‘ఇది అధునాతన కిరాతకం’.. జార్జి ఫ్లాయిడ్ సోదరుడి ఆక్రోశం

తన సోదరుడు జార్జి ఫ్లాయిడ్ హత్య ‘అధునాతన కిరాతకం’ అని అతని తమ్ముడు ఫిలోనీస్ ఫ్లాయిడ్ ఆరోపించాడు. తన బ్రదర్ మృతికి కారకులైన పోలీసులను వదలరాదని కోరాడు. ‘కేవలం 20 డాలర్ల కోసం జార్జిని చంపుతారా ? ఇది సామూహికంగా కలిసి చేసిన హత్య’ అని పేర్కొన్నాడు. జార్జి మృతిపై అమెరికాలోని ప్రతినిధుల సభ ఏర్పాటు చేసిన జుడిషియల్  కమిటీ… తొలిసారిగా రేషియల్ ఇన్ జస్టిస్ (జాత్యహంకారం) పైన, పోలీస్ బ్రూటాలిటీ (పోలీసుల అమానుషం) పైన విచారణ జరిపింది. ఈ విచారణకు హాజరైన ఫిలోనీస్.. వాంగ్మూలమిస్తూ.. ‘ఇది పట్టపగలు జరిగిన మోడర్న్ డే లించింగ్’ అని పేర్కొన్నాడు. వాళ్ళు (పోలీసులు) జార్జిని కిరాతకంగా చంపారు అన్నాడు. గత మే 25 న మినియాపొలీస్ కి చెందిన పోలీసు ఒకడు జార్జి మెడపై తన కాలితో  తొమ్మిది నిముషాలసేపు నొక్కడంతో ఊపిరాడక అతడు మరణించాడు. జార్జి జీవితం అంతమై పోయిందని, తమ జీవితాలు కూడా నాశనమయ్యాయని ఫిలోనీస్ కన్నీటి పర్యంతమవుతూ వ్యాఖ్యానించాడు. బ్లాక్ లివ్స్ మ్యాటర్ అని ఆక్రోశించాడు. జార్జి గురించి డెరెక్ చౌవిన్ అనే ఆ పోలీసుకు తెలుసునని, తనను జార్జి ద్వేషిస్తున్నాడని తెలిసే ఆగ్రహంతో అతడ్ని హతమార్చాడని ఫిలోనీస్ అన్నాడు. కాగా- డెమొక్రాట్లు ఎక్కువ సంఖ్యలో ఉన్న ప్రతినిధుల సభ.. భారీ సంస్కరణల చట్టాన్ని ప్రతిపాదించి జులై 4 న దాన్ని ఓటింగ్ కి పెట్టనుంది. అయితే  చాలామంది రిపబ్లికన్లతో కూడిన సెనేట్ వారి ప్రతిపాదనను అడ్డుకునేందుకు కూడా రెడీగా ఉంది. ఆ ప్రతిపాదనకు వ్యతిరేకంగా వారు కూడా ఓ బిల్లును తేవచ్ఛు.