Zelio E-Mobility: ఈ ఈవీ స్కూటర్‌పై లైసెన్స్ లేకుండా రయ్..రయ్.. వారే అసలు టార్గెట్..!
భారతదేశంలో ఈవీ స్కూటర్ల జోరు రోజురోజుకూ పెరుగుతుంది. ముఖ్యంగా పట్టణ ప్రాంత ప్రజలు పెరుగుతున్న పెట్రోల్ ధరల దెబ్బకు ఈవీ స్కూటర్ల కొనుగోలు ముందుకు వస్తున్నారు. అలాగే రోజువారీ అవసరాలకు తక్కువ ధరల్లో స్కూటర్ల కొనే వారి సంఖ్య కూడా పెరిగింది. ఈ నేపథ్యంలో ప్రముఖ కంపెనీ జీలియో ఈ-మొబిలిటీ పట్టణ ప్రాంత ప్రజలకు లైసెన్స్ కూడా అవసరం లేని సరికొత్త ఈవీను లాంచ్ చేసింది.
జీలియో ఈ-మొబిలిటీ 10 నుంచి 18 సంవత్సరాల మధ్య వయస్సు ఉన్న టీనేజ్ రైడర్ల కోసం రూపొందించిన లైసెన్స్ లెస్ ఎలక్ట్రిక్ స్కూటర్ లిటిల్ గ్రేసీని పరిచయం చేసింది. ఈ కొత్త మోడల్ ధర రూ.49,500గా ఉంది. ఈ స్కూటర్ కొనుగోలు చేస్తే ప్రాంతీయ రవాణా కార్యాలయం (ఆర్టీఓ)లో రిజిస్ట్రేషన్ చేయాల్సిన అవసరం లేదు. లిటిల్ గ్రేసీ బ్యాటరీ ఎంపికల ద్వారా విభిన్నమైన మూడు వేరియంట్లలో వస్తుంది. బేస్ మోడల్‌లో 48వీ/32ఏహెచ్ లీడ్ యాసిడ్ బ్యాటరీ ధర రూ.49,500. దీని పరిధి 55-60 కి.మీగా ఉంది. మిడ్-టైర్ ఎంపికలో 60వీ/32ఏహెచ్ లీడ్ యాసిడ్ బ్యాటరీ రూ.52,000. ఈ వెర్షన్ పరిధి 70 కి.మీగా ఉంది. అలాగే ప్రీమియం వేరియంట్ 60వీ/30 ఏహెచ్ లి-అయాన్ బ్యాటరీతో వచ్చే స్కూటర్ ధర రూ.58,000గా ఉంటే పరిధి మాత్రం 70-75 కి.మీగా ఉంది.
లిటిల్ గ్రేసీ అన్ని మోడళ్లు గరిష్టంగా గంటకు 25 కి.మీ వేగంతో ప్రయాణించగలవు. అలాగే ఒకసారి ఛార్జ్ చేయడానికి దాదాపు 1.5 యూనిట్ల విద్యుత్తును వినియోగిస్తాయి. ఈ స్కూటర్ బరువు 80 కిలోలుగా ఉంటే 150 కిలోల లోడింగ్ సామర్థ్యాన్ని కలిగి ఉంటుంది. యువ రైడర్లకు స్థిరమైన రవాణాను అందుబాటులోకి తెచ్చే ఉత్పత్తిని పరిచయం చేయడం సంతోషంగా ఉందని జీలియో ఈ-మొబిలిటీ లిమిటెడ్ సహ వ్యవస్థాపకుడు, మేనేజింగ్ డైరెక్టర్ కునాల్ ఆర్య అన్నారు. ఈ స్కూటర్‌లో డిజిటల్ మీటర్, యూఎస్‌బీ పోర్ట్, కీలెస్ డ్రైవ్, యాంటీ-థెఫ్ట్ అలారంతో సెంటర్ లాక్, రివర్స్ గేర్, పార్కింగ్ స్విచ్, ఆటో-రిపేర్ ఫంక్షనాలిటీ వంటి ఫీచర్లు ఆకట్టుకుంటాయి.
జీలియో ఈ-మొబిలిటీ లిటిల్ గ్రేసీ హైడ్రాలిక్ సస్పెన్షన్, డ్రమ్ బ్రేక్‌లతో కూడా వస్తుంది. ఈ స్కూటర్ పింక్, బ్రౌన్/క్రీమ్, వైట్/బ్లూ, ఎల్లో/గ్రీన్ కలర్స్‌లో కొనుగోలుకు అందుబాటులో ఉంటుంది. అలాగే ఈ స్కూటర్ మోటార్, కంట్రోలర్, ఫ్రేమ్‌ను కవర్ చేసే రెండు సంవత్సరాల వారెంటీని అందిస్తుంది. జీలియో ఈ-మొబిలిటీకి దేశవ్యాప్తంగా రెండు లక్షల కంటే ఎక్కువ కస్టమర్లు ఉన్నారు. అలాగే 400 కంటే ఎక్కువ డీలర్‌షిప్‌లు ఉన్నాయి. జీలియో ఈ-మొబిలిటీ 2025 చివరి నాటికి 1,000 కంటే ఎక్కువ డీలర్‌షిప్‌లకు విస్తరించాలని లక్ష్యంగా పెట్టుకుంది.
మరిన్ని బిజినెస్ వార్తల కోసం ఇక్కడ క్లిక్ చేయండి