కళ్ళు చెదిరే కోట్ల డబ్బు …నిజాం వారసులకు దక్కేనా ?

భారత-పాకిస్తాన్ దేశాల మధ్య హైదరాబాద్ నిజాం కు చెందిన కోట్లకొద్దీ సొమ్ము (సుమారు 35 మిలియన్ పౌండ్లు) కు సంబంధించిన వివాదం పీక్ స్టేజీకి చేరింది. అది 1947 లో భారత, పాకిస్తాన్ దేశాల మధ్య విభజన జరిగిన సమయం . రెండు దేశాలూ విడిపోయిన కాలం. ఈ సొమ్మును లండన్లోని నాట్ వెస్ట్ బ్యాంకులో డిపాజిట్ చేశారు. నాటి హైదరాబాద్ సంస్థానంలో నిజాం నవాబుకు తాము ఆయుధాలు అందజేశామని, అందువల్ల తమకే ఈ డబ్బు చెందాలని పాకిస్థాన్ కొత్త పల్లవి ఎత్తుకుంది. అయితే పాక్ వాదన సరికాదని, ఈ సొమ్ము తమకే చెందాలని నిజాం వారసులైన ప్రిన్స్ ముకరం జా, ఆయన తమ్ముడు ముఫక్కం జా కోర్టుకెక్కారు. 1948 లో అప్పటి హైదరాబాద్ నిజాం సుమారు 1,007,940 పౌండ్లను బ్రిటన్లోని పాక్ హైకమిషనర్ అకౌంటుకు బదిలీ చేయడంతోనే వివాదం మొదలైంది. ఆ డబ్బు ఏ ఏటికా ఏడు పెరుగుతూ వచ్చింది. కాగా-తమ తాత గిఫ్టుగా ఇచ్చిన ఈ నిధులకోసం ఎనిమిదో నిజాం, ఆయన సోదరుడు దశాబ్దాల తరబడి వేచి చూశారని, కానీ పాకిస్థాన్ 70 ఏళ్లుగా అడ్డు తగులుతోందని వారసుల తరఫు న్యాయవాది పాల్ హెవిట్ ఆరోపిస్తున్నారు. ప్రస్తుతం టర్కీలో ఉన్న ఈయన .. పాకిస్థాన్ వాదన అర్థరహితమన్నారు.1947 ప్రాంతంలో ‘ భారత ఆక్రమణను తాము ఎదుర్కొన్నామని చెబుతున్న ‘ పాకిస్థాన్ కు అసలు ఈ సొమ్ము ఎలా చెందుతుందని ఆయన ప్రశ్నించారు. అటు- లండన్ కోర్టులో జస్టిస్ మార్కస్ స్మిత్ రెండువారాలుగా ఉభయ పక్షాల వాదనలను ఆలకిస్తున్నారు. స్వర్గీయ నిజాం ఉస్మాన్ అలీ ఖాన్ కు చెందిన ఈ నిధులు నిజానికి ఎవరికి చెందాల్సి ఉందని ఆయన ప్రశ్నించారు. చట్టానికి లోబడి తాము తీర్పు ఇవ్వాల్సి ఉందని, కోట్ల కొద్దీ సొమ్ము విషయంలో ఆరు వారాల్లోగా నిర్ణయం తీసుకుంటామని ఆయన పేర్కొన్నారు. కాగా-భారతీయ కరెన్సీలో దాదాపు 309 కోట్లకు పైగా..కళ్ళు చెదిరే రీతిలో లండన్ బ్యాంకులో మూలుగుతున్న ఈ నిధుల విషయంలో భారత ప్రభుత్వం కూడా ఎలా స్పందిస్తున్నది చూడాల్సి ఉంది. పేరుకు ఇది నిజాం వారసులకు చెందాల్సి ఉన్నా.. పాకిస్తాన్ తో ఈ వ్యవహారం ముడిపడిఉన్న సంగతి గమనార్హం. . అసలే ఈ పొరుగు దేశంతో సత్సంబంధాలు అంతగా లేని ఈ తరుణంలో అక్కడి హైకమిషనర్ లండన్ కోర్టులో ఈ కేసు విచారణను ప్రభావితం చేస్తారా అన్న అంశాన్ని న్యాయ నిపుణులు లేవనెత్తుతున్నారు. పాక్-బ్రిటన్ మధ్య గల సంబంధాలను ఈ సందర్భంగా ప్రస్తావిస్తున్నారు.