Rajinikanth: రజనీకాంత్ సినిమాకు రూ.40 కోట్ల నష్టం..! డైరెక్టర్ మొండితనమే కారణం..
ఆయన సినిమాల్లో హింస ఒక కళలా కనిపిస్తుంది. యాక్షన్ ఎపిసోడ్స్ థియేటర్లలో ప్రేక్షకులకు పూనకాలు తెప్పిస్తాయి. ఇక ‘తలైవా’ లాంటి మాస్ ఐకాన్ తో ఆ దర్శకుడు చేతులు కలిపితే రికార్డులు బద్దలవ్వాల్సిందే. ‘కూలీ’ సినిమా విషయంలో కూడా అదే జరిగింది.
భారీ అంచనాల మధ్య విడుదలైన ఈ సినిమా వందల కోట్లు కొల్లగొట్టింది. అయితే ఈ సినిమాకు వచ్చిన వసూళ్లు ఒక ఎత్తయితే, రాకుండా పోయిన వసూళ్లు మరో ఎత్తు. కేవలం ఒకే ఒక కారణం వల్ల ఈ సినిమాకు రావాల్సిన సుమారు 50 కోట్ల రూపాయల ఆదాయం గాలిలో కలిసిపోయింది. సాధారణంగా ఏ దర్శకుడైనా తన సినిమాకు ఎక్కువ వసూళ్లు రావాలని కోరుకుంటారు. కానీ ఈ డైరెక్టర్ మాత్రం తన విజన్ దెబ్బతినకూడదని ఆ భారీ మొత్తాన్ని వదులుకోవడానికి సిద్ధపడ్డారు. సెన్సార్ బోర్డుతో ఆయన చేసిన పోరాటం ఏంటి? రజనీకాంత్ లాంటి స్టార్ సినిమాకు ‘ఏ’ రేటింగ్ రావడం వెనుక ఉన్న అసలు కారణమేంటో చూద్దాం..
తాజా ఇంటర్వ్యూలో లోకేశ్ కనగరాజ్ ‘కూలీ’ వసూళ్లపై సంచలన వ్యాఖ్యలు చేశారు. ఈ సినిమాకు సెన్సార్ బోర్డు ‘A’ (పెద్దలకు మాత్రమే) రేటింగ్ ఇవ్వడం వల్ల సుమారు 40 నుంచి 50 కోట్ల రూపాయల వరకు వసూళ్లు తగ్గాయని ఆయన అంగీకరించారు. సెన్సార్ బోర్డు సభ్యులు ఈ సినిమాలో దాదాపు 35 కట్స్ సూచించారట. ముఖ్యంగా సినిమాలో చూపించిన ‘ఎలక్ట్రిక్ క్రిమేషన్’ సీన్ తో పాటు కొన్ని హింసాత్మక దృశ్యాలపై బోర్డు తీవ్ర అభ్యంతరం వ్యక్తం చేసింది. ఆ సన్నివేశాలను తొలగిస్తే సినిమా ఇంపాక్ట్ తగ్గిపోతుందని భావించిన లోకేశ్, ఎడిట్ చేయడానికి అస్సలు ఒప్పుకోలేదు. ఫలితంగా సినిమాకు ‘ఏ’ రేటింగ్ వచ్చింది, దీనివల్ల ఫ్యామిలీ ఆడియన్స్, పిల్లలు థియేటర్లకు రావడం తగ్గి రెవెన్యూ దెబ్బతింది.
400 కోట్లు వచ్చినా..
రజనీకాంత్ ‘కూలీ’ చిత్రం బాక్సాఫీస్ వద్ద మంచి వసూళ్లనే సాధించింది. ప్రపంచవ్యాప్తంగా సుమారు 400 కోట్లకు పైగా గ్రాస్ వసూలు చేసినట్లు వార్తలు వచ్చాయి. అయితే ఈ సినిమాను దాదాపు 350 కోట్ల భారీ బడ్జెట్తో నిర్మించడంతో ఇది కాస్ట్ ఫెయిల్యూర్గా మిగిలిపోయింది. వసూళ్లు బాగున్నప్పటికీ, భారీ నిర్మాణ వ్యయం కారణంగా పంపిణీదారులకు ఆశించిన స్థాయిలో లాభాలు రాలేదని ఇండస్ట్రీ టాక్. సెన్సార్ రేటింగ్ గనుక ‘U/A’ వచ్చి ఉంటే ఈ సినిమా కచ్చితంగా లాభాల్లోకి వెళ్లేదని విశ్లేషకులు భావిస్తున్నారు.
ప్రస్తుతం లోకేశ్ కనగరాజ్ డైరీ ఫుల్ గా ఉంది. ఆయన తర్వాతి ప్రాజెక్టుల లైనప్ చూస్తే మైండ్ బ్లాక్ అవ్వాల్సిందే. ఐకాన్ స్టార్ అల్లు అర్జున్తో లోకేశ్ ఒక భారీ యాక్షన్ సినిమా చేయబోతున్నట్లు అధికారికంగా ప్రకటించారు (#AA23). అనిరుధ్ సంగీతం అందిస్తున్న ఈ సినిమాపై దేశవ్యాప్తంగా భారీ అంచనాలు ఉన్నాయి. ఆ తర్వాత కార్తీతో ‘ఖైదీ 2’ షూటింగ్ ప్రారంభమవుతుంది, ఇది ‘లోకేశ్ సినిమాటిక్ యూనివర్స్’ (LCU) లో భాగంగా రాబోతోంది. సూర్యతో ‘రోలెక్స్ స్టాండ్ అలోన్’ మూవీ, కమల్ హాసన్తో ‘విక్రమ్ 2’ కూడా ప్లానింగ్ దశలో ఉన్నాయి.
Rajini N Lokesh
హీరోగానూ బిజీ..
లోకేశ్ కనగరాజ్ కేవలం కెమెరా వెనుక ఉండే వ్యక్తి మాత్రమే కాదు, కెమెరా ముందు కూడా తన అదృష్టాన్ని పరీక్షించుకుంటున్నారు. గతంలో శ్రుతిహాసన్తో కలిసి ఒక మ్యూజిక్ ఆల్బమ్లో నటించిన ఆయన, త్వరలో అరుణ్ మాథేశ్వరన్ దర్శకత్వంలో నటుడిగా కనిపించబోతున్నారని సమాచారం. రజనీకాంత్ కు వీరాభిమాని అయిన లోకేశ్, ‘కూలీ’ షూటింగ్ సమయంలో తలైవా తనకు ఇచ్చిన స్వేచ్ఛను ఎప్పుడూ గొప్పగా చెప్పుకుంటారు.
అయితే రజనీకాంత్ తదుపరి చిత్రాల్లో లోకేశ్ నటిస్తున్నట్లు ఇప్పటివరకు ఎలాంటి అధికారిక సమాచారం లేదు. రజనీకాంత్ – కమల్ హాసన్ కాంబినేషన్లో లోకేశ్ ఒక సినిమా చేయాల్సి ఉంది. కానీ ఆ దిగ్గజ నటులు ఇద్దరూ ఒక వినోదాత్మక (Light-hearted) సినిమా చేయాలని కోరుకోగా, తాను కేవలం డార్క్ యాక్షన్ చిత్రాలే తీయగలనని చెప్పి లోకేశ్ ఆ ప్రాజెక్ట్ నుండి తప్పుకున్నారు. ఇప్పుడు ఆ క్రేజీ ప్రాజెక్టును సిబి చక్రవర్తి డైరెక్ట్ చేస్తున్నారు. సినిమా పట్ల లోకేశ్ కనగరాజ్ కు ఉన్న నిబద్ధత ‘కూలీ’ విషయంలో స్పష్టంగా కనిపిస్తుంది. కలెక్షన్ల కంటే తన క్రియేటివిటీకే ఆయన ప్రాధాన్యత ఇచ్చారు.