Wealth Astrology: ఈ రాశులకు 50 రోజుల పండుగ! ఐశ్వర్యవంతులు కావడం పక్కా..

Ruchaka Mahapurusha Yoga: మే 12 నుంచి జూన్ 20 వరకు కుజుడి మేష రాశి సంచారం వల్ల రుచక మహాపురుష యోగం ఏర్పడుతుంది. దీని ప్రభావంతో మేషం, కర్కాటకం, తుల, మకర రాశుల వారికి అధికారం, ధనవృద్ధి, కీర్తి లభించే అవకాశం ఉంది. మీన రాశివారికి ప్రత్యేకంగా మహా ధన యోగం కలిసివచ్చే సూచనలు కనిపిస్తున్నాయి.

Wealth Astrology

: జ్యోతిషశాస్త్రం అత్యంత ప్రసిద్ధమైన, అత్యంత ఉన్నతమైన అయిదు మహా పురుష యోగాల్లో ఒకటైన రుచక మహా పురుష యోగం నాలుగు రాశులకు ఈ నెల (మే) 12 నుంచి జూన్ 20వరకు కలగబోతోంది. ఇది కుజుడి మేష రాశి సంచారం వల్ల కలుగుతుంది. అధికారం, కీర్తి ప్రతిష్ఠలు, ధన వృద్ధి వంటివి ఈ యోగం వల్ల కలుగుతాయి. కుజుడు ఏ రాశికైనా 1, 4, 7, 10 స్థానాల్లో ఉచ్ఛ, స్వక్షేత్రాల్లో సంచారం చేస్తున్నప్పుడు ఈ యోగం కలుగుతుంది. ఒకటికి రెండుసార్లు ధన యోగాలు కలిగి ఐశ్వర్యవంతులవుతారు. మేషం, కర్కాటకం, తుల, మకర రాశులకు కుజుడి కేంద్ర స్థితి వల్ల రుచక యోగం ఏర్పడుతుండగా, మీన రాశివారికి మహా ధన యోగం పడుతుంది.

: మేషం: ఈ రాశిలో రాశ్యధిపతి కుజుడు సంచారం చేయడం ఈ రాశివారికి రుచక మహా పురుష యోగం పట్టింది. ఇది అనేక విధాలైన రాజయోగ, ధన యోగాలనిస్తుంది. తప్పకుండా అధికార యోగం పడుతుంది. అనేక మార్గాల్లో ఆదాయం వృద్ధి చెందుతుంది. విదేశీ సంపాదనకు అవకాశం కలుగుతుంది. ఆరోగ్యం మెరుగుపడుతుంది. ఆర్థిక, వ్యక్తిగత సమస్యలన్నీ చాలావరకు పరిష్కారమవుతాయి. వృత్తి, వ్యాపారాలు బాగా కలిసి వస్తాయి. ఇంటా బయటా ప్రాభవం పెరుగుతుంది.

: కర్కాటకం: ఈ రాశికి దశమ కేంద్రంలో కుజుడి స్వస్థాన సంచారం వల్ల రుచక యోగం ఏర్పడింది. దీనివల్ల ఉద్యోగపరంగా అనేక శుభ యోగాలు కలుగుతాయి. ఒక సంస్థకు ఆధిపత్యం వహించడం జరుగుతుంది. ఉద్యోగంలో పదోన్నతి లభిస్తుంది. వృత్తి, వ్యాపారాల్లో డిమాండ్ పెరుగుతుంది. నిరుద్యోగులకు భారీ జీతభత్యాలతో కూడిన ఉద్యోగం లభిస్తుంది. విదేశాల నుంచి కూడా ఉద్యోగ ఆఫర్లు అందే సూచనలున్నాయి. మరింత మంచి ఉద్యోగంలోకి మారడానికి కూడా బాగా అవకాశం ఉంది.

: తుల: ఈ రాశికి సప్తమ కేంద్రంలో కుజుడు స్వస్థానంలో సంచారం చేస్తున్నందువల్ల రుచక మహా పురుష యోగం ఏర్పడింది. దీనివల్ల వృత్తి, వ్యాపారాల్లో అంచనాలకు మించిన లాభాలు గడించడం జరుగుతుంది. ఉద్యోగంలో హోదా పెరుగుతుంది. ఆర్థిక స్థితి బాగా మెరుగుపడుతుంది. జీవన శైలి పూర్తిగా మారిపోతుంది. సగటు వ్యక్తి సైతం సంపన్నుడు కావడం జరుగుతుంది. సంపన్న కుటుంబానికి చెందిన వ్యక్తితో పెళ్లి సంబంధం కుదురుతుంది. ఆరోగ్యం మెరుగుపడుతుంది.

: మకరం: ఈ రాశికి చతుర్థ కేంద్రంలో కుజుడి స్వస్థాన సంచారం వల్ల ఈ రాశివారికి రుచక మహా పురుష యోగం కలిగింది. దీనివల్ల గృహ, వాహన యోగాలు పట్టే అవకాశముంది. ఆస్తి వివాదం పరిష్కారం కావడం, ఆస్తి విలువ పెరగడం, ఆస్తి సంక్రమించడం వంటివి జరిగే అవకాశముంది. సమాజంలో ఒక ప్రముఖుడిగా గుర్తింపు పొందడం జరుగుతుంది. ఉద్యోగంలోనే కాక, సామాజికంగా కూడా స్థాయి, హోదా పెరుగుతాయి. ఉన్నత స్థాయి వ్యక్తులతో పరిచయాలు వృద్ధి చెందుతాయి.

: మీనం: ఈ రాశికి ధన, భాగ్యాధిపతిగా అత్యంత శుభుడైన కుజుడు ధన స్థానంలో సంచారం చేయడం వల్ల అనేక మార్గాల్లో ఆదాయం పెరుగుతుంది. బ్యాంక్ బ్యాలెన్స్ బాగా వృద్ధి చెందుతుంది. స్థిరాస్తుల్లో, షేర్లల్లో పెట్టుబడులు పెట్టడం జరుగుతుంది. కుటుంబ సౌఖ్యం బాగా పెరుగుతుంది. ఉద్యోగంలో జీతభత్యాలు బాగా పెరగడం, వృత్తి, వ్యాపారాల్లో లాభాలపరంగా ఊహించని అదృష్టాలు పట్టడం వంటివి జరుగుతాయి. కుటుంబంలో ఊహించని కొన్ని శుభ పరిణామాలు చోటు చేసుకుంటాయి.