iPhone: ఆపిల్ ట్రంప్ బెదిరింపులకు తలొగ్గుతుందా? ఐఫోన్ అమెరికాలో తయారైతే ధర ఎంత పెరుగుతుంది?

Trump Tariff Threat: భారతదేశంలో లేదా అమెరికా కాకుండా మరే ఇతర దేశంలో ఐఫోన్‌లను తయారు చేస్తే కనీసం 25 శాతం సుంకాలు చెల్లించాల్సి ఉంటుందని అమెరికా అధ్యక్షుడు డొనాల్డ్ ట్రంప్ శుక్రవారం ఐఫోన్ తయారీదారు ఆపిల్ సీఈఓ టిమ్ కుక్‌ను హెచ్చరించిన విషయం తెలిసిందే. ఇంతలో చైనా- అమెరికా మధ్య సుంకాల యుద్ధం ప్రారంభమైన తర్వాత కంపెనీ తన ఉత్పత్తి కేంద్రాన్ని చైనా నుండి భారతదేశానికి మార్చడానికి పూర్తి సన్నాహాలు చేసింది. ఇప్పుడు మరో ప్రశ్న తలెత్తుతుంది. ట్రంప్ బెదిరింపులకు కుక్ తలొగ్గుతాడా? అని.

కొన్ని వర్గాలను ఉటంకిస్తూ, ఆపిల్ వంటి ప్రధాన సాంకేతిక సంస్థ భారతదేశంలో తన తయారీ యూనిట్‌ను ఏర్పాటు చేయాలనే నిర్ణయంలో ఎటువంటి మార్పు ఉండదని కేంద్ర ప్రభుత్వం ఆశావాదంతో ఉందని CNN-News18 నివేదించింది. ఇందులో కంపెనీ రాజకీయ ఒత్తిడి కంటే దాని లాభాలకే ఎక్కువ ప్రాముఖ్యత ఇస్తుంది. భారతదేశంలో ఐఫోన్‌లను తయారు చేయడం వల్ల తక్కువ ఖర్చులు, ప్రభుత్వం నుండి ప్రోత్సాహకాలు, మెరుగైన సరఫరా మొదలైన అనేక ప్రయోజనాలు ఉన్నాయి. ఈ ప్రయోజనాలకు కంపెనీ ఎక్కువ ప్రాధాన్యత ఇస్తుంది.

భారతదేశంలో ఎన్ని ఐఫోన్లు తయారు చేస్తారు?

ట్రంప్ ఒత్తిడి ఉన్నప్పటికీ ఆపిల్ లాభాల మార్జిన్లను పరిశీలిస్తుందని తాను విశ్వసిస్తున్నానని ప్రభుత్వ సీనియర్ అధికారి ఒకరు మీడియాకు తెలిపారు. ప్రస్తుతం, ఆపిల్ యునైటెడ్ స్టేట్స్‌లో స్మార్ట్‌ఫోన్‌లను తయారు చేయడం లేదు. చాలా ఐఫోన్‌లు చైనాలో తయారవుతున్నాయి. అయితే భారతదేశం ఇప్పుడు ఆపిల్ మొత్తం ఉత్పత్తిలో దాదాపు 15 శాతం వాటాను కలిగి ఉంది. ఇది సంవత్సరానికి దాదాపు 40 మిలియన్ యూనిట్లు. మార్చి 31తో ముగిసిన ఆర్థిక సంవత్సరంలో ఆపిల్ తన ఐఫోన్‌లలో 60 శాతానికి పైగా భారతదేశంలో తయారు చేసింది. దీని ఉత్పత్తి విలువ $22 బిలియన్లు అని అంచనా.

యునైటెడ్ స్టేట్స్‌లో ఐఫోన్‌లను తయారు చేయడం వల్ల కలిగే నష్టాలు ఏమిటి?

భారతదేశంలో తయారయ్యే ఐఫోన్‌లను అమెరికాలో తయారు చేయడం ప్రారంభిస్తే వాటి ధర $1,200-1,500 నుండి $3,500 వరకు పెరుగుతుందని మార్కెట్ నిపుణులు కూడా అంటున్నారు. దీని అర్థం అమెరికన్ ప్రజలు ఐఫోన్ కోసం రెండింతలు ఎక్కువ చెల్లించాల్సి ఉంటుంది.

సుంకాలు విధించడం ద్వారా మాత్రమే కంపెనీ అమెరికాలో ఐఫోన్‌లను తయారు చేయడం ప్రారంభిస్తుందని ట్రంప్ భావిస్తే, అతను తప్పుగా ఆలోచిస్తున్నాడని CNN డేటా విశ్లేషకుడు హ్యారీ ఆంటన్ కూడా అన్నారు. విదేశాల నుండి అమెరికాకు దిగుమతి చేసుకునే ఐఫోన్‌లపై సుంకాలు విధించినప్పటికీ, కంపెనీ ఆ ఖర్చును స్వయంగా భరిస్తుంది లేదా ఆ భారాన్ని నేరుగా వినియోగదారులపైకి నెట్టుతుంది. అయితే, కఠినమైన కార్మిక చట్టాలు, టూలింగ్ ఇంజనీర్ల కొరత, సరఫరా సరిగా లేకపోవడం వల్ల అమెరికాలో ఐఫోన్‌లను తయారు చేయడం లాభదాయకం కాదని కుక్ ఇప్పటికే చెప్పారు. అయితే రానున్న రోజుల్లో సీఈవో కుక్‌ ఏ నిర్ణయం తీసుకుంటాడో వేచి చూడాలి.

మరిన్ని బిజినెస్ వార్తల కోసం ఇక్కడ క్లిక్ చేయండి