తెలంగాణ విమోచన దినాన్ని జరుపుతాం : సీఎం కేసీఆర్

తెలంగాణ విమోచనా దినం రాజకీయం రంగు పులుముకుంది.  ఉద్యమ సమయంలో దీన్ని బలంగా ఉపయోగించుకున్న టీఆర్ఎస్ పార్టీ అధికారం చేపట్టిన తర్వాత దాని ప్రభావాన్ని తగ్గించినట్టుగా కనిపిస్తోంది. తాము అధికారంలోకి వస్తే విమోచనా దినాన్ని అధికారికంగా నిర్వహిస్తామని ప్రకటించి ఆ తర్వాత దాన్ని పెద్దగా పట్టించుకున్న దాఖలాలు ప్రభుత్వం దగ్గర కనిపించలేదనే విమర్శలున్నాయి.

అయితే అటు బీజేపీ మాత్రం తెలంగాణ విమోచనా దినంపై పట్టుదలతో ముందుకు వెళ్తోంది. మంగళవారం జరిగే ఈ కార్యక్రమాన్ని ఘనంగా నిర్వహించాలని ఇప్పటికే ప్రణాళికలు సిద్దం చేసింది. బీజేపీ అగ్రనేతలు పలువురు ఈ కార్యక్రమానికి రానున్నట్టుగా తెలుస్తోంది. టీఆర్ఎస్ పార్టీ ఎంఐఎంతో మిత్రపక్షంగా ఉన్నందున విమోచనా దినాన్ని జరపలేకపోతుందంటూ బీజేపీ నేతలు ఆరోపిస్తున్నారు.

ఇదిలా ఉంటే తెలంగాణ విమోచనా దినంపై ముఖ్యమంత్రి కేసీఆర్ అసెంబ్లీ బడ్జెట్ సమావేశాల్లో క్లారిటీ ఇచ్చారు. ఇదే విషయంపై  బీజేపీకి చురకలు అంటించారు. కొత్తగా మతం పుచ్చుకున్నోడికి నామాలు ఎక్కువ అంటూ చమత్కరించారు. ఆ రోజు( తెలంగాణ విమోచన దినం) ఏదో బ్రహ్మండం బద్దలైపోతుందన్నట్టుగా , దానికి తామే ఏదో చేస్తామన్నట్టు చెబుతున్నారని బీజేపీని విమర్శించారు. ఖచ్చితంగా విమోచనా దినాన్ని తమ పార్టీ పాటిస్తుందని, తెలంగాణ భవన్‌మీద జాతీయ జెండా ఎగురవేస్తామని దీనిలో ఎవరికీ సందేహాలు అవసరం లేదని స్పష్టం చేశారు.

తెలంగాణ సాయుధ పోరాటంలో నిజాం నవాబుల అకృత్యాలపై ఆనాడు జరిగిన పోరాటాలకు గుర్తుగా జరిపే రోజును తెలంగాణ విమోచన దినంగా పాటిస్తున్నారు.