాన్ని కనీసం 30 నిమిషాలు పక్కన పెట్టాలి. మరింత రుచి రావాలంటే 1–2 గంటలు ఫ్రిజ్లో ఉంచవచ్చు.
2. చికెన్ను ఉడికించాలి
బాణలిలో రెండు టేబుల్ స్పూన్ల నూనె వేసి వేడి చేయాలి. మ్యారినేట్ చేసిన చికెన్ను అందులో వేసి మధ్యస్థ మంటపై సుమారు 10 నిమిషాలు ఉడికించాలి.
3. మసాలా సిద్ధం చేయాలి
అదే బాణలిలో మిగిలిన నూనె వేసి ఉల్లిపాయలను బంగారు రంగు వచ్చే వరకు వేయించాలి. తర్వాత వెల్లుల్లి పేస్ట్, తరిగిన పచ్చిమిరపకాయలు వేసి సుమారు రెండు నిమిషాలు వేయించాలి.
4. టమోటా, మసాలాలు కలపాలి
టమోటా వేసి మెత్తబడే వరకు ఉడికించాలి. తర్వాత కారం పొడి, గరం మసాలా, అవసరమైనంత ఉప్పు వేసి బాగా కలపాలి.
5. చివరగా చికెన్ కలపాలి
ఇప్పుడు ముందుగా ఉడికించిన చికెన్ను మసాలాలో వేసి బాగా కలపాలి. అవసరమైతే కొద్దిగా నీరు పోసి చికెన్ మసాలాను పట్టే వరకు ఉడికించాలి. చివరగా కొత్తిమీర చల్లి దించేయాలి.
వేడి వేడి గ్రీన్ చిల్లీ చికెన్ను అన్నం, రోటీ, చపాతీ లేదా నాన్తో సర్వ్ చేసుకోవచ్చు. పచ్చిమిర్చి ఘాటు తగ్గించాలనుకుంటే మీ రుచికి అనుగుణంగా మిరపకాయల పరిమాణాన్ని మార్చుకోవచ్చు.