Nandini Reddy: మురారి సెట్‌లో మహేశ్‌ని పేరు పెట్టి పిలిస్తే ఏమన్నాడో తెలుసా..?

ప్రముఖ దర్శకురాలు నందిని రెడ్డి  ఓ సందర్భంలో నటుడు మహేష్ బాబుతో తనకున్న ప్రత్యేక బంధం, అలాగే పరిశ్రమలోని ఇతర నటులతో తన సాన్నిహిత్యం గురించి వివరించారు. ముఖ్యంగా, మురారి సినిమా షూటింగ్‌ సమయంలో మహేష్ బాబుతో జరిగిన ఒక సరదా సంఘటనను ఆమె గుర్తుచేసుకున్నారు. నందిని రెడ్డి ఇండస్ట్రీలోకి కొత్తగా వచ్చినప్పుడు, యూనివర్సిటీ అలవాట్ల ప్రకారం ఎవరినైనా పేరుపెట్టి పిలిచేవారని, అదేవిధంగా మహేష్ బాబును కూడా “మహేష్ షాట్ రెడీ” అని పిలిచానని తెలిపారు. దీనికి మహేష్ బాబు ఆశ్చర్యపోయి, “నువ్వేం మహేష్ అంటున్నావ్” అని అడిగినప్పుడు, నందిని రెడ్డి “బాబు బేబీ అనాలా?” అని సరదాగా బదులిచ్చారట. దీంతో మహేశ్ ఘొల్లున నవ్వారట. ఈ సంఘటన తర్వాత మహేష్ బాబుతో తనకు మంచి స్నేహం ఏర్పడిందని నందిని రెడ్డి వివరించారు. మహేష్ బాబు చాలా డౌన్-టు-ఎర్త్ వ్యక్తి అని, ఎప్పుడూ తాను ఒక పెద్ద స్టార్ అనే వైఖరి ప్రదర్శించలేదని ఆమె ప్రశంసించారు. మురారి సినిమా షూటింగ్‌ సమయంలో మహేష్ బాబు నటనకు ఆశ్చర్యపోయానని నందిని రెడ్డి చెప్పారు. ప్రారంభంలో, మహేశ్ మురారి సినిమాలోని హీరో పాత్రను చేయగలడా అనే సందేహం వచ్చిందని, అయితే మహేష్ అద్భుతంగా నటించారని ఆమె అన్నారు. ఈ విషయాన్ని ధైర్యంగా మహేష్‌కే చెప్పానని, తన మదిలో ఎటువంటి దురుద్దేశం లేదని, కేవలం తన తెలియనితనంతోనే అలా మాట్లాడానని అన్నారు. మహేష్ బాబు తన మాటలను స్పోర్టివ్‌గా తీసుకుని, తమ మధ్య దూరాన్ని తగ్గించుకున్నారని నందిని రెడ్డి వెల్లడించారు.

ఇండస్ట్రీలో అందరూ మహేష్ బాబును బాబు అని పిలిస్తే, సరదా పేర్లతో పిలుచుకునేంత స్థాయికి వెళ్లిందని ఆమె తెలిపారు. నందిని రెడ్డి మురారి సినిమా షూటింగ్‌ అనుభవాన్ని తన జీవితంలోనే ఉత్తమమైనదిగా అభివర్ణించారు. షూటింగ్ చివరి రోజు కన్నీళ్లు కూడా వచ్చాయని, ఇప్పటికీ మహేష్ బాబు ఎక్కడ కలిసినా అదే చనువుతో మాట్లాడతారని ఆమె అన్నారు. మహేష్ బాబు దర్శకురాలిగా తనను బాగా ప్రోత్సహించారని తెలిపారు. తన సోదరి మంజుల  సినిమా చేయమని మహేష్ స్వయంగా ఫోన్ చేసి ప్రోత్సహించారని గుర్తుచేసుకున్నారు. అల్లరి స్వభావం, మంచి మనుసు ఉన్న వ్యక్తిగా మహేష్ బాబును నందిని రెడ్డి అభివర్ణించారు. వారి మధ్య నాటి స్నేహం ఇప్పటికీ మారలేదని, ఆ మధ్య ఓ ఫంక్షన్లో కూడా మహేష్ సరదాగా జోకులు వేస్తూ పాత రోజులను గుర్తుచేశారని ఆమె చెప్పారు. మహేష్ బాబుతో పాటు, అల్లు అర్జున్ (బన్నీ), జూనియర్ ఎన్టీఆర్ (తారక్) కూడా తనకు మంచి స్నేహితులని నందిని రెడ్డి తెలిపారు. బన్నీ హీరో అవకముందు నుంచే తనకు తెలుసని, తారక్ కూడా తనతో ఎంతో చనువుగా ఉంటాడని, జోవియల్‌గా ఉంటాడని ఆమె అన్నారు. అయితే, ప్రభాస్ విషయంలో మాత్రం తనకున్నది అభిమానమని, “ప్రభాస్ గారు” అని పిలుస్తానని చెప్పారు. ప్రభాస్ అంటే తనకు ఆల్ టైమ్ ఫేవరెట్ అని, తన క్రష్ అని, ఆయనను చూస్తే మెస్మరైజ్ అయిపోతానని నందిని రెడ్డి వెల్లడించారు. చక్రం సినిమా షూటింగ్‌ సమయంలో వంశీ గారిని చూడటానికి వెళ్లినప్పుడు, దూరం నుండి ప్రభాస్‌ని చూసి సిగ్గుపడ్డానని ఆమె తెలిపారు. ఇప్పటికీ ఎక్కడైనా పార్టీలలో ప్రభాస్ కనిపిస్తే దూరం నుంచే చూస్తుంటానని నందిని రెడ్డి పంచుకున్నారు.

మరిన్ని సినిమా వార్తల కోసం ఇక్కడ క్లిక్ చేయండి