After 10th: ఆ రెండే కాదు.. టెన్త్ తర్వాత మీ ఫ్యూచర్ మార్చే బెస్ట్ కోర్సులు ఇవే..!
After 10th Which Course to Choose: 10వ తరగతి పూర్తి కాగానే విద్యార్థులు, తల్లిదండ్రుల ముందున్న అతిపెద్ద సవాలు 'ఏ కోర్సు ఎంచుకోవాలి?'. ఎవరో చెప్పారని కాకుండా, మీ ఇష్టాఇష్టాలు, భవిష్యత్తు లక్ష్యాలకు అనుగుణంగా సరైన నిర్ణయం తీసుకోవడం ముఖ్యం. ఈ దశలో వేసే ప్రతి అడుగు మీ కెరీర్ను నిర్ణయిస్తుంది. నిపుణుల సలహాలతో మీ బంగారు భవిష్యత్తుకు బాటలు వేసుకోవాలి.
Updated on: Apr 28, 2026 | 8:57 PM
After 10th Which Course to Choose: 10వ తరగతి వరకు పాఠశాల విద్య ఒక ఎత్తు అయితే, ఆ తర్వాత ఎంచుకునే మార్గం మరొక ఎత్తు. ఇది కేవలం ఒక క్వాలిఫికేషన్ మాత్రమే కాదు, మీ జీవిత దిశను నిర్ణయించే సమయం అనడంలో ఎలాంటి సందేహం లేదు. చాలామంది స్నేహితులు వెళ్తున్నారని లేదా తల్లిదండ్రులు ఒత్తిడి చేస్తున్నారని కోర్సులను ఎంచుకుంటారు. కానీ, కెరీర్ గైడెన్స్ ఎక్స్పర్ట్స్ అభిప్రాయం ప్రకారం, విద్యార్థులు తమను తాము విశ్లేషించుకోవడం (Self-Analysis) అత్యంత ముఖ్యం.
ఇంటర్మీడియట్ స్ట్రీమ్స్ – ఏది ఎవరికి?
తెలంగాణ, ఆంధ్రప్రదేశ్లో ప్రధానంగా నాలుగు ఇంటర్మీడియట్ స్ట్రీమ్స్ అందుబాటులో ఉన్నాయి:
ఎంపీసీ (Maths, Physics, Chemistry): ఇంజనీరింగ్, డిఫెన్స్ లేదా రీసెర్చ్ వైపు వెళ్లాలనుకునే వారికి ఇది ఉత్తమం. అనలిటికల్ స్కిల్స్ బాగున్న వారు దీనిని ఎంచుకోవచ్చు.
బైపీసీ (Biology, Physics, Chemistry): డాక్టర్ అవ్వాలనే లక్ష్యం ఉన్నవారికి ఇది ఏకైక మార్గం. దీనితో పాటు ఫార్మా, అలైడ్ హెల్త్ సైన్సెస్, అగ్రికల్చర్ రంగాల్లోనూ అద్భుతమైన అవకాశాలు ఉన్నాయి.
ఎంఈసీ (Maths, Economics, Commerce): ఫైనాన్స్, చార్టర్డ్ అకౌంటెన్సీ (CA), మేనేజ్మెంట్ రంగాలపై ఆసక్తి ఉన్నవారికి ఇది సరైన ఎంపిక.
సీఈసీ (Civics, Economics, Commerce): లా, జర్నలిజం, మాస్ కమ్యూనికేషన్ లేదా సివిల్ సర్వీసెస్ (UPSC) వైపు వెళ్లాలనుకునే వారు దీనిని ఎంచుకోవచ్చు.
టెక్నాలజీ యుగంలో కొత్త కోర్సులు..
మారుతున్న కాలానికి అనుగుణంగా ఇప్పుడు సంప్రదాయ కోర్సులతో పాటు మరిన్ని ఆధునిక అవకాశాలు వచ్చాయి. ముఖ్యంగా ఆర్టిఫిషియల్ ఇంటెలిజెన్స్ (AI) పాత్ర ప్రతి రంగంలోనూ పెరుగుతోంది. సైబర్ సెక్యూరిటీ, ఎథికల్ హ్యాకింగ్, రోబోటిక్స్, నానో టెక్నాలజీ, క్లైమేట్ సైన్స్ వంటి రంగాల్లో భవిష్యత్తులో విపరీతమైన డిమాండ్ ఉండబోతోంది.
ప్రత్యామ్నాయ మార్గాలు: పాలిటెక్నిక్, ఐటీఐ..
ఆర్థికంగా త్వరగా సెటిల్ అవ్వాలనుకునే వారికి లేదా ఇంటర్మీడియట్ ఇష్టం లేని వారికి పాలిటెక్నిక్ (డిప్లమా), ఐటీఐ అద్భుతమైన మార్గాలు. పాలిటెక్నిక్ పూర్తి చేసిన వారికి ప్రభుత్వం, ప్రైవేట్ రంగాల్లో టెక్నికల్ ఉద్యోగాలు లభిస్తాయి. ఐటీఐ ద్వారా ఎలక్ట్రీషియన్, వెల్డర్ వంటి వృత్తి విద్యా కోర్సులు చేసి స్వయం ఉపాధి కూడా పొందవచ్చు.
తల్లిదండ్రుల పాత్ర..
ఈ కీలక సమయంలో తల్లిదండ్రులు పిల్లలపై ఒత్తిడి తీసుకురాకుండా, వారికి ఒక మెంటర్ లాగా ఉండాలి. పిల్లల ఇష్టాలను గౌరవిస్తూ, వారికి సరైన దారి చూపాలి. విద్యార్థులు కూడా తమ తల్లిదండ్రుల కష్టాన్ని గుర్తించి బాధ్యతాయుతంగా కెరీర్ ప్లాన్ చేసుకోవాలి.
మరిన్ని కెరీర్ వార్తల కోసం ఇక్కడ క్లిక్ చేయండి..
