బాడీ మిస్టరీ.. జుట్టు, గోళ్లు కత్తిరిస్తే నొప్పి ఎందుకు ఉండదో తెలుసా..?
శరీరం మీద చిన్న గీత పడితేనే విలవిలలాడిపోతాం.. రక్తం వస్తే ఆందోళన చెందుతాం. కానీ అదే శరీరంలో భాగమైన జుట్టును కత్తెరతో ముక్కలు చేస్తున్నా, గోళ్లను కట్ చేస్తున్నా మనకు అస్సలు నొప్పి ఎందుకు అనిపించదు? రక్తం ఎందుకు రాదు? మనం చిన్నప్పటి నుంచి చూస్తున్న ఈ వింత వెనుక ఒక అద్భుతమైన సైన్స్ దాగి ఉంది. అదేంటో ఇప్పుడు తెలుసుకుందాం..
మన శరీరానికి చిన్న దెబ్బ తగిలినా లేదా చిన్న ముల్లు గుచ్చుకున్నా అబ్బా అని అరుస్తాం. రక్తం వస్తుంది, నొప్పి పుడుతుంది. కానీ అదే శరీరంలో భాగమైన జుట్టును లేదా గోళ్లను కత్తిరిస్తున్నప్పుడు మాత్రం మనకు ఎలాంటి నొప్పి కలగదు. రక్తం అస్సలు రాదు. చిన్నప్పటి నుంచి మనందరినీ వేధించే ఈ ప్రశ్న వెనుక ఉన్న అసలు శాస్త్రీయ రహస్యం ఏంటో మీకు తెలుసా? దీని వెనుక ఉన్నది చనిపోయిన కణాల అద్భుతం గురించి ఇప్పుడు తెలుసుకుందాం..
అన్నీ కణాలే.. కానీ ఇవి వేరు
మన శరీరం మొత్తం కోట్ల కణాలతో నిర్మితమైంది. కానీ జుట్టు, గోళ్లు మాత్రం మన శరీరంలోని ఇతర భాగాల మాదిరిగా సజీవంగా ఉండవు. సైన్స్ ప్రకారం ఇవి చనిపోయిన కణాలతో తయారవుతాయి. చర్మం, కండరాల్లో ఉండే కణాలకు రక్త ప్రసరణ, నరాలు ఉంటాయి. ఏదైనా దెబ్బ తగిలినప్పుడు ఈ నరాలు మెదడుకు సంకేతాలు పంపి నొప్పిని కలిగిస్తాయి. జుట్టు, గోళ్లలో ఈ నరాలు ఉండవు. అందుకే వాటిని కత్తిరించినప్పుడు మెదడుకు ఎలాంటి నొప్పి సంకేతాలు అందవు.
కెరాటిన్ మాయాజాలం
మన జుట్టు, గోళ్లు కెరాటిన్ అనే గట్టి ప్రోటీన్తో తయారవుతాయి. ఇది ఒక నిర్జీవ ప్రోటీన్. చర్మం వెలుపల మనం చూసే జుట్టు భాగం పూర్తిగా చనిపోయిన కణాలతో నిండి ఉంటుంది. అందుకే బార్బర్ షాపులో కత్తెరతో జుట్టు కత్తిరిస్తున్నప్పుడు మనకు అస్సలు భయం లేదా నొప్పి ఉండదు.
గోళ్ల విషయంలో చిన్న ట్విస్ట్
గోళ్ల విషయంలో ఒక చిన్న తేడా ఉంది. గోరు చివర ఉండే తెల్లటి భాగం పూర్తిగా చనిపోయిన కణాలతో తయారవుతుంది. కాబట్టి అక్కడ నొప్పి ఉండదు. కానీ గోరు చర్మానికి అతుక్కుని ఉండే లోపలి భాగం మాత్రం సజీవ కణాలతో తయారవుతుంది. మీరు గోళ్లను బాగా లోపలికి కత్తిరించినప్పుడు లేదా పొరపాటున చర్మానికి తగిలేలా కట్ చేస్తే విపరీతమైన నొప్పి వస్తుంది. ఎందుకంటే ఆ భాగం మన నరాలకు అనుసంధానించబడి ఉంటుంది.
జుట్టును లాగితే ఎందుకు కన్నీళ్లు వస్తాయి?
జుట్టును కత్తిరిస్తే నొప్పి ఉండదు కానీ ఎవరైనా జుట్టును పట్టుకుని గట్టిగా లాగితే మాత్రం కళ్ళల్లో నీళ్లు తిరుగుతాయి. దీనికి కారణం జుట్టు యొక్క మూలం చర్మంలోని జీవ కణాలకు, నరాలకు అనుసంధానించబడి ఉండటమే. కత్తిరించినప్పుడు చనిపోయిన భాగం విడిపోతుంది.. కానీ లాగినప్పుడు లోపల ఉన్న నరాలు ప్రభావితమవుతాయి.
ఒకవేళ జుట్టు, గోళ్లు కత్తిరించినప్పుడు నొప్పి కలిగి ఉంటే మన జీవితం ఎంత నరకంగా ఉండేదో ఊహించండి.. శరీరానికి రక్షణ ఇస్తూనే, కత్తిరించుకోవడానికి వీలుగా నొప్పి లేకుండా ఈ నిర్మాణాన్ని రూపొందించిన ప్రకృతి నిజంగా అద్భుతమైనదే కదా..