Film Industry: ఇండస్ట్రీలోకి ఏఐ.. సినిమా రంగంపై కేంద్రం కీలక నిర్ణయం..!

Film Industry: భారతీయ చలనచిత్ర పరిశ్రమ అభివృద్ధికి, అలాగే దేశవ్యాప్తంగా సినిమా థియేటర్ల (స్క్రీన్ల) సంఖ్యను పెంచేందుకు కేంద్ర సమాచార, ప్రసార మంత్రిత్వ శాఖ రెండు ప్రధాన నిర్ణయాలు తీసుకుంది. కేంద్ర సమాచార, ప్రసార శాఖ మంత్రి అశ్విని వైష్ణవ్ అధ్యక్షతన న్యూఢిల్లీలో జరిగిన ఒక ఉన్నత స్థాయి సమీక్షా సమావేశంలో ఈ నిర్ణయాలు తీసుకున్నారు. మంత్రిత్వ శాఖకు చెందిన ఉన్నత అధికారులతో జరిగిన ఈ సమావేశంలో సినీ రంగంలో సినిమా నిర్మాణం, పంపిణీ (డిస్ట్రిబ్యూషన్), సాంకేతికతను అనుసంధానించడం వంటి అంశాల్లో తక్షణమే నిర్మాణాత్మక చర్యలు చేపట్టాలని మంత్రి ఆదేశించారు.

1. ఉన్నత స్థాయి ‘స్టడీ గ్రూప్’ (అధ్యయన కమిటీ) ఏర్పాటు

భారతీయ సినిమా రంగంలోని అవకాశాలు, సవాళ్లను అధ్యయనం చేసేందుకు మంత్రిత్వ శాఖ ఒక ఉన్నత స్థాయి స్టడీ గ్రూప్‌ను ఏర్పాటు చేసింది. దీనికి ప్రసూన్ జోషి చైర్మన్‌గా వ్యవహరిస్తారు. ఈ గ్రూప్‌లో చిత్ర పరిశ్రమకు చెందిన నిపుణులు, సాంకేతిక భాగస్వాములు సభ్యులుగా ఉంటారు.

ఈ కమిటీ ముఖ్యంగా కింది అంశాలపై దృష్టి పెడుతుంది:

• గ్లోబల్ మార్కెట్: అంతర్జాతీయ మార్కెట్‌లో భారతీయ సినిమాలు మరింత పోటీని ఎదుర్కొనేలా చేసేందుకు అవసరమైన చర్యలు.
• కొత్త సాంకేతికత: ఆర్టిఫిషియల్ ఇంటెలిజెన్స్ (AI), వర్చువల్ ప్రొడక్షన్ వంటి ఆధునిక సాంకేతికతల ప్రభావంపై అధ్యయనం. భారతీయ సినీ నిర్మాతలు వీటిని ఎలా ఉపయోగించుకోవచ్చో సూచించడం.
• ఆర్థిక వనరులు: చలనచిత్ర నిర్మాణానికి మార్కెట్ నుండి ఇన్‌స్టిట్యూషనల్ ఫైనాన్స్ (సంస్థాగత రుణాలు), కొత్త నిధుల మార్గాలను అన్వేషించడం.
• సవాళ్లు: సినిమా నిర్మాణం, పంపిణీ కోసం నిధులు సేకరించడంలో నిర్మాతలు ఎదుర్కొంటున్న సమస్యల పరిష్కారం.
• విధాన రూపకల్పన: రాష్ట్ర ప్రభుత్వాలు, ఇతర భాగస్వాములతో కలిసి పని చేస్తూ.. ఉత్తమ విధానాలను గుర్తించడం. భారతీయ సినిమా దీర్ఘకాలిక వృద్ధికి పూర్తి స్థాయి విధానపరమైన ఫ్రేమ్‌వర్క్‌ను సిఫార్సు చేయడం.

ఈ స్టడీ గ్రూప్ దేశవ్యాప్తంగా ఉన్న భాగస్వాములందరితో సంప్రదింపులు జరిపి, మూడు నెలల్లోగా తన నివేదికను మంత్రిత్వ శాఖకు సమర్పిస్తుంది.

2. రాష్ట్రాల కోసం ‘మోడల్ స్టేట్ సినిమా రెగ్యులేషన్స్’

సినిమాలు, థియేటర్ల నియంత్రణ అనేది రాష్ట్రాల పరిధిలోకి వస్తుంది. థియేటర్ల అనుమతుల కోసం వేర్వేరు రాష్ట్రాలు వేర్వేరు నిబంధనలను అనుసరిస్తున్నాయి. దీనివల్ల ముఖ్యంగా చిన్న పట్టణాలు, గ్రామీణ ప్రాంతాలలో సినిమా మౌలిక సదుపాయాల (థియేటర్ల) వృద్ధికి పెద్ద ఆటంకంగా మారింది.

ఈ సమస్యను పరిష్కరించి సినిమా మౌలిక సదుపాయాల అభివృద్ధిని వేగవంతం చేయడానికి మంత్రిత్వ శాఖ ఒక ‘మోడల్ రూల్స్’ పత్రాన్ని సిద్ధం చేసింది. పరిశ్రమకు చెందిన అందరితో చర్చించిన తర్వాతే ఈ నిబంధనలను రూపొందించారు. సమాచార, ప్రసార మంత్రిత్వ శాఖ ప్రస్తుతం ఈ ‘మోడల్ స్టేట్ సినిమా రెగ్యులేషన్స్’ను అన్ని రాష్ట్ర ప్రభుత్వాలకు పంపింది. వీటిని అమలు చేయాల్సిందిగా రాష్ట్రాలను కోరింది. అలాగే ఈ నిబంధనలను అమలు చేయడంలో రాష్ట్రాలకు కేంద్ర మంత్రిత్వ శాఖ పూర్తి సహాయసహకారాలు అందిస్తుంది.

ఈ రెండు నిర్ణయాలు కలిసి భారతీయ చలనచిత్ర పరిశ్రమను మరింత బలోపేతంగా, ఆధునికంగా, అంతర్జాతీయ స్థాయిలో పోటీ పడగలిగేలా తీర్చిదిద్దుతాయి. తద్వారా భారతీయ సినిమా సృజనాత్మకతకు, సంస్కృతికి, ఆవిష్కరణలకు ఒక శక్తిమంతమైన మాధ్యమంగా తన ప్రయాణాన్ని కొనసాగిస్తుంది.

ఇది కూడా చదవండి: Gold Price Today: భారీగా తగ్గిన బంగారం, వెండి ధరలు.. 10 గ్రాముల ధర ఎంతంటే..