Fire Accident: భద్రాద్రి కొత్తగూడెం జిల్లాలో భారీ అగ్నిప్రమాదం.. బాణసంచా పేలి మహిళ సజీవ దహనం, మరొకరి పరిస్థితి విషమం
భద్రాద్రి కొత్తగూడెం జిల్లాలో భారీ అగ్నిప్రమాదం.. బూర్గంపాడు మండలం సారపాకలోని ఓ ఇంట్లో నిల్వ ఉంచిన బాణసంచా ఒక్కసారిగా పేలింది. మహిళ సజీవదహనంకాగా..ఆమె కుమారుడు పరిస్థితి విషమం..
Updated on: Aug 25, 2021 | 8:29 PM
Huge Explosion at Crackers Shop: భద్రాద్రి కొత్తగూడెం జిల్లాలో భారీ అగ్నిప్రమాదం జరిగింది. బూర్గంపాడు మండలం సారపాకలోని ఓ ఇంట్లో నిల్వ ఉంచిన బాణసంచా ఒక్కసారిగా పేలింది. భవాని అనే మహిళ సజీవదహనంకాగా..ఆమె కుమారుడు దుర్గ ప్రసాద్ పరిస్థితి విషమంగా ఉంది. పేలుడు ధాటికి మంటలు భారీగా ఎగసిపడ్డాయి.
సారపాక ప్రధాన రహదారి ప్రక్కన ఉన్న ఓ ఇంటిని రాజమండ్రికి చెందిన భీమ్ శంకర్ అనే వ్యక్తి అద్దెకు తీసుకున్నాడు. ఆంధ్రప్రదేశ్ నుంచి బాణసంచా తీసుకువచ్చి అమ్మకాలు చేస్తుంటాడు. అయితే, ఈ సాయంత్రం అతని గది నుంచి ఒక్కసారిగా పేలుళ్లు వినిపించాయి. బాణసంచా మొత్తం అంటుకోవడంతో ప్రమాద తీవ్రత పెరిగింది. పేలుడు శబ్దాలకు చుట్టుపక్కల జనం వణికిపోయారు. పేలుడు జరిగిన గది పక్కనే ఓ ఆపార్ట్ మెంట్ ఉంది. అందులోని జనమంతా భయంతో పరుగులు తీశారు..
ఈ ఘటనకు సంబంధించి సమాచారం అందుకున్న అగ్నిమాపక సిబ్బంది.. అతికష్టంమ్మీద మంటల్ని అదుపులోకి తెచ్చారు. రాబోయే వినాయక చవితికి విక్రయించేందుకే ఇంట్లో భారీ ఎత్తున బాణసంచాను నిల్వ ఉంచినట్లు తెలుస్తోంది. నిబంధనలకు విరుద్ధంగా టపాసులు నిల్వచేయడం వల్లే ఈ ప్రమాదం జరిగిందని చెబుతున్నారు అధికారులు. కాగా ఈ ఘటనకు సంబంధించి పోలీసులు కేసు నమోదు చేసుకుని దర్యాప్తు చేపట్టారు.
