PAN-Aadhaar Linking: ఆధార్-పాన్ లింక్ చేయలేదా.? ఈ 5 నష్టాలు తప్పవు.. అవేంటో తెలుసా!

ఈ మధ్యకాలంలో ఏ పని పూర్తి చేయాలన్నా ఆదార్ కార్డు తప్పనిసరిగా మారింది. అలాగే పాన్ కార్డు కూడా అతి ముఖ్యమైన డాక్యుమెంట్స్‌లో ఒకటి. ఇక ఈ రెండింటిని లింక్ చేయడానికి కేంద్రం మార్చి 31, 2023 వరకు గడువును పొడిగించిన సంగతి తెలిసిందే. అయితే, ఏప్రిల్ 1, 2022 నుంచి ఎవరైతే పాన్-ఆధార్‌తో అనుసంధానం చేస్తారో.. వారు కచ్చితంగా పెనాల్టీని చెల్లించాల్సి ఉంటుంది. ఇందుకు సంబంధించి ఆదాయపు పన్ను శాఖ(CBDT) 29 మార్చి 2022న నోటిఫికేషన్ జారీ చేసింది. ఈ నోటిఫికేషన్ ప్రకారం, ఫైనాన్స్ యాక్ట్ 2021లో కొత్త సెక్షన్ 234H జోడించబడింది. ఒకవేళ పాన్ కార్డు నిరుపయోగంగా మారితే వచ్చే నష్టాలు ఏమిటో తెలుసుకుందాం.

1. CBDT జారీ చేసిన సర్క్యులర్ ప్రకారం, మార్చి 31, 2023 నాటికి పాన్ కార్డును ఆధార్‌తో లింక్ చేయకపోతే.. ఆ పాన్ కార్డు చెల్లుబాటు కాదు. ఇక చెల్లుబాటు కాని పాన్ కార్డును ఎక్కడా ఉపయోగించలేం.
2. రిటర్న్స్‌ను ఫైల్ చేసేటప్పుడు పన్ను చెల్లింపుదారులు కచ్చితంగా పాన్ కార్డును ఉపయోగించాలి. ఇక ఆ పాన్ కార్డు చెల్లుబాటు అయి ఉండాలి. చెల్లుబాటు కాని పాన్ కార్డులతో రిటర్న్స్ ఫైల్ చేయలేరు.
3. పన్ను చెల్లింపుదారుల రిటర్న్స్ పెండింగ్‌లో ఉంటే.. ఆ ప్రక్రియ పూర్తి కావాలన్నా పాన్ కార్డు చెల్లుబాటులో ఉండాలి. చెల్లుబాటు కాని పాన్ కార్డులు దేనికి పనికి రావు.
4. మీ పాన్ కార్డు నిరుపయోగంగా మారితే, చాలా చోట్ల ఎక్కువ పన్ను చెల్లించాల్సి ఉంటుంది. ముఖ్యంగా టీడీఎస్ విషయానికొస్తే.. పాన్ కార్డు సమర్పించినట్లయితే, తక్కువ TDS చెల్లించవచ్చు. ఒకవేళ పాన్ కార్డు సమర్పించకపోతే.. టీడీఎస్ రెట్టింపు చెల్లించాల్సి ఉంటుంది.
5. జూన్ 30, 2022 నాటికి తమ పాన్ కార్డును ఆధార్‌తో లింక్ చేసిన పన్ను చెల్లింపుదారులు రూ. 500 ఆలస్య రుసుమును చెల్లించాలి. ఆ తర్వాత రెండింటిని లింక్ చేసేవారు రూ. 1000 చెల్లించాల్సి ఉంటుంది. మార్చి 31, 2023లోగా పాన్ కార్డును ఆధార్‌తో అనుసంధానం కాకపోతే.. మీ పాన్ కార్డు చెల్లుబాటు అవ్వదు.