Morning Routine: నిద్రలేవగానే ఈ 5 తప్పులు చేస్తున్నారా? మీ ఆరోగ్యం ప్రమాదంలో ఉన్నట్లే!

Morning Routine Mistakes

నేటి ఉరుకుల పరుగుల జీవితంలో చాలామంది ఉదయం లేవగానే పనుల ఒత్తిడిలో పడి తమ ఆరోగ్యాన్ని నిర్లక్ష్యం చేస్తున్నారు. ఉదయం నిద్రలేచిన మొదటి గంటలో మనం చేసే పనులు మన రోజంతటినీ ప్రభావితం చేస్తాయి. నిపుణుల సూచనల ప్రకారం, ఉదయం పూట అస్సలు చేయకూడని 5 తప్పులు ఇవే..

1. హఠాత్తుగా లేవడం: నిద్రలేవగానే ఒక్కసారిగా బెడ్ మీద నుంచి లేవకూడదు. దీనివల్ల కండరాల నొప్పులు వచ్చే అవకాశం ఉంది. నిద్రలేచిన తర్వాత కాసేపు కుడి వైపుకు తిరిగి పడుకోవడం వల్ల శరీరంలో రక్త ప్రసరణ మెరుగుపడుతుంది. ఇది మీకు రోజంతా అవసరమైన శక్తిని ఇస్తుంది.

2. పనుల గురించి ఆందోళన: కళ్లు తెరవగానే ఆఫీసు పనులు, ఇంటి పనుల గురించి టెన్షన్ పడటం వల్ల మానసిక ఒత్తిడి పెరుగుతుంది. దీన్ని నివారించడానికి మరుసటి రోజుకు కావలసిన ఏర్పాట్లు (బట్టలు సర్దుకోవడం, కూరగాయలు కోయడం వంటివి) ముందు రోజే చేసుకోవాలి. దీనివల్ల ఉదయం ప్రశాంతంగా పనులు పూర్తి చేసుకోవచ్చు.

3. అల్పాహారం మానేయడం: సమయం లేదని అల్పాహారం (Breakfast) మానేయడం అతిపెద్ద తప్పు. దీనివల్ల రోగనిరోధక శక్తి తగ్గడమే కాకుండా ఊబకాయం, మధుమేహం వంటి సమస్యలు వస్తాయి. అల్పాహారం మానేయడం వల్ల శరీర బిఎమ్‌ఐ (BMI) పై ప్రతికూల ప్రభావం పడుతుందని అధ్యయనాలు చెబుతున్నాయి.

4. ఫోన్ వాడటం: లేవగానే స్మార్ట్‌ఫోన్ చూడటం వల్ల అందులోని ప్రతికూల వార్తలు లేదా సమాచారం మీ మానసిక స్థితిని పాడుచేస్తాయి. ఇది సృజనాత్మకతను, ఆత్మవిశ్వాసాన్ని తగ్గిస్తుంది. ఫోన్‌కు బదులుగా ఉదయాన్నే మంచి పుస్తకం చదవడం అలవాటు చేసుకోవడం ఉత్తమం.

5. వార్మప్ లేకుండా వ్యాయామం: నిద్రలో కండరాలు, ఎముకలు కొంత బిగుతుగా మారుతాయి. కాబట్టి లేవగానే నేరుగా బరువులు ఎత్తడం లేదా కఠినమైన వ్యాయామాలు చేయకూడదు. ముందుగా వార్మప్, యోగా లేదా ధ్యానం చేయడం వల్ల కండరాలు విశ్రాంతి పొంది, వ్యాయామం చేయడానికి సిద్ధమవుతాయి.

ముఖ్యమైన సూచనలు:

ఉదయం లేవగానే గ్లాసు గోరువెచ్చని నీరు తాగడం మంచిది.

మొబైల్ ఫోన్‌కు కనీసం గంట సేపు దూరంగా ఉండండి.

పోషకాలు ఉన్న అల్పాహారాన్ని తప్పనిసరిగా తీసుకోండి.

వ్యాయామం చేసే ముందు శరీరాన్ని సిద్ధం (Warm-up) చేయండి.

గమనిక: ఈ కథనంలోని అంశాలు నిపుణుల సలహాలు మరియు వివిధ అధ్యయనాల ఆధారంగా అందించినవి. మీ ఆరోగ్య పరిస్థితిని బట్టి తగిన జాగ్రత్తలు తీసుకోవాలి.