Career Growth: ఆఫీసులో మిమ్మల్ని ‘వీక్’ అనిపించే ఆ 5 అలవాట్లు.. ఇలా ఉంటే ఎప్పటికీ సక్సెస్ కాలేరు!
ఆఫీసులో మీకంటే తక్కువ ప్రతిభ ఉన్నవారు ప్రమోషన్లు, భారీ జీతాలు అందుకుంటుంటే మీకు ఆశ్చర్యం కలగవచ్చు. రోజంతా సైకిల్ తొక్కినట్లు కష్టపడి పనిచేస్తున్నా మీకు తగిన గుర్తింపు రాకపోవడానికి మీ పనితనం కంటే మీ ప్రవర్తనలో ఉండే కొన్ని చిన్న పొరపాట్లే కారణం కావచ్చని నిపుణులు హెచ్చరిస్తున్నారు. తెలియకుండానే మీరు చేసే కొన్ని అలవాట్లు మీ టీమ్ ముందు మిమ్మల్ని బలహీనుడిగా చూపుతున్నాయి.
చిన్న చిన్న విషయాలకు కూడా క్షమాపణలు చెప్పడం, మీ పనికి ఇతరులు గుర్తింపు తీసుకుంటున్నా మౌనంగా ఉండటం, పర్సనల్ టైమ్ లేకుండా ఎప్పుడూ ఆఫీస్ పనిలోనే మునిగిపోవడం.. ఇవన్నీ మీ విలువను తగ్గిస్తాయని మీకు తెలుసా? అలాగే, ప్రతి నిర్ణయానికి బాస్ అనుమతి కోరడం వల్ల మీపై నమ్మకం తగ్గే అవకాశం ఉంది. మీ కెరీర్ వృద్ధిని అడ్డుకుంటున్న ఆ 5 అలవాట్లు ఏంటి? వాటిని అధిగమించి ఆఫీసులో ‘లీడర్’లా ఎలా ఎదగాలి? అనే ఆసక్తికరమైన అంశాలను ఇప్పుడు చూద్దాం.
పదే పదే ‘సారీ’ చెప్పడం: ప్రతి చిన్న దానికి క్షమాపణలు చెప్పడం మీపై మీకు నమ్మకం లేదని సూచిస్తుంది. ‘సారీ’ కి బదులుగా ‘థాంక్యూ’ చెప్పడం అలవాటు చేసుకోండి. ఉదాహరణకు, ఆలస్యమైతే ‘సారీ’ అనకుండా, ‘నేను వచ్చే వరకు వేచి ఉన్నందుకు ధన్యవాదాలు’ అని చెప్పండి.
క్రెడిట్ వదులుకోవడం: మీరు కష్టపడి చేసిన ప్రాజెక్ట్ గుర్తింపును సహోద్యోగులు కొట్టేస్తుంటే మౌనంగా ఉండకండి. మీ శ్రమను మర్యాదపూర్వకమైన పద్ధతిలో మీటింగ్లో ప్రస్తావించి మీ ఉనికిని చాటుకోండి.
సమయపాలన లేకపోవడం: ఆఫీస్ పనివేళలు దాటిన తర్వాత కూడా ప్రతి మెసేజ్కు వెంటనే స్పందించడం వల్ల మీ పర్సనల్ లైఫ్కు విలువ లేదని ఇతరులు భావిస్తారు. అవసరమైనప్పుడు ‘నో’ చెప్పడం నేర్చుకోండి.
అతిగా అనుమతి కోరడం: ప్రతి చిన్న పనికి ‘ఇది సరిగ్గా ఉందా?’ అని పదే పదే అడగడం వల్ల మీకు అనుభవం లేదని అర్థం వస్తుంది. నిర్ణయాలు తీసుకోవడంలో చొరవ చూపండి. “నేను ఇలా చేస్తున్నాను, ఆక్షేపణ ఉంటే చెప్పండి” అని మెయిల్ చేయడం ఉత్తమం.
బాడీ లాంగ్వేజ్: మీరు మాట్లాడకముందే మీ శరీరం మీ గురించి చెబుతుంది. ఆత్మవిశ్వాసం లేకుండా భుజాలు వాల్చి కూర్చోవడం లేదా తక్కువ చేసుకొని మాట్లాడటం మీ వ్యక్తిత్వాన్ని దెబ్బతీస్తుంది. ఎప్పుడూ చురుగ్గా, నిటారుగా ఉంటూ పాజిటివ్ బాడీ లాంగ్వేజ్ను ప్రదర్శించండి.
కెరీర్లో ఉన్నత శిఖరాలను అధిరోహించాలంటే కేవలం కష్టపడటం మాత్రమే కాదు, ఆఫీసులో మీకంటూ ఒక ప్రత్యేక గుర్తింపును, గౌరవాన్ని సంపాదించుకోవడం కూడా ముఖ్యం. ఈ మార్పులను ఇప్పుడే మొదలుపెట్టండి!
ప్రతిరోజూ ఆఫీసులో అడుగుపెట్టే ముందు ఒకసారి మీ డ్రెస్సింగ్ బాడీ లాంగ్వేజ్ను సరిచూసుకోండి. ఆత్మవిశ్వాసంతో కూడిన ఒక చిన్న చిరునవ్వు మీపై ఇతరులకు నమ్మకాన్ని పెంచుతుంది.