కరోనా భయం.. రాష్ట్రాలకు కేంద్రం ‘అభయం’

దేశంలో కరోనా వైరస్ కేసులు పెరుగుతుండడంతో ఏం చేయాలో దిక్కుతోచని స్థితిలో ఉన్న రాష్ట్రాలకు కేంద్రం ‘అభయమిచ్చింది. ఈ కేసులను క్లినికల్ దశలో.. ముఖ్యంగా విషమ స్థితిలో ఉన్న రోగుల తాలూకు కేసులను మేనేజ్ చేయడానికి ఓ నిపుణుల బృందాన్ని ఏర్పాటు చేసింది. ఢిల్లీ లోని ఎయిమ్స్ లో..ఏర్పాటు చేసిన ఈ గ్రూప్.. అన్ని రాష్ట్రాలు, కేంద్ర పాలిత ప్రాంతాలకు క్లినికల్ సలహాలను, సూచనలను ఇస్తుంది. ప్రతి రాష్ట్రం నుంచి నోడల్ అధికారి లేదా డాక్టర్ తో అనుసంధానం చేస్తూ.. వాట్సాప్ గ్రూప్ ని కూడా నిర్దేశించింది. ఇక అన్ని రాష్ట్రాలు ఈ విధమైన  నిపుణుల బృందాలను నియమించుకోవాలని, ముఖ్యంగా ఐసీయూలలో ఉన్న విషమ కేసులను మేనేజ్ చేసి మరణాల సంఖ్యను తగ్గించాలని ఆరోగ్య శాఖ కార్యదర్శి ప్రీతి సుదాన్.. కోరుతూ ఆయా రాష్ట్రాలకు లేఖలు రాశారు.

కాగా-గత 24 గంటల్లో దేశంలో 11,458  కరోనా కేసులు నమోదు కాగా..386 మంది రోగులు మరణించారు. ముఖ్యంగా ఢిల్లీలో ఎక్కువగా-129 మంది మృత్యుబాట పట్టారు. మహారాష్ట్రలో 127, గుజరాత్ లో 30, యూపీలో 20, తెలంగాణ, పశ్చిమబెంగాల్ రాష్ట్రాల్లో తొమ్మిది మంది చొప్పున మృతి చెందారు. నిన్నటికి దేశంలో మొత్తం కరోనా కేసుల సంఖ్య మూడు లక్షలు దాటింది.