బోరుబావిలో పడ్డ మూడేళ్ల బాలుడు.. కొనసాగుతున్న సహాయకచర్యలు..

వ్యవసాయ పొలంలో వేసిన బోరుగుంత ఆ చిన్నారి ప్రాణం మీదకు తెచ్చింది. మద్యప్రదేశ్ రాష్ట్రంలో మరో మూడేండ్ల బాలుడు బోరుబావిలో పడిపోయాడు. దీంతో బాలుడి తల్లిదండ్రులు ఆందోళన చెందుతున్నారు. రెస్క్యూ సిబ్బంది సహాయ కార్యక్రమాలు కొనసాగిస్తున్నారు. నివారి జిల్లా పృథ్వీపూర్ ప్రాంతంలోని సేతుపురబారా గ్రామంలో బుధవారం ఈ ఘటన చోటుచేసుకుంది. ప్రహ్లాద్‌ అనే మూడేండ్ల బాలుడు ప్రమాదవశాత్తు బోరుబావిలో పడిపోయాడు. విషయం తెలిసిన స్థానిక అధికారులు ఆ చిన్నారిని కాపాడే ప్రయత్నాలు చేశారు. అప్రమత్తమైన జిల్లా యంత్రాంగం ఆర్మీ రెస్క్యూ సిబ్బందిని ఘటనా స్థలానికి రప్పించారు. రెస్క్యూ సిబ్బంది ఆ బాలుడి గొంతును విన్నట్లు నివారి జిల్లా అదనపు ఎస్పీ తెలిపారు. బాలుడ్ని బోరుబావి నుంచి వెలికితీసేందుకు ప్రయత్నిస్తున్నట్లు చెప్పారు.

కాగా, బాలుడు ప్రహ్లాద్‌ను రక్షించేందుకు సహాయక చర్యల్లో కొనసాగిస్తున్నామని మధ్యప్రదేశ్‌ సీఎం శివరాజ్‌ సింగ్‌ చౌహాన్ తెలిపారు. ఆ చిన్నారిని త్వరగా వెలికితీస్తారన్న నమ్మకం తనకు ఉందన్నారు. దేవుడు ఆ బాలుడికి దీర్ఘాయువు ఇవ్వాలని, దీని కోసం మనమంతా ప్రార్థనలు చేద్దామంటూ చౌహాన్‌ ట్వీట్‌ చేశారు.