TGPSC Group 3 Exam Schedule: తెలంగాణ గ్రూప్ 3 అభ్యర్ధులకు బిగ్ అప్డేట్.. పరీక్షల పూర్తి షెడ్యూల్ ఇదే
తెలంగాణ గ్రూప్ 3 పోస్టుల నియామక పరీక్షకు సంబంధించిన పూర్తి షెడ్యూల్ వచ్చేసింది. ఈ మేరకు పరీక్షల షెడ్యూల్ ను టీజీపీఎస్సీ తాజాగా విడుదల చేసింది. మరో పది రోజుల్లోనే హాల్ టికెట్లు విడుదల కానున్నాయి..
హైదరాబాద్, అక్టోబర్ 31: తెలంగాణ గ్రూప్ 3 అభ్యర్థులకు టీజీపీఎస్సీ నుంచి కీలక అప్డేట్ వచ్చింది. గ్రూప్ 3 పరీక్షలకు సంబంధించిన షెడ్యూల్ను విడుదల చేసింది. ఈ మేరకు తెలంగాణ పబ్లిక్ సర్వీస్ కమిషన్ (TGPSC) పూర్తి షెడ్యూల్ను వెబ్సైట్లో అందుబాటులోకి తీసుకువచ్చింది. తాజా షెడ్యూల్ ప్రకారం.. నవంబర్ 17, 18 తేదీల్లో ఈ పరీక్ష నిర్వహించనున్నట్లు ప్రకటించింది. ఆన్లైన్ విధానంలో రోజుకు రెండు సెషన్లలో ఈ పరీక్ష నిర్వహించనున్నారు. నవంబర్ 17వ తేదీన ఉదయం 10 గంటల నుంచి మధ్యాహ్నం 12.30 గంటల వరకు పేపర్ 1 పరీక్ష ఉంటుంది. మధ్యాహ్నం 3 గంటల నుంచి సాయంత్రం 5.30 గంటల వరకు పేపర్ 2 నిర్వహించనున్నారు. ఇక నవంబర్ 18వ తేదీన పేపర్ 3 పరీక్షను ఉదయం 10 గంటల నుంచి మధ్యాహ్నం 12.30 గంటల వరకు నిర్వహిస్తారు.
ఈ పరీక్షలకు సంబంధించిన హాల్ టికెట్లు నవంబర్ 10వ తేదీన అందుబాటులోకి రానున్నాయి. ఈ పరీక్షకు దరఖాస్తు చేసుకున్న అభ్యర్థులు టీఎస్పీఎస్సీ వెబ్సైట్లో హాల్ టికెట్లు డౌన్లోడ్ చేసుకోవచ్చు. కాగా టీజీపీఎస్సీ గ్రూప్ 3 పరీక్షలకు రాష్ట్ర వ్యాప్తంగా 5.36 లక్షలకు పైగా దరఖాస్తులు వచ్చిన సంగతి తెలిసిందే. గ్రూప్ 3 పరీక్ష మొదటి సెషన్కు ఉదయం 8.30 గంటల నుంచి, రెండో సెషన్కు మధ్యాహ్నం 1.30 గంటల నుంచి పరీక్ష కేంద్రాల్లోకి అనుమతిస్తారు. ఉదయం సెషన్లో 9.30 గంటలకు, మధ్యాహ్నం సెషన్లో 2.30 గంటలకు గేట్లు మూసివేస్తామని అధికారులు తెలిపారు. ఆ తర్వాత వచ్చిన వారిని ఎట్టిపరిస్థితుల్లో అనుమతించబోమని తేల్చి చెప్పారు.
టీజీపీఎస్సీ గ్రూప్ 3 సెలక్షన్ ప్రక్రియ పూర్తయ్యే వరకు అభ్యర్థులు తమ హాల్టికెట్లను, క్వశ్చన్పేపర్లు జాగ్రత్త చేసుకోవాలని టీజీపీఎస్సీ సూచించింది. తొలిరోజు పేపర్ 1 పరీక్షకు హాజరైన హాల్టికెట్ను మిగతా పరీక్షలకు ఉపయోగించాలని కమిషన్ కార్యదర్శి డాక్టర్ ఇ నవీన్నికోలస్ తెలిపారు. పరీక్షల అనంతరం డూప్లికేట్ హాల్టికెట్లను ఎట్టిపరిస్థితుల్లోనూ జారీ చేయబోమని స్పష్టం చేసింది. హాల్టికెట్లు డౌన్లోడ్ చేసుకునేటప్పుడు ఏమైనా సాంకేతిక ఇబ్బందులు తలెత్తితే వర్కింగ్ డేస్లలో ఉదయం 10.30 నుంచి సాయంత్రం 5 గంటల వరకు 040-23542185, 040-23542187 ఫోన్ నంబర్లను సంప్రదించాలని తెలిపారు. తెలంగాణలో మొత్తం 1380కి పైగా గ్రూప్ 3 పోస్టుల భర్తీకి ఈ నియామక ప్రక్రియ చేపట్టిన సంగతి తెలిసిందే. పోటీ ఎక్కువగా ఉండటంతో అభ్యర్ధులు హోరాహోరీగా పరీక్షలకు సన్నద్ధమవుతున్నారు.
