Christmas: ప్రకాశంజిల్లా వ్యాప్తంగా ఆనందోత్సాహాల మధ్య క్రిస్మస్ సంబరాలు, అర్థరాత్రివరకూ చర్చిలలో క్యాండిల్ లైట్ సర్వీసెస్

ప్రకాశంజిల్లా వ్యాప్తంగా క్రిస్మస్ పర్వదినాన్ని ప్రజలు ఆనందోత్సాహాల మధ్య జరుపుకుంటున్నారు. లోకరక్షకుడైన ఏసుక్రీస్తు రాకను పురస్కరించుకుని చర్చిలను రంగురంగుల విద్యుత్ దీపాలు, స్టార్‌ లతో అనందంగా అలంకరించారు. ప్రజలందరికీ ఏసుక్రీస్తు ఆశీస్సులు అందించాలని, అందరూ సుఖసంతోషాలతో జీవించాలని ఒంగోలులోని పురాతన జూనెట్ మెమోరియల్ బాప్టిస్ట్ చర్చి సంఘకాపరి ఫాదర్ అగస్టీన్ అన్నారు. క్రిస్మస్ పర్వదినాన్ని పురస్కరించుకుని చర్చిలో క్యాండిల్ లైట్ సర్వీస్ నిర్వహించారు. ఈ సందర్భంగా క్రీస్తు గీతాలాపనల మధ్య విశ్వాసులు కొవ్వొత్తులు వెలిగించి ప్రార్దనలు చేశారు. కరోనా నేపధ్యంలో విశ్వాసులు అందరూ మాస్కులు ధరించి ప్రార్ధనల్లో పాల్గొన్నారు. ఒంగోలు పట్టణంలోని చర్చిలు రంగురంగుల విద్యుత్ దీపాలతో కొత్త శోభను సంతరించుకున్నాయి. విశ్వాసుల ప్రార్ధనలు, గీతాలాపనలతో చర్చిలు మార్మోగుతున్నాయి. పట్టణంలోని కబాడిపాలెం, క్లౌపేట, కొత్తపేట ప్రాంతాల్లో క్రిస్టియన్ యూత్ అసోసియేషన్లు క్రీస్తు జన్మ వృత్తాంతాన్ని, క్రీస్తు గాథలను, క్రీస్తు జీవితంలోని ముఖ్య ఘట్టాలను వివరిస్తూ ఏర్పాటు చేసిన ప్రదర్శనలు ఆకట్టుకుంటున్నాయి.