Tuck Jagadish: సినిమా అంటే నాకు ఎంతో ఇష్టం.. ‘టక్ జగదీష్’ మూవీలో ఫ్యామిలీలో ఉండే అన్నీ ఎమోషన్స్‌ ఉన్నాయి: నాని

Tuck Jagadish: విభిన్నమైన కథలతో నటుడిగా ప్రత్యేకమైన గుర్తింపు తెచ్చుకుని.. తనకంటూ ప్రత్యేక అభిమానాన్ని ఏర్పాటు చేసుకున్నారు నేచురల్‌ స్టార్‌ నాని. తరచూ..

Tuck Jagadish: సినిమా అంటే నాకు ఎంతో ఇష్టం.. ‘టక్ జగదీష్’ మూవీలో ఫ్యామిలీలో ఉండే అన్నీ ఎమోషన్స్‌ ఉన్నాయి: నాని

Tuck Jagadish: విభిన్నమైన కథలతో నటుడిగా ప్రత్యేకమైన గుర్తింపు తెచ్చుకుని.. తనకంటూ ప్రత్యేక అభిమానాన్ని ఏర్పాటు చేసుకున్నారు నేచురల్‌ స్టార్‌ నాని. తరచూ ప్రేమకథా సినిమాలతో ప్రేక్షకులను అలరించే నాని కథానాయకుడిగా నటించిన సరికొత్త చిత్రం ‘టక్‌ జగదీశ్‌’. తెలుగింటి కుటుంబకథా చిత్రంగా తెరకెక్కిన ఈ సినిమాకి శివ నిర్వాణ దర్శకత్వం వహించారు. వినాయక చవితి పర్వదినాన్ని పురస్కరించుకుని మరికొన్ని గంటల్లో ఈ సినిమా ప్రేక్షకుల ముందుకు వచ్చేందుకు సిద్ధమైంది. ఈ నేపథ్యంలో ‘టక్‌ జగదీశ్‌’ ప్రమోషన్స్‌లో భాగంగా నాని మీడియాతో మాట్లాడారు.

సినిమా అంటే నాకు ఎంతో ఇష్టం. ముఖ్యంగా సినిమా థియేటర్‌లో ప్రేక్షకులతో కలిసి మూవీ చూడటం ఇష్టం. కోవిడ్‌ కారణంగా పరిస్థితులు మారిపోయాయి. అందువల్లే ‘టక్‌ జగదీశ్‌’ సినిమాను ఓటీటీలో విడుదల చేస్తున్నాము. బిగ్‌ స్క్రీన్‌ని ఎంతగానో మిస్‌ అవుతున్నా. గత ఏడాది వీ సినిమాతో వచ్చాను. ఈ సారి టక్ జగదీష్ చిత్రంతో వస్తున్నాను. అయితే పరిస్థితులు అనుకూలించకపోవడంతే ఇలా రావాల్సి వచ్చింది. ఎప్పుడైతే అంతా సెట్ అవుతుందో థియేటర్‌లోకి వచ్చేందుకు రెడీగా చాలా సినిమాలు ఉన్నాయి. నేను ఏదో సినిమా డబ్బింగ్ పనుల్లో ఉన్నప్పుడు శివ ఫోన్ చేశారు. ఓ కథను చెప్పాలని అన్నారు. అప్పటికే మజిలీ సూపర్ హిట్ అయి ఉంది. మళ్లీ అలాంటి కథే చెబుతారేమో అనుకున్నాను. ఆ జానర్ అయితే వద్దని చెబుదామని అనుకున్నాను. ఇలా ఫోన్‌లో నో చెప్పడం ఎందుకు.. నేరుగా చెబుదామని అనుకున్నాను. అప్పటికీ కథ అంతా కూడా పూర్తి కాలేదు. కానీ ఓపెనింగ్ లైన్ చెప్పాడు. భూదేవీపురం, భూమి తగాదాలు అని చెప్పారు.

నాజర్ లాంటి పెద్ద మనిషి వాయిస్ వినిపిస్తుంది.. అరేయ్ జగదీ.. మగవాడు ఏడవకూడదు.. అమ్మాయిలను ఏడిపించకూడదు అని చెబుతాడు. అలా చెప్పడంతోనే కనెక్ట్ అయిపోయాను. ఇంత వరకు సంబంధం లేని జానర్‌ను టచ్ చేయబోతోన్నాడని తెలిసింది. శివ నిర్వాణ ఎమోషన్‌ను బాగా హ్యాండిల్ చేయగలరు. అలాంటి వారు ఫ్యామిలీ సినిమాలను ఇంకా బాగా చేయగలరు. ఇలాంటి సినిమా చేయాలని ఎప్పటి నుంచో అనుకున్నాను. దానికి శివ నిర్వాణ దర్శకుడు అవ్వడం ఇంకా హ్యాపీ.

ఈ సినిమా అనుకున్నప్పుడు టైటిల్ టక్ జగదీష్ కాదు. అది క్యారెక్టర్ పేరు. ఇందులో ప్రతీ ఒక్క పాత్రకు మంచి మంచి క్యారెక్టర్ పేర్లు ఇచ్చారు. శివ నిర్వాణలో నాకు అదే నచ్చుతుంది. ఆయన చూసిన, తెలిసిన ఫ్యామిలీ మెంబర్ల పేర్లు పెడతాడు. అందుకే అవి రియలిస్టిక్‌గా ఉంటాయి. అదే పెద్ద బలం. అలా నాకు జగదీష్ అని పెట్టారు. అయితే దానికి టక్ అని ముందు పెట్టారు. అతను టక్ ఎందుకు వేసుకుంటాడు అనేది ద్వితీయార్థంలో రివీల్ చేస్తారు. అది శివ ఎంతో అద్బుతంగా రాశారు. ఆ సీన్‌కు ఎంతో మంది కనెక్ట్ అవుతారు.

ఫ్యామిలీ డ్రామాలో ఉన్న కాంప్లెక్సిటీని ముందు శివ నిర్వాణ చెప్పారు. నేను దాన్ని ట్విస్ట్‌గా అనుకోవడం లేదు. మర్డర్ మిస్టరీలో ఉండే ట్విస్టులు కావు. మనం ఓ వ్యక్తిని ఒకలా అనుకుంటాం. కానీ అతను అలాంటివాడు కాదని తెలుస్తుంది. దాన్ని కథలో అందంగా తీసుకొచ్చారు శివ నిర్వాణ. రీతూ వర్మ ఏమో లవ్ ఇంట్రెస్ట్. ఫ్యామిలీ ఎమోషన్స్‌తో ఉన్న సినిమాలో రీతూ వర్మ ఓ రిలాక్స్‌లా అనిపిస్తుంది. ఈ కథ, డ్రామాకు ఆయువుపట్టు ఐశ్వర్య రాజ్ పాత్ర. చంద్రమ్మ పాత్రలో ఐశ్వర్య కనిపిస్తారు. చంద్రమ్మ కోసం టక్ ఎంత దూరం వెళ్తాడన్నదే కథ.

ఫ్యామిలీలో ఉండే ఎమోషన్స్‌..

అయితే ఫ్యామిలీలో ఉండే అన్ని ఎమోషన్స్ ఇందులో ఉంటాయి. కానీ ఈసినిమాకు ముందుండే రెండు ఎమోషనల్ క్యారెక్టర్స్ అన్నదమ్ములు. బోసు, జగదీష్ మధ్య ఉండే సంఘర్షణను శివ నిర్వాణ ఎంతో అద్భుతంగా హ్యాండిల్ చేసేశారు. హీరో ఎంత తపన పడతాడో అనే యాంగిల్‌లోనే తెలుగు సినిమాలు ఉంటాయి. కానీ హీరో నాన్న యాంగిల్‌లోంచి చూడరు. కానీ శివ నిర్వాణ సినిమాలో ప్రతీ క్యారెక్టర్‌లోకి వెళ్తారు. అందువల్లే ప్రతీ పాత్ర హైలెట్ అవుతుంది.

ఎంటర్టైన్మెంట్ అంటే మనల్ని ఎంగేజ్ చేయడం. అంతే కానీ కేవలం కామెడీనే కాదు. రెండున్నర గంటలు మీరు సినిమాను చూసి.. దాంట్లోనే ఇన్వాల్వ్ అయి బయటకు వచ్చారనుకోండి. అది ఎంటర్టైన్మెంట్. నటుడిగా అన్ని రకాల సినిమాలు, పాత్రలు చేయాలి. నటుడు అంటే ఏంట్రా.. వాళ్లు ఏడిస్తే మనం ఏడవాలి..వాళ్లు నవ్వితే మనం నవ్వాలి అనే మాటలు చిన్నతనంలో విన్నాను. అది అలా నాటుకుపోయింది. పిల్ల జమీందార్, భలే భలే మగాడివోయ్ వంటి సినిమాల్లో ఎప్పుడూ మిస్ అవ్వలేదు. అంటే సుందరానికీ అనే సినిమాలో సీటులో ఎవ్వరూ కూర్చుండలేరు. వస్తే అలాంటి సినిమాతో రావాలి. నవ్వించిన సినిమాలు, ఏడిపించిన సినిమాలున్నాయి. కంప్లీట్ యాక్టర్ అన్న ఫీలింగ్ వస్తుంది. అన్ని రకాల సినిమాలు చేయాలి.. నన్ను నేను పరీక్షించుకోవాలి అంటూ నాని చెప్పుకొచ్చారు. చాలెంజింగ్ ఉన్న పాత్ర ఇస్తేనే నాకు కథకు ఓకే చెప్పాలనిపిస్తుంది. శ్యాం సింఘరాయ్ అద్భుతంగా ఉండబోతోంది. ఇకపై కొత్త నానిని చూస్తారు అని అన్నారు.

హిట్లు, సక్సెస్ వెంటపడుతూ..

మంచి మార్కెట్ ఉన్న హీరోగా ఉండాలా? మంచి నటుడిగా ఉండాలా? అనే దాన్ని బట్టి కథల ఎంపిక ఉంటుంది. అందుకే ఒకే రకమైన పాత్రలను చేయాలని అనుకోలేదు. వీ, టక్ జగదీష్ వంటి సినిమాలు చేశాను. కాబట్టి అందుకే అంటే సుందరానికి అనే ప్రేమ కథను చేస్తున్నాను.

సక్సెస్‌ అవుతుందని తెలిసి వదిలేసిన సినిమాలున్నాయి:

సూపర్ సక్సెస్ అవుతుందని తెలిసి కూడా వదిలేసిన సినిమాలున్నాయి. అందులో రాజా రాణి ఒకటి. నేను అట్లీని ఇంట్రడ్యూస్ చేయాల్సింది. కానీ అప్పుడు నేను పైసా, ఎటో వెళ్లిపోయింది మనసు చేస్తున్నాను. నాకోసం ఏడాది ఆగడం మంచిది కాదు అని నిర్మాతలకు చెప్పాను. ఈ సినిమా సూపర్ సక్సెస్ అవుతుందని, పెద్ద దర్శకుడు అవుతాడని కూడా చెప్పాను. అలానే అయింది. ఇక ఎఫ్ 2 కథ సైతం విన్న వెంటనే బ్లాక్ బస్టర్ అని చెప్పాను. నా కోసం అనిల్, దిల్ రాజు గారు నాతో అనుకున్నారు. కానీ అది నా స్పేస్ కాదని అనుకున్నాను.

నాకు రీమేక్స్‌ సరిపోవు..

నాకు రీమేక్స్ సరిపోవు. రీమేక్స్ చేయాలనే ఉద్దేశ్యం నాకు లేదు. కెరీర్ ప్రారంభంలో చేశాను అని అన్నారు. భీమిలి కబడ్డీ జట్టు, ఆహా కళ్యాణం చేశాను. ఇప్పటికీ భీమిలీ కబడ్డీ జట్టు సినిమాకు అభిమానులున్నారు. కానీ ఆహా కళ్యాణం అంతగా ఆడలేదు. రీమేక్స్ చేయకూడదని ఫిక్స్ అయ్యాను. నాలో ఉందని నాకే తెలియందని, మీకు కొత్తగా చూపించాలనే ఆలోచనలకు రీమేక్ సరిపోవు. మనం సినిమాలు చేద్దాం. మన సినిమాలను వాళ్లు రీమేక్ చేసేలా చేద్దాం. ఇప్పుడు నా ఆరు సినిమాలో ఇతర భాషల్లో రీమేక్ అవుతున్నాయి.

టక్ జగదీష్ సినిమా తెలుగు ప్రేక్షకుల కథ. తెలుగు కుటుంబాలకు సంబంధించిన కథ. ఇది రీమేక్ అయ్యే చాన్స్ లేదు. ఇది తెలుగు సినిమా మాత్రమే. అమెజాన్‌లో ఈ సినిమాను సబ్ టైటిల్స్‌లో ఇతర భాషల వారు చూసి.. బాగుందని అంటే చాలు.

సబ్‌ టైటిల్స్‌ చూసి సినిమాలను చూసేస్తున్నారు..

సబ్ టైటిల్స్ చూసి సినిమాలను చూసేస్తున్నారు. నాక్కూడా అది అలవాటు అయింది. ఇప్పుడు మనీ హీస్ట్ సిరీస్ ఉంది. దాన్ని వేరే భాషలో తీశారు. కానీ ఇంగ్లీష్‌లోకి డబ్ చేశారు. నాకు సబ్ టైటిల్స్ అలవాటు అయ్యాక.. ఇంగ్లీష్‌లో చూడాలనిపించడం లేదు. స్పానిష్‌లోనే చూస్తున్నాను. ఇప్పుడు దేశంలో అందరికీ సబ్ టైటిల్స్‌తో సినిమాను చూడటం అలవాటు చేసుకుంటున్నారు అని అన్నారు. అందుకే ఇంకొన్ని రోజుల్లో ఒరిజినల్ లాంగ్వేజ్‌లోనే సబ్ టైటిల్స్‌తో సినిమాలు చూడటానికే ఇష్టపడతారు. అందుకే మంచి సినిమాను చేస్తే.. సబ్ టైటిల్స్‌తో అందరూ చూస్తారు. అందుకే నేను ప్యాన్ ఇండియా అనే దాన్ని అంతగా నమ్మను.

అలా అన్నప్పుడు బాధేసింది..

నాని ఫాస్ట్‌గా సినిమాలు రెడీ చేస్తున్నాడు. ఫస్ట్ వేవ్‌లో ఒకటి, సెకండ్ వేవ్‌లో మరొకటి వచ్చాయి. మిగతా వాళ్ల సినిమాలు రెడీగా లేవు. అందుకు ఎగ్జిబిటర్లు అలా అన్నప్పుడు బాధేసింది. థియేటర్లు సెట్ అయితే.. నేను మూడు సినిమాలు ఇచ్చేందుకు రెడీగా ఉన్నాను. టక్ జగదీష్ వెళ్లిపోతోందని వారు బాధపడుతున్నారు. కానీ మీరు రెడీ అంటే.. రెండు మూడు సినిమాలు ఇచ్చేందుకు నేను కూడా రెడీగా ఉన్నాను. పరిస్థితులు బాగా లేకపోయినా కూడా కరోనా మహమ్మారి సమయంలోనూ ఎంతో కష్టపడ్డాం. ఇలాంటి సమయంలోనూ ఫ్యామిలీ అంతా ఇంట్లోనే కూర్చుని చూసే మంచి సినిమా ఇస్తున్నాను. ఇక ఈ కరోనా సమయంలో నా సినిమాల వల్ల ఎంతో మందికి పని దొరికింది. రేపు థియేటర్లు రెడీ అవ్వగానే శ్యాం సింఘరాయ్ కూడా ఉంది. ఇంతకంటే ఏం కావాలి. ఎలా చెప్పాలి.

ఓటీటీ మరో ప్లాట్‌ ఫామ్‌..

ఓటీటీ అనేది ఆడియెన్స్‌ను ఎడ్యుకేట్ చేస్తుంది. తద్వారా ఇండస్ట్రీ కూడా అప్‌గ్రేడ్ అవుతుంది. సినిమాలకు మరో ఫ్లాట్ ఫాంలా ఉంటుంది. అన్ని రకాలుగా మంచిదే. అయితే థియేటర్లు అనేది ఎప్పటికీ ఉంటుంది. థియేటర్లు మూతపడతాయి అని అనుకునేవాళ్లకు వాటి గొప్పదనం తెలియదన్నట్టే. థియేటర్లను కొట్టే ఆప్షన్ ప్రపంచంలో లేదు. ఇంటర్వెల్ కార్డ్ పడటం లేదని చాలా బాధపడ్డాను. అమెజాన్ వాళ్లు అలా వేయరు అని తెలుసు. అయితే ట్విట్టర్‌లో షేర్ చేస్తాను. ఆ ఫ్రేమ్ ఇంటర్వెల్ అని చెప్పేందుకు పోస్ట్ చేస్తాను. అమెజాన్ వారు ఇంటర్వెల్ ఇవ్వకపోయినా నేను ఇస్తాను.

హిట్‌ సీక్వెల్ అద్భుతంగా ఉండబోతోంది. మొదటి పార్ట్ కంటే సూపర్‌గా ఉంటుంది. అడివి శేష్‌తో చేస్తున్నాం. దాదాపుగా 70 శాతం షూటింగ్ అయింది. ఇక మూడో పార్ట్ అంతకు మించి అనేలా ఉంటుంది. మీట్ క్యూట్ కూడా స్పెషల్‌గా ఉండబోతుంది. దానికి మా అక్క దర్శకురాలు. చిన్నప్పటి నుంచి తిరిగిన, చూసిన మా అక్కలో ఇంత టాలెంట్ ఉందా? అని షాక్ అయ్యాను. మీట్ క్యూట్‌తో అక్క నన్ను మరిచిపోయేలా చేస్తుంది. సీటీమార్, తలైవి అద్భుతంగా విజయం సాధించాలి. అందరూ అన్ని జాగ్రత్తలు తీసుకుని థియేటర్లకు వెళ్లి సినిమాలు చూడండి. అలాగే టక్ జగదీష్ చిత్రాన్ని కూడా చూడండి.

ఇవీ కూడా చదవండి:

Tollywood Drugs Case: టాలీవుడ్‌ డ్రగ్‌ కేసు.. ఈడీ ముందు నటుడు రవితేజ.. ముగిసిన విచారణ

Sonu Sood: అందరినీ చల్లగా చూడమ్మా.. దుర్గమ్మను దర్శించుకున్న నటుడు సోనూ సూద్ ..

Click on your DTH Provider to Add TV9 Telugu