అరటి పండుతోనే కాదు తొక్కతోనూ అద్భుత ప్రయోజనాలు.. విషయం తెలిస్తే తొక్క కూడా పడేయరు
సాధారణంగా మనం అరటిపండు తిన్న తర్వాత దాని తొక్కను పనికిరాని చెత్తగా భావించి పారేస్తుంటాం. కానీ ఆ పండు సిప్పలో చర్మానికి మేలు చేసే అనేక పోషకాలు ఉన్నాయని ఆయుర్వేదం తో పాటు చర్మ నిపుణులు కూడా చెబుతున్నారు. మన వంటగదిలో దొరికే అత్యంత చవకైన సహజ సిద్ధమైన సౌందర్య సాధనాల్లో అరటిపండు తొక్క ఒకటి.
అరటిపండు తొక్కలో చర్మ సౌందర్యానికి అవసరమైన విటమిన్ ఏ, బి6, సి, ఈ వంటి పోషకాలు పుష్కలంగా ఉంటాయి. వీటితో పాటు పొటాషియం, మెగ్నీషియం, యాంటీ ఆక్సిడెంట్లు చర్మాన్ని హైడ్రేటెడ్ గా ఉంచడానికి, ముడతలను తగ్గించడానికి అద్భుతంగా తోడ్పడతాయి. అయితే దీనిని ఉపయోగించేటప్పుడు కొన్ని కచ్చితమైన నియమాలు పాటించడం తప్పనిసరి.
చర్మ సమస్యలకు సహజ పరిష్కారం
ఎండ వల్ల కలిగే నలుపు, పిగ్మెంటేషన్ తగ్గించడంలో అరటిపండు తొక్క అద్భుతంగా పనిచేస్తుంది. ఇందులో ఉండే ఫెనోలిక్ సమ్మేళనాలు చర్మాన్ని లోపలి నుండి శుభ్రపరిచి కాంతివంతం చేస్తాయి. మొటిమల సమస్యతో బాధపడే వారికి ఇది ఒక వరప్రసాదం అని చెప్పవచ్చు. దీనిలోని యాంటీ ఇన్ఫ్లమేటరీ, యాంటీ బ్యాక్టీరియల్ గుణాలు మొటిమల వాపును తగ్గించి, అవి మచ్చలుగా మారకుండా అడ్డుకుంటాయి. అలాగే యాంటీ ఆక్సిడెంట్లు చర్మంపై ముడతలను తగ్గించి చర్మాన్ని బిగుతుగా ఉంచుతాయి. కళ్ల కింద వచ్చే వాపు, నలుపును తగ్గించడానికి అరటిపండు తొక్కను కళ్లపై కొద్దిసేపు ఉంచుకోవడం వల్ల మంచి ఫలితం ఉంటుంది.
ఉపయోగించే విధానం
అరటిపండు తొక్కను ముఖానికి అప్లై చేసే ముందు ముఖాన్ని శుభ్రంగా కడుక్కోవాలి. పండిన అరటిపండు తొక్క లోపలి భాగాన్ని అంటే తెల్లటి పొరను ముఖంపై మెల్లగా మసాజ్ చేయాలి. ముఖ్యంగా మొటిమలు, మచ్చలు ఉన్న చోట పది నుండి పదిహేను నిమిషాల పాటు ఉంచి ఆపై గోరువెచ్చని నీటితో కడిగేయాలి. మెరుగైన ఫలితాల కోసం దీనిని వారానికి రెండు మూడు సార్లు చేయవచ్చు. తొక్కలోని పోషకాలు చర్మ రంధ్రాల్లోకి వెళ్లి సహజమైన మెరుపును అందిస్తాయి.
చర్మ నిపుణుల హెచ్చరికలు
అరటిపండు తొక్క అనేది ఒక ప్రసిద్ధ గృహవైద్యం మాత్రమే అని గుర్తుంచుకోవాలి. చర్మ సమస్యలు చాలా తీవ్రంగా ఉన్నప్పుడు కేవలం దీనిపైనే పూర్తిగా ఆధారపడకూడదు. కొంతమందికి అరటిపండు తొక్క వల్ల చర్మంపై ఎర్రటి దద్దుర్లు లేదా దురద వచ్చే అవకాశం ఉంది. కాబట్టి ముఖంపై నేరుగా వాడటానికి ముందు ప్యాచ్ టెస్ట్ చేయడం చాలా ముఖ్యం. అంటే చేతిపై కొద్దిగా రాసి పరీక్షించుకోవాలి. అలాగే మరీ గట్టిగా రుద్దడం వల్ల చర్మంపై గీతలు పడే అవకాశం ఉంటుంది, కాబట్టి చాలా సున్నితంగా వాడాలి. మీ చర్మం చాలా సెన్సిటివ్ గా ఉన్నా లేదా ఇతర చర్మ వ్యాధులు ఉన్నా నిపుణుల సలహా తీసుకున్న తర్వాతే దీనిని ప్రయత్నించడం ఉత్తమం. ఆరోగ్యకరమైన చర్మం కోసం సహజ పద్ధతులను అనుసరిస్తూ జాగ్రత్తలు పాటించండి. దానివల్ల ఎటువంటి సైడ్ ఎఫెక్ట్స్ లేకుండా అందాన్ని కాపాడుకోవచ్చు. సంప్రదాయ పద్ధతులతో మీ చర్మ సౌందర్యాన్ని పెంచుకోండి.