సంగీత ప్రియులకు బిగ్ అలర్ట్..? యాడ్స్ లేకుండా మ్యూజిక్ వినే ఛాన్స్ లేనట్టేనా
అమెజాన్ ప్రైమ్ మెంబర్షిప్ ఉన్నవారికి మ్యూజిక్ స్ట్రీమింగ్ ఇకపై మునుపటిలా ఉండబోదు! జూలై 2, 2026 నుండి అమెజాన్ మ్యూజిక్ సర్వీసులో కీలక మార్పులు రాబోతున్నాయి. ప్రైమ్ మెంబర్షిప్లో భాగంగా ఇంతకాలం లభించిన అడ్-ఫ్రీ మ్యూజిక్, ఆఫ్లైన్ డౌన్లోడ్ ఫీచర్లను అమెజాన్ పరిమితం చేస్తోంది. ప్రీమియం సౌండ్ క్వాలిటీ కోసం కంపెనీ కొత్తగా 'అమెజాన్ మ్యూజిక్ అన్లిమిటెడ్' సబ్స్క్రిప్షన్ ప్లాన్ను ప్రవేశపెట్టింది.

అమెజాన్ మ్యూజిక్ సర్వీసులో మూడు కొత్త స్థాయిలను (Tiers) కంపెనీ తీసుకువచ్చింది. మీరు ప్రీమియం ఆడియో క్వాలిటీ, యాడ్-ఫ్రీ అనుభవం కోరుకుంటే అన్లిమిటెడ్ ప్లాన్ తీసుకోవాల్సి ఉంటుంది. ఇప్పటివరకు ఉచితంగా లభించిన ఫీచర్లకు ఇకపై డబ్బులు చెల్లించాల్సి రావచ్చు. ప్రైమ్ మెంబర్స్, సాధారణ యూజర్లకు అందుబాటులో ఉండబోయే ఈ మూడు రకాల ప్లాన్స్, వాటి ధరలు, ఇతర మార్పుల గురించి పూర్తి వివరాలు తెలుసుకుందాం!
కొత్తగా వచ్చిన మార్పులేంటి?
2018 నుండి భారతదేశంలో ప్రైమ్ సబ్స్క్రిప్షన్తో ఉచితంగా లభిస్తున్న అమెజాన్ మ్యూజిక్ విధానం జూలై 2, 2026 నుండి మారుతోంది. ఇకపై అమెజాన్ మ్యూజిక్ మూడు వేర్వేరు విభాగాలలో అందుబాటులోకి రానుంది.
- అమెజాన్ మ్యూజిక్ అన్లిమిటెడ్: ఇది ప్రీమియం ప్లాన్. ఇందులో 100 మిలియన్లకు పైగా పాటలు, అడ్-ఫ్రీ మ్యూజిక్, HD, Ultra HD మరియు స్పేషియల్ ఆడియో (Dolby Atmos) సౌండ్ క్వాలిటీ లభిస్తాయి. ఆఫ్లైన్ డౌన్లోడ్ సదుపాయం కూడా ఈ ప్లాన్లోనే ఉంటుంది. ప్రైమ్ మెంబర్లకు నెలకు రూ. 99, ఇతరులకు రూ. 119. ప్రైమ్ మెంబర్లకు 6 నెలలు, ఇతరులకు 3 నెలలు ఉచితంగా లభిస్తుంది.
- అమెజాన్ మ్యూజిక్ ఫర్ ప్రైమ్ మెంబర్స్: ఇది ఇప్పటివరకు ఉన్న సర్వీస్ లాగే అనిపించినా, ఇకపై ఇందులో పరిమిత ప్రకటనలు వినిపిస్తాయి, ఆఫ్లైన్ డౌన్లోడ్ ఫీచర్ తొలగించబడుతుంది. ప్రైమ్ సబ్స్క్రిప్షన్తో ఇది యథావిధిగా కొనసాగుతుంది.
- అమెజాన్ మ్యూజిక్ ఫ్రీ: ఇది కొత్తగా రాబోతున్న ప్లాన్. ఇది ప్రైమ్ మెంబర్షిప్ లేని వారికి ఉచితంగా లభిస్తుంది. అయితే, పూర్తి స్థాయి మ్యూజిక్ లైబ్రరీ అందుబాటులో ఉన్నప్పటికీ, పూర్తిగా యాడ్-సపోర్టెడ్ (ప్రకటనలతో కూడిన) స్ట్రీమింగ్ మాత్రమే ఉంటుంది.
లాభమేంటి?
పాత విధానంలో ప్రైమ్ మెంబర్స్ అందరికీ ఒకే రకమైన మ్యూజిక్ అనుభవం ఉండేది. ఇప్పుడు కంపెనీ ఆడియోఫైల్స్ (Audiofiles) కోసం ప్రత్యేకంగా ‘అన్లిమిటెడ్’ ప్లాన్ను తెచ్చి, వారికి స్టూడియో-క్వాలిటీ ఆడియోను అందిస్తోంది. అయితే, సాధారణంగా పాటలు వినేవారికి, డౌన్లోడ్ సదుపాయం లేకపోవడం కొంత అసంతృప్తిని కలిగించే అవకాశం ఉంది. మీరు పాటలను డౌన్లోడ్ చేసుకుని వినడం లేదా హై-క్వాలిటీ ఆడియోను ఇష్టపడే వారైతే, మీరు ‘అన్లిమిటెడ్’ ప్లాన్కు మారడం తప్పనిసరి.
