‘ఆర్ఆర్‌ఆర్‌’లో ఎన్టీఆర్ రీల్‌ పెదనాన్న..!

ఎన్టీఆర్, రామ్ చరణ్‌లతో దర్శకధీరుడు రాజమౌళి తెరకెక్కిస్తోన్న క్రేజీ మల్టీస్టారర్ ఆర్ఆర్ఆర్(రౌద్రం రణం రుధిరం). భారీ బడ్జెట్‌తో తెరకెక్కుతోన్న ఈ మూవీని పలు భారతీయ బాషల్లో విడుదల చేయబోతున్నారు. ఈ నేపథ్యంలో అన్ని భాషల్లో క్రేజ్ తీసుకురావడం కోసం ఇప్పటికే బాలీవుడ్ నుంచి అజయ్ దేవగన్, అలియా భట్‌లతో ఈ ప్రాజెక్ట్‌లో భాగం చేశారు జక్కన్న. ఇక మిగిలిన భాషల్లోనూ క్రేజ్ తీసుకురావడం కోసం రాజమౌళి ప్లాన్ చేస్తున్నారట. ఈ క్రమంలో కోలీవుడ్, మాలీవుడ్ నుంచి స్టార్ నటులను ఇందులో కెమెరా అప్పియరెన్స్‌ ఇప్పించాలని ఆయన భావిస్తున్నారట.

ఈ నేపథ్యంలో కోలీవుడ్ నుంచి విజయ్‌ పేరు వినిపించింది. ప్రస్తుతం ఆయనతో రాజమౌళి టీమ్ సంప్రదింపులు జరుపుతోందని ఆ మధ్యన వార్తలు వచ్చాయి. ఇదిలా ఉంటే తాజా సమాచారం ప్రకారం మాలీవుడ్ నుంచి మోహన్‌లాల్‌ను ఈ ప్రాజెక్ట్‌లో భాగం చేయాలని రాజమౌళి అనుకుంటున్నారట. కాగా కొరటాల శివ దర్శకత్వంలో ఎన్టీఆర్ నటించిన జనతా గ్యారేజ్ చిత్రంలో మోహన్ లాల్ ఎన్టీఆర్ పెద నాన్నగా కనిపించిన విషయం తెలిసిందే. మరి ఈ క్రేజీ ప్రాజెక్ట్‌లో ఎవరెవరు అతిథి పాత్రలలో కనిపించనున్నారు..? అన్నది తెలియాలంటే అధికారిక ప్రకటన వచ్చే వరకు ఆగాల్సిందే.

కాగా ఫిక్షన్‌ కథాంశంతో తెరకెక్కుతోన్న ఈ మూవీలో రామ్ చరణ్ అల్లూరి సీతారామరాజుగా, ఎన్టీఆర్ కొమరం భీమ్‌గా కనిపించనున్నారు. అలియా భట్, ఒలివియా హీరోయిన్లుగా నటిస్తున్నారు. సముద్రఖని, రాహుల్ రామకృష్ణ తదితరులు కీలక పాత్రలలో కనిపిస్తున్నారు. డీవీవీ దానయ్య నిర్మిస్తోన్న ఈ మూవీకి కీరవాణి సంగీతం అందిస్తున్నారు. బాహుబలి తరువాత రాజమౌళి తెరకెక్కిస్తోన్న ఈ మూవీపై అన్ని ఇండస్ట్రీల్లోనూ భారీ అంచనాలు ఉన్నాయి.

Read This Story Also: గాంధీ ఆసుపత్రి ఘటనపై సీరియస్ అయిన కేటీఆర్