అధికారం అనేది అలంకారం కాదు, బాధ్యత. చిరంజీవి రాజకీయాల్లో కొనసాగి ఉంటే… ఇప్పుడు సీఎం అయ్యేవారు : పవన్

అన్నయ్య చిరంజీవి గురించి ఆయన తమ్ముడు, జనసేనాని పవన్ కల్యాణ్ ఆసక్తికర వ్యాఖ్యలు చేశారు. చిరంజీవి రాజకీయాల్లో కొనసాగి ఉంటే… ఇప్పుడు సీఎం అయ్యేవారని చెప్పారు. అధికారం అనేది అలంకారం కాదన్న ఆయన, అదొక బాధ్యత అని తెలిపారు. జనాలపై అజమాయిషీ చేసేందుకే అధికారమని ప్రస్తుతం నేతలు భావిస్తున్నారని చెప్పుకొచ్చారు. ఇసుక అమ్ముకోవడానికో, సిమెంటు ఫ్యాక్టరీ కోసమో, మద్యం అమ్ముకోవడానికో తాను ముఖ్యమంత్రి కావాలనుకోలేదని మరోసారి ఆయన స్పష్టం చేశారు. పార్టీని నడిపేందుకే సినిమాల్లో నటిస్తున్నానన్నారు. తిరుపతిలో మీడియాతో మాట్లాడుతూ పవన్ ఈ వ్యాఖ్యలు చేశారు. మిగిలిన వాళ్లు 25 కేజీల బియ్యం ఇస్తామంటున్నారని… తాను 25 ఏళ్ల భవిష్యత్తును ఇవ్వాలనుకుంటున్నానని పవన్ చెప్పారు. సెల్ఫీ తీసుకోలేదని, ఫొటో తీసుకోలేదని తనపై కోపం చూపించవద్దని అభిమానులను కోరారు. కాగా, ప్రజారాజ్యం పార్టీని స్థాపించిన మెగాస్టార్ చిరంజీవి, ఆ తర్వాత పార్టీని కాంగ్రెస్ పార్టీలో విలీనం చేసిన సంగతి తెలిసిందే.