న‌టి తాప్సీకి క‌రెంటు బిల్లు షాక్..ఏకంగా..!

టాలెంటెడ్ ఆర్టిస్ట్ తాప్సీకి ముంబయి అదానీ కరెంట్​ డిస్ట్రిబ్యూషన్​ సంస్థ క‌రెంటు బిల్లు రూపంలో భారీ షాక్​ ఇచ్చింది. ముంబయిలోని తన నివాసానికి విద్యుత్​ రీడింగ్ బిల్లును అధికంగా వేశార‌ని తీవ్ర‌ అసంతృప్తిని వ్యక్తం చేసింది తాప్సీ. కోవిడ్-19 లాక్‌డౌన్ నేప‌థ్యంలో మూడు నెలలుగా ప‌వ‌ర్ బిల్లు తీయకుండా వాటన్నిటిని తాజాగా పంపారు. అయితే అన్ని శ్లాబులనూ కలిపి ఒక్కనెలలోనే వ‌డ్డించ‌డంతో రూ.36 వేల విద్యుత్​ బిల్లు అయ్యింది. అయితే సాధార‌ణ రోజుల క‌న్నా మూడు రెట్లు అధికంగా బిల్లు రావడం వల్ల ట్విట్ట‌ర్ వేదిక‌గా తాప్సీ ఆవేద‌న వ్యక్తం చేసింది.

“మూడు నెలల క‌రోనా లాక్​డౌన్​లో ఎలాంటి కొత్త ఎల‌క్ట్రానిక్ వ‌స్తువులు నా అపార్ట్​మెంట్​కు తెచ్చుకోలేదు, ఉప‌యోగించ‌లేదు. కానీ, చివరి నెలలో మాత్రం ఎలక్ట్రిసిటీ బిల్లు ఊహ‌కంద‌నంత‌గా పెరిగిపోయింది. ముంబయి అదానీ ఎలక్ట్రిసిటీ.. మా నుంచి మీరు ఎటువంటి ఎల‌క్ట్రిసిటి బిల్లు వసూల్​ చేస్తున్నారు” అని తాప్సీ ట్విట్ట‌ర్ లో ప్ర‌శ్నించింది.

తాప్సీ ఇంటి క‌రెంట్ వినియోగానికి సంబంధించి మూడు నెలలకు వచ్చిన విద్యుత్​ బిల్లులలో ఒక్క జూన్​లోనే రూ.36 వేలకు రిసిప్ట్ పంపారు. మే నెలలో మాత్రం కేవలం రూ.3,850 బిల్లు వచ్చినట్లు ఉంది. తనకున్న మరో అపార్ట్​మెంట్​లో ఎవరూ నివ‌శించ‌ర‌ని, కేవలం వారం వారం శుభ్రపరచడానికే వెళ్తామని తెలిపింది. అక్క‌డ కూడా రూ.8,640 విద్యుత్​ బిల్లును విధించారని వాపోయింది. అధిక‌ విద్యుత్​ బిల్లుల‌పై ఇప్ప‌టికే చాలామంది ప్రముఖులు సోష‌ల్ మీడియా వేదిక‌గా ఆగ్ర‌హం వ్య‌క్తం వేసిన సంగ‌తి తెలిసిందే.