టోక్యో వేదికపై తళుక్కుమన్న తెలుగింటి కోడలు..! ప్రబల్ గురుంగ్ డ్రెస్సులో స్టార్
దక్షిణాది సినిమాలతో ప్రస్థానం మొదలుపెట్టి, ఇప్పుడు పాన్ ఇండియా స్థాయికి ఎదిగిన నటీమణుల జాబితాలో మొదటి వరుసలో ఉండే పేరు రష్మికా మందన్నా. నటనతోనే కాకుండా తనదైన శైలిలో ప్రపంచవ్యాప్తంగా గుర్తింపు పొందుతున్న ఈ భామ, తాజాగా టోక్యోలో జరిగిన వేడుకలో సందడి చేశారు. జపాన్ రాజధాని టోక్యో వేదికగా జరిగిన 2026 క్రంచీరోల్ యానిమే అవార్డ్స్లో ఆమె పాల్గొనడం భారతీయ సినీ అభిమానులకు గర్వకారణంగా మారింది. గత రెండేళ్లుగా ఈ వేడుకలో అవార్డు ప్రెజెంటర్గా వ్యవహరిస్తూ, అంతర్జాతీయ స్థాయిలో తన ముద్ర వేస్తోంది.
ప్రపంచ ప్రఖ్యాత డిజైనర్ ప్రబల్ గురుంగ్ రూపొందించిన ప్రత్యేకమైన గౌనులో మెరిసిపోయింది రష్మిక. కేట్ హడ్సన్, ఎయిజా గొంజాలెజ్ వంటి హాలీవుడ్ స్టార్లకు డిజైన్లు చేసిన ప్రబల్ గురుంగ్ చేతిలో రూపుదిద్దుకున్న ఈ నల్లటి సీక్విన్డ్ గౌను ఆమెకు అదిరిపోయే లుక్ ఇచ్చింది. స్ట్రాప్లెస్ డిజైన్తో కూడిన ఈ గౌనుపై ఉన్న పూల అలంకరణలు ఆమెకు రాజసం ఉట్టిపడేలా చేశాయి. జుట్టును సున్నితమైన తరంగాల వలె స్టైల్ చేసుకుని, మెరిసే మేకప్తో ఆమె వేదికపై ప్రత్యేక ఆకర్షణగా నిలిచింది. మెడలో ధరించిన విలువైన రత్నాల నెక్లెస్ ఆమె అందానికి మరింత వన్నె తెచ్చింది. నలుపు రంగు స్టైలెట్టోలతో తన లుక్ను పరిపూర్ణం చేసింది.
భారతీయ ప్రతినిధిగా యానిమే ప్రపంచంలో..
టోక్యోలోని గ్రాండ్ ప్రిన్స్ హోటల్ షిన్ తకనావాలో జరిగిన ఈ ప్రతిష్టాత్మక కార్యక్రమంలో ఆమె పాలుపంచుకున్నారు. ‘బ్లాక్ పాంథర్’ ఫేమ్ విన్స్టన్ డ్యూక్తో కలిసి ‘బెస్ట్ యానిమేషన్ ఆఫ్ ది ఇయర్’ అవార్డును అందించడం విశేషం. ఈ విభాగం ఈ రాత్రికి అత్యంత ఆసక్తికరమైన అంశంగా నిలిచింది. విన్స్టన్తో ఆమె చేసిన సరదా సంభాషణలు, వేదికపై ఆమె ప్రదర్శించిన ఆత్మవిశ్వాసం ప్రేక్షకులను మంత్రముగ్ధులను చేశాయి.
యానిమే సంస్కృతి ప్రపంచవ్యాప్తంగా ఫ్యాషన్, సంగీతం, కథనాల్లో కీలక పాత్ర పోషిస్తోంది. ఇప్పుడు భారత్ కూడా ఈ ఆసియా పాప్ సంస్కృతిలో భాగస్వామి అవుతోంది. తనకు యానిమే అంటే ఉన్న మక్కువను ఇప్పటికే పలు సందర్భాల్లో వెల్లడించిన రష్మిక భారత్కు, జపాన్కు మధ్య ఉన్న సాంస్కృతిక వారధిగా వ్యవహరిస్తోంది. తనదైన నటనతోనే కాకుండా, అంతర్జాతీయ వేదికలపై భారతీయతను చాటిచెబుతున్న ఆమె ప్రయాణం యువతకు ఎంతో స్ఫూర్తినిస్తోంది. ఇలాంటి మరిన్ని అంతర్జాతీయ వేదికలపై మన తారలు మెరవాలని సినీ ప్రేమికులు కోరుకుంటున్నారు.