Health: సాధరణ ప్రసవం, ఆరు నెలల వరకు తల్లి పాలు ఇస్తే అలాంటి పిల్లలకు జీవితాంతం తిరుగుండదు..
డాక్టర్ నాగేశ్వర రెడ్డి గట్ ఆరోగ్యంపై కీలక సూచనలు చేశారు. మెడిటరేనియన్, ఇండో-మెడిటరేనియన్ డైట్లు, ఫైబర్, పెరుగు, ఉల్లిపాయలు, వెల్లుల్లి వంటి ఆహారాల ప్రాముఖ్యతను ప్రత్యేకంగా ప్రస్తావించారు. పుట్టుక నుంచి మంచి బ్యాక్టీరియా పొందడం, మెటాజినోమిక్స్, ఎఫ్ఎమ్టి వంటి ఆధునిక చికిత్సలను చర్చించారు. హైడ్రోథెరపీ (ఎనిమా) హానికరం అని ఆయన స్పష్టం చేశారు.
ఆరోగ్యకరమైన జీవితానికి గట్ ఆరోగ్యం అత్యవసరమని ప్రముఖ గ్యాస్ట్రో ఎంటరాలజిస్ట్ డాక్టర్ నాగేశ్వర రెడ్డి వివరించారు. మన కడుపులోని బ్యాక్టీరియా మెదడు నియంత్రణలో కీలక పాత్ర పోషిస్తుందని, శరీరంలో అన్ని వ్యాధులకు మూలం గట్లోనే ఉందని పురాతన వైద్యుడు చరక కూడా తన గ్రంథంలో పేర్కొన్నారని ఆయన గుర్తు చేశారు. ఆధునిక పరిశోధనలు ఈ సిద్ధాంతాన్ని బలపరుస్తున్నాయి. మెడిటరేనియన్ డైట్, ముఖ్యంగా గ్రీస్, ఇటలీ, ఇజ్రాయెల్ ప్రాంతాల్లోని ప్రజలు పాటించే ఆహారం, గట్ ఆరోగ్యాన్ని మెరుగుపరుస్తుందని అధ్యయనాలు చెబుతున్నాయి. ఈ డైట్లో ఆలివ్ ఆయిల్, నట్స్, పండ్లు, చేపలు అధికంగా ఉంటాయి. ఈ ఆహారం తీసుకునేవారిలో మంచి బ్యాక్టీరియా పెరిగి, వారు ఎక్కువ కాలం జీవిస్తున్నారని, గుండె జబ్బులు తక్కువగా వస్తున్నాయని డాక్టర్ పేర్కొన్నారు.
అయితే, భారతీయుల ఆహారపు అలవాట్లకు మెడిటరేనియన్ డైట్ పూర్తిగా సరిపోదు. అందుకే, ఇజ్రాయెల్లోని ఒక పోషకాహార సంస్థతో కలిసి ఇండో-మెడిటరేనియన్ డైట్ను రూపొందించారు. దీనిలో మన దోశలు, ఇడ్లీలు, ఆలివ్ ఆయిల్తో చేసి పరిశోధన చేశారు. 50 మంది డాక్టర్లతో ఈ డైట్పై ఒక పరిశోధన నిర్వహించారు. మూడు నెలల తర్వాత, ఇండో-మెడిటరేనియన్ డైట్ తీసుకున్న డాక్టర్లకు ఆరోగ్యం మెరుగుపడి, సగటున మూడు కిలోల బరువు తగ్గారని గుర్తించారు. దీనికి కారణం వారిలోని గట్ బ్యాక్టీరియాలో సానుకూల మార్పులే. మంచి బ్యాక్టీరియా పెరిగి, చెడు బ్యాక్టీరియా తగ్గిపోయింది. ఈ ఫలితాలతో డాక్టర్ నాగేశ్వర రెడ్డి స్వయంగా తన ఆహారపు అలవాట్లను మార్చుకున్నారు. గట్ బ్యాక్టీరియా పుట్టుక నుంచే ప్రభావితం అవుతుంది. సాధారణ కాన్పు ద్వారా పుట్టిన శిశువులకు, ఆరు నెలల వరకు తల్లిపాలు తాగిన వారికి ఆరోగ్యకరమైన బ్యాక్టీరియా ఉంటుంది. సిజేరియన్ డెలివరీలు, ఆరు నెలల లోపు యాంటీబయాటిక్స్ వాడకం, తల్లిపాలు ఇవ్వకపోవడం వంటివి చెడు బ్యాక్టీరియా పెరగడానికి దారితీస్తాయి. జీవితాంతం ఈ ప్రభావం ఉంటుందని డాక్టర్ రెడ్డి హెచ్చరించారు. తల్లిపాలను ఆరు నెలల వరకు ఇవ్వడం, అనవసరంగా యాంటీబయాటిక్స్ వాడకుండా ఉండటం ద్వారా పిల్లలలో మంచి బ్యాక్టీరియాను పెంపొందించవచ్చని ఆయన సూచించారు.
గట్ బ్యాక్టీరియాను మెరుగుపరచడానికి ఆరోగ్యకరమైన ఆహారపు అలవాట్లు ముఖ్యం. ఫైబర్ అధికంగా ఉండే వెజిటేరియన్ ఆహారాలు, నట్స్, పండ్లు, కూరగాయలు, ఇంట్లో తయారుచేసిన పెరుగు (యోగర్ట్), మజ్జిగ, జున్ను వంటి ప్రోబయాటిక్లు గట్ ఆరోగ్యానికి మంచివి. ఉల్లిపాయలు, వెల్లుల్లి, ఆపిల్, నారింజ వంటి ప్రీబయాటిక్ ఆహారాలు మంచి బ్యాక్టీరియా వృద్ధికి తోడ్పడతాయి. మెటాజినోమిక్స్ పరీక్ష ద్వారా కడుపులో ఉన్న బ్యాక్టీరియా రకాలను, మంచి, చెడు బ్యాక్టీరియా నిష్పత్తిని తెలుసుకోవచ్చని డాక్టర్ రెడ్డి తెలిపారు. దీని ఆధారంగా ఆహారపు మార్పులు లేదా నిర్దిష్ట బ్యాక్టీరియా క్యాప్సూల్స్ ద్వారా గట్ ఆరోగ్యాన్ని మెరుగుపరచవచ్చన్నారు. యాసిడిటీ మందులు, కొన్ని యాంటీబయాటిక్స్ కూడా గట్ బ్యాక్టీరియాను ప్రభావితం చేస్తాయి. గట్ బ్యాక్టీరియా చికిత్స అల్సరేటివ్ కొలైటిస్, కాలేయ వ్యాధులు, డిప్రెషన్, ఆటిజం వంటి తీవ్రమైన వ్యాధుల చికిత్సలోనూ సహాయపడుతుంది.
ఉదాహరణకు, హైదరాబాద్లోని ఒక పిల్లల ఆసుపత్రిలో ఆటిజం ఉన్న పిల్లలకు బ్యాక్టీరియా చికిత్స అందిస్తున్నారని, వారిలో 70% మంది మెరుగుపడుతున్నారని డాక్టర్ రెడ్డి పేర్కొన్నారు. అలాగే, పీకల్ మైక్రోబయల్ ట్రాన్స్ప్లాంటేషన్ (ఎఫ్ఎమ్టి) గురించి మాట్లాడుతూ, ఆరోగ్యకరమైన వ్యక్తి మలంలోని మంచి బ్యాక్టీరియాను సేకరించి, దాన్ని బ్యాంక్లలో నిల్వ చేసి, అవసరమైన వారికి బ్లడ్ డొనేషన్ లాగా అందించవచ్చని చెప్పారు. హాంగ్కాంగ్లో ఇప్పటికే ఇలాంటి స్టూల్ బ్యాంక్లు ఉన్నాయని, భవిష్యత్తులో ఇవి విస్తరిస్తాయని వివరించారు. అయితే, కొన్ని ప్రచారంలో ఉన్న పద్ధతులు హానికరం అని ఆయన స్పష్టం చేశారు. కోలన్ హైడ్రోథెరపీ (వాటర్ ఎనిమా) అనేది అశాస్త్రీయమని, దీనివల్ల గట్ బ్యాక్టీరియా మారదని, రక్తంలో సోడియం, క్లోరైడ్ తగ్గి ప్రాణాంతకం కావచ్చని, ఇన్ఫెక్షన్లు కూడా రావచ్చని హెచ్చరించారు. ఈ పద్ధతి అస్సలు ఆమోదించబడలేదని డాక్టర్ నాగేశ్వర రెడ్డి అన్నారు. గట్ ఆరోగ్యంపై నిరంతరం పరిశోధనలు జరుగుతున్నాయని, రాబోయే సంవత్సరాల్లో అనేక కొత్త చికిత్సా పద్ధతులు అందుబాటులోకి వస్తాయని ఆయన ఆశాభావం వ్యక్తం చేశారు.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి.