Credit Card: ప్రపంచంలోనే అత్యంత ఖరీదైన క్రెడిట్ కార్డ్ ఇదే.. ఖర్చు లిమిట్ తెలిస్తే షాకవుతారు!
నేటి కాలంలో క్రెడిట్ కార్డులు నిత్య జీవితంలో ఒక అంతర్భాగంగా మారిపోయాయి. ఉద్యోగులు ఒకటి కన్నా ఎక్కువ కార్డులు వాడడం సర్వసాధారణం. సినిమా టికెట్లు, రివార్డ్ పాయింట్లు, ఎయిర్పోర్ట్ లాంజ్ యాక్సెస్ వంటి అనేక ప్రయోజనాల కోసం చాలా మంది వీటిని ఇష్టపడతారు. అయితే, సరైన పద్ధతిలో వాడకపోతే ఇవి ఆర్థికంగా తలనొప్పిగా మారే ప్రమాదం కూడా ఉంది. కానీ, మీకు తెలుసా...
ప్రస్తుతం క్రెడిట్ కార్డులు ఎంతగా ప్రాచుర్యం పొందాయో మనందరికీ తెలుసు. ప్రపంచంలోనే అత్యంత ఖరీదైన అత్యంత ప్రత్యేకమైన ఒక క్రెడిట్ కార్డ్ ఉంది. అది అందరికీ అందుబాటులో ఉండదు, కేవలం ఆహ్వానం ద్వారా మాత్రమే లభిస్తుంది. అదే అమెరికన్ ఎక్స్ప్రెస్ సెంచురియన్ కార్డ్. ఇది కేవలం కొద్దిమంది అత్యంత సంపన్న వ్యక్తులకు మాత్రమే అందుబాటులో ఉంటుంది. ఇంతకీ ఆ కార్డు ఏంటి? దాని ప్రత్యేకతలు, షాకింగ్ ఖర్చు పరిమితి ఏంటో తెలుసుకుందాం.
అమెక్స్ బ్లాక్ కార్డ్ ఎందుకు అంత ప్రత్యేకం?
ప్రత్యేక ఆహ్వానం ద్వారా మాత్రమే: ఈ కార్డును పొందడం అంత సులువు కాదు. అమెరికన్ ఎక్స్ప్రెస్ బ్యాంక్ ప్రత్యేక ఆహ్వానం ద్వారా మాత్రమే దీనిని జారీ చేస్తుంది. ఈ ఆహ్వానం అత్యంత ధనవంతులకు మాత్రమే వెళుతుంది.
పరిమిత సంఖ్యలో జారీ: ప్రపంచవ్యాప్తంగా కేవలం లక్ష మందికి మాత్రమే ఈ కార్డును జారీ చేశారు. భారతదేశంలో, మీడియా నివేదికల ప్రకారం, సుమారు 200 మంది వద్ద మాత్రమే ఈ కార్డు ఉంది. ఈ కార్డును 2013లో భారతదేశంలో కూడా విడుదల చేశారు.
అమెరికన్ ఎక్స్ప్రెస్ సెంచురియన్ కార్డ్ ప్రయోజనాలు:
ఈ ప్రీమియం కార్డ్ హోల్డర్లు ఎన్నో ప్రత్యేకమైన ప్రయోజనాలను పొందుతారు, వాటిలో కొన్ని:
ఫైన్ డైనింగ్: ప్రపంచంలోని అత్యుత్తమ రెస్టారెంట్లలో ప్రత్యేక ప్రవేశం మరియు రిజర్వేషన్లు.
లగ్జరీ వసతి: విలాసవంతమైన హోటళ్ళలో ప్రత్యేక ప్రయోజనాలు, అప్గ్రేడ్లు ప్రత్యేక సేవలు.
ప్రైవేట్ ఎయిర్ ట్రావెల్: ప్రైవేట్ జెట్ ఛార్టర్ ఎంపికలు ప్రత్యేక విమానయాన ప్రయోజనాలు.
విమానాశ్రయ సేవలు: ప్రపంచవ్యాప్తంగా 140 దేశాల్లోని 1400 విమానాశ్రయాలలో వేగవంతమైన విఐపి సేవలు లభిస్తాయి.
వ్యక్తిగత కన్సియర్జ్: కార్డ్ హోల్డర్ల కోసం వ్యక్తిగత కన్సియర్జ్ సేవలు అందుబాటులో ఉంటాయి, ఇది ప్రయాణ ఏర్పాట్లు, ఈవెంట్ టికెట్లు మరియు మరెన్నో విషయాలలో సహాయపడుతుంది.
అమెరికన్ ఎక్స్ప్రెస్ సెంచురియన్ కార్డ్ ఖర్చు పరిమితి:
ఈ కార్డుకు ఉన్న ఖర్చు పరిమితి నిజంగా షాకింగ్! ఈ కార్డును పొందిన వారికి రూ. 10 కోట్ల వరకు ఖర్చు పరిమితి ఉంటుంది. దీనిని బట్టి ఈ కార్డు ఎంత ప్రీమియం అనేది అర్థం చేసుకోవచ్చు. అమెరికన్ ఎక్స్ప్రెస్ బ్యాంక్ అత్యంత సంపన్నులకు మాత్రమే ఈ ఆహ్వానాలను పంపుతుంది కాబట్టి, వారి ఖర్చు సామర్థ్యాన్ని బట్టి ఈ పరిమితిని నిర్ణయిస్తుంది.
అమెక్స్ బ్లాక్ కార్డ్ కేవలం ఆర్థిక స్థితికి మాత్రమే కాకుండా, ఒక ప్రత్యేకమైన జీవనశైలికి కూడా ప్రతీక. ఇది కేవలం ఒక క్రెడిట్ కార్డ్ కాదు, ఇది ప్రపంచంలోనే అత్యంత ప్రతిష్టాత్మకమైన వాటిలో ఒకటిగా పరిగణించబడుతుంది.