Tollywood: చాలా టార్చర్ చేశారు.. ట్రైన్‏లో నుంచి దూకి సూసైడ్ చేసుకుందాం అనుకున్నా.. బిగ్ బాస్ బ్యూటీ..

బిగ్ బాస్ షో ద్వారా తెలుగు ప్రేక్షకులకు దగ్గరైంది నేహా చౌదరి. అంతకు ముందు బుల్లితెరపై యాంకరింగ్ ద్వారా అలరించింది. అయితే ఆమె తన జీవితంలో ఎన్నో కష్టాలు, సవాళ్లు ఎదుర్కొన్నారు. ఆమె పట్టుదల, భావోద్వేగ స్వభావం, జిమ్నాస్టిక్స్ ప్రయాణంలో ఎదుర్కొన్న వేధింపులు, అలాగే ఆమె తల్లి ఆమెకు అందించిన అకుంఠిత మద్దతు గురించి గతంలో పలు ఇంటర్వ్యూలలో చెప్పుకొచ్చింది. తన జీవితంలో, తన కెరీర్ లో తన తల్లి పాత్ర ఎంతో గొప్పదని చెప్పుకొచ్చారు.

Neha Chaowdary

Rajitha Chanti |
Updated on: Jul 09, 2026 | 11:28 AM

బిగ్ బాస్ ఫేమ్ నేహా చౌదరి గురించి చెప్పక్కర్లేదు. యాంకరింగ్ ద్వారా బుల్లితెరపై అలరించిన ఆమె.. అదే క్రేజ్ తో బిగ్ బాస్ షోలోకి అడుగుపెట్టింది. గతంలో తన వ్యక్తిగత జీవితం, ఎదుర్కొన్న సవాళ్లు, అలాగే తన ప్రయాణంలో కుటుంబ సభ్యులు, ముఖ్యంగా తల్లి అందించిన అకుంఠిత మద్దతు గురించి ఓ ఇంటర్వ్యూలో పంచుకున్నారు. ఆమెలో అత్యంత ఆకర్షణీయమైన గుణం పట్టుదల అని ఇంటర్వ్యూలో పేర్కొన్నారు. జిమ్నాస్టిక్స్ రంగంలో ఆమె చూపిన నిబద్ధత, కష్టపడే తత్వం తనను ఈ స్థాయికి తీసుకువచ్చిందని వివరించారు. చిన్నతనం నుంచే ఆమెలో ఈ గుణం ఉందని, ఆపినా వినకుండా సైకిల్ వేసుకుని జిమ్నాస్టిక్స్‌కి వెళ్ళిపోయేదని తెలిపారు. దెబ్బలు తగులుతాయని కోచ్ చెప్పినా సరే, సీనియర్లతో పోటీ పడి కష్టపడేదని, ఆ పట్టుదలే ఆమెను ఈ స్థాయికి తీసుకువచ్చిందని అన్నారు. అమ్మ, నాన్న, తమ్ముడు అంటే ఆమెకు ప్రాణమని అన్నారు.. వారికి ఏదైనా జరిగినా, వారు బాధపడుతున్నా ఆమె తీవ్రంగా కలత చెందుతారని తెలిపారు. ఎమోషన్స్ అనేవి మనుషులందరికీ సహజమని, స్పోర్ట్స్ ప్లేయర్ అయినంత మాత్రాన దృఢంగా ఉండాలని కాదని తెలిపారు. ముఖ్యంగా, తన తల్లికి సంబంధించిన జ్ఞాపకాలను పంచుకుంటూ భావోద్వేగానికి లోనయ్యారు. తండ్రి పొలం దున్నేటప్పుడు రాళ్లతో కష్టపడటం చూసి ఏడ్చిన సంఘటనను గుర్తుచేసుకున్న నేహా, తల్లి పాత్ర తన జీవితంలో మరింత కీలకంగా ఉందని అన్నారు.

ఎక్కువ మంది చదివినవి : Athadu Movie : అతడు సినిమా హిట్ అవ్వడానికి కారణం ఆయనే.. నాజర్ కామెంట్స్..

హనుమకొండలో జిమ్నాస్టిక్స్ శిక్షణ సమయంలో నేహా చౌదరి తీవ్రమైన వేధింపులను ఎదుర్కొన్నట్లు గుర్తు చేసుకున్నారు. సీనియర్‌లు తనను బాగా వేధించారని, అది రాగింగ్ కంటే ఘోరంగా ఉండేదని పేర్కొన్నారు. ఆమె జీవితంలో ఎన్నోసార్లు వదిలేద్దాం, ఇంటికి వెళ్ళిపోదాం అనుకున్న ప్రతిసారీ ఈ వేధింపులే కారణమని వివరించారు. పడుకున్నప్పుడు గట్టిగా గిల్లి పారిపోవడం, రూంలో ఎవరూ లేకపోయినా మూలన కూర్చుని నవ్వినట్లు అనిపించడం వంటివి జరిగేవని చెప్పారు. స్పోర్ట్స్ టూర్స్‌లో ప్రయాణించేటప్పుడు రైలులో తనను మూలన కూర్చోబెట్టి, కింద నుంచి పిన్నీసులతో గుచ్చే వారని, దూకేద్దామనేంత నిరాశకు లోనయ్యానని ఆమె ఆవేదన వ్యక్తం చేశారు.

ఎక్కువ మంది చదివినవి : Aamir Khan: 61 ఏళ్ల వయసులో మూడో పెళ్లి.. ఆమీర్ ఖాన్ తన మొదటి ఇద్దరు భార్యలకు ఎందుకు విడాకులు ఇచ్చారో తెలుసా.. ?

ఈ కష్టకాలంలో ఆమె తల్లి నిస్వార్థ సేవ, మద్దతు ఎంతో కీలకమని నేహా తెలిపారు. ఈ వేధింపుల గురించి అమ్మకు చెప్పినా, చెప్పకపోయినా ఒక రకంగా ఆమెకు తెలిసేదని, అప్పటి నుంచి అమ్మ మరింత అండగా నిలిచేదని అన్నారు. ఉదయం మూడింటికే లేచి నాన్నకు, తమ్ముడికి వంట చేసి, నేహా కోసం ట్రావెల్ చేసి, ఆమెకు మద్దతుగా నిలిచేదని చెప్పారు. అప్పట్లో ఆ వయసులో ఆ త్యాగం విలువ తనకు తెలియకపోయినా, ఇప్పుడు అదే స్థానంలో తన కూతురు ఉంటే తాను చేయలేనేమో అనిపిస్తుందని నేహా భావోద్వేగంగా చెప్పుకొచ్చారు. అమ్మ చేసిన త్యాగాలు, అందించిన మద్దతు తనను ఈ స్థాయికి తీసుకువచ్చాయని చెప్పుకొచ్చారు.

ఎక్కువ మంది చదివినవి : Murali Mohan: అన్నయ్య నాకోసం ఫ్యాన్స్ వస్తారా అని అడిగాడు.. ఇప్పుడు ఇండస్ట్రీకే మొగుడయ్యాడు.. మురళి మోహన్..