OU, JNTUHకి దూరంగా TG EAPCET 2026 టాపర్లు.. ప్రైవేటు కాలేజీలకే క్యూ! మారుతున్న ట్రెండ్స్
ఇంజినీరింగ్ ప్రవేశాల్లో ఈఏపీసెట్ టాపర్లు రాష్ట్రంలోని విశ్వవిద్యాలయ కళాశాలల కంటే ప్రైవేటు ఇంజినీరింగ్ కళాశాలలను ఎక్కువగా ఎంపిక చేసుకుంటున్న ధోరణి స్పష్టంగా కనిపిస్తోంది. ఇంజినీరింగ్ తొలి విడత సీట్ల కేటాయింపు వివరాలు పరిశీలిస్తే, టాప్ ర్యాంకర్లు కూడా ప్రైవేటు కళాశాలలకే ప్రాధాన్యం ఇస్తున్నట్లు వెల్లడైంది..
Updated on: Jul 13, 2026 | 7:27 AM
హైదరాబాద్, జులై 13: ఈ ఏడాది ఎప్సెట్ ప్రథమ ర్యాంకర్ రుషి సైతం ప్రైవేటు కళాశాలలో చేరడం విశేషం. ముఖ్యంగా ఉస్మానియా విశ్వవిద్యాలయం (ఓయూ) కళాశాలల నుంచి టాపర్లు దూరమవుతున్నట్లు గణాంకాలు సూచిస్తున్నాయి. యూనివర్సిటీ కళాశాలల్లో 83.30 శాతం సీట్లు మాత్రమే భర్తీ కాగా, ప్రైవేటు కళాశాలల్లో 91.30 శాతం సీట్లు నిండాయి. వెయ్యిలోపు ర్యాంకులు సాధించిన 196 మంది విద్యార్థులకు తొలి విడతలో సీట్లు కేటాయించగా, వారిలో 80 మందికి పైగా జేఎన్టీయూహెచ్లో, మరో 10 మంది వరకు ఓయూలో ప్రవేశాలు పొందనున్నారు. మిగిలిన విద్యార్థులు ప్రైవేటు కళాశాలలను ఎంచుకోవడం గమనార్హం.
ప్రాంగణ నియామకాలే ప్రధాన ఆకర్షణ
ప్రస్తుతం విద్యార్థులు మరియు తల్లిదండ్రులు కళాశాల ఎంపికలో ప్రాంగణ నియామకాలు (క్యాంపస్ ప్లేస్మెంట్లు), వార్షిక వేతన ప్యాకేజీలను ప్రధాన ప్రమాణాలుగా పరిగణిస్తున్నారు. ప్రముఖ ప్రైవేటు కళాశాలలు అధిక వేతనాలు అందించే అగ్రశ్రేణి ఐటీ సంస్థలను క్యాంపస్కు రప్పిస్తూ విద్యార్థులకు మెరుగైన ఉపాధి అవకాశాలు కల్పిస్తున్నాయనే అభిప్రాయం వ్యక్తమవుతోంది. అదే సమయంలో విశ్వవిద్యాలయ, ప్రభుత్వ కళాశాలలు ప్లేస్మెంట్ల విషయంలో అంత చొరవ చూపడం లేదని తల్లిదండ్రులు భావిస్తున్నారు. మరోవైపు ప్రభుత్వ, విశ్వవిద్యాలయ కళాశాలల్లో 70 శాతానికి పైగా అధ్యాపకుల పోస్టులు ఖాళీగా ఉండటం కూడా విద్యార్థుల ఎంపికపై ప్రభావం చూపుతోందని నిపుణులు పేర్కొంటున్నారు.
ప్రభుత్వ కళాశాలల్లో తక్కువ స్పందన
రాష్ట్రంలోని ఏకైక ప్రభుత్వ ఇంజినీరింగ్ కళాశాల అయిన కోస్గి ఇంజినీరింగ్ కళాశాలలో కేవలం 28.60 శాతం సీట్లు మాత్రమే భర్తీ కావడం ఆందోళన కలిగిస్తోంది. విద్యార్థుల్లో అత్యధిక డిమాండ్ ఉన్న కంప్యూటర్ సైన్స్ అండ్ ఇంజినీరింగ్ (సీఎస్ఈ) శాఖలో కూడా 66 సీట్లకు కేవలం 39 సీట్లు మాత్రమే నిండాయి.
CSE సీట్ల భర్తీలో తగ్గుదల
ఇటీవలి సంవత్సరాల్లో మాదిరిగానే ఈసారి కూడా విద్యార్థుల అధిక శాతం కంప్యూటర్ సైన్స్, ఇన్ఫర్మేషన్ టెక్నాలజీ మరియు ఇతర కంప్యూటర్ సంబంధిత కోర్సుల వైపే మొగ్గు చూపారు. అయితే గత ఏడాదితో పోలిస్తే ఈ బ్రాంచీల్లో ఖాళీ సీట్ల సంఖ్య గణనీయంగా పెరిగింది. గత ఏడాది సీఎస్ఈ, ఐటీ వంటి కోర్సుల్లో సుమారు 1,700 సీట్లు ఖాళీగా ఉండగా, ఈసారి ఆ సంఖ్య 4,133కు చేరింది. 2025 తొలి విడతలో సీఎస్ఈలో 28,246 సీట్లు ఉండగా, వాటిలో 27,677 సీట్లు భర్తీ అయ్యాయి. తుది విడత నాటికి సీట్ల సంఖ్య 30,655కు పెరిగి, 29,488 సీట్లు కేటాయించబడ్డాయి. ఈసారి తొలి విడతలో సీఎస్ఈ సీట్ల భర్తీ శాతం 95 శాతానికి పరిమితమవడం గమనించదగ్గ అంశం.
కోర్ బ్రాంచీల్లో మిశ్రమ పరిస్థితి
కోర్ ఇంజినీరింగ్ విభాగాలైన ఈసీఈ, ఈఈఈలో సీట్ల కేటాయింపు స్వల్పంగా తగ్గగా, సివిల్ మరియు మెకానికల్ ఇంజినీరింగ్ విభాగాల్లో మాత్రం స్వల్ప పెరుగుదల నమోదైంది. మొత్తంగా చూస్తే, విద్యార్థుల ఎంపికల్లో ప్రైవేటు కళాశాలలపై పెరుగుతున్న ఆసక్తి, ప్రభుత్వ మరియు విశ్వవిద్యాలయ కళాశాలలకు సవాలుగా మారుతోంది.
